Read Dagbani Yila 69 Bible Online

Yila 69 - Dagbani bible

Yila 69

¹[69] Naawuni, tiligim’ ma! Dama kom paala n nyiŋgoli tariga.

²N firila baɣiri ni, ka n naba ni yɛn tam binshɛli zuɣu kani, m paala kɔbulli ni, ka kɔgbana ŋmɛri ma garita.

³N kuhimi hal ti gbarigi, ka n kukoli biɛra, ka n nina niŋ liti, ka n kul guhirila n Naawuni.

⁴ Ninvuɣ’ shɛb’ bɛn je ma ka di ka daliri galisiya gari n zabiri. Ninvuɣ’ shɛb’ bɛn lo ni bɛ ku ma galisiya pam, ka n dimnim’ ŋmari ʒiri pari ma. Bɛ chɛ ka n yola n ni bi zu neen’ shɛŋa samli.

⁵Naawuni, a mi n jɛrilim ni nyɛ shɛm. N ni pun tum tuumbiɛ’ shɛŋa bi sɔɣ’ a sani.

⁶N Duuma Yawɛ ŋun nyɛ Tɔbbihi Naa ŋɔ, di chɛ ka ninvuɣ’ shɛb’ bɛn mali tahima a sani di vi n zuɣu. Izraɛlnim’ Naawuni ŋɔ, di chɛ ka ninvuɣ’ shɛb’ bɛn jɛmd’ a ŋɔ nya filiŋ n zuɣu.

⁷A zuɣu ka bɛ kul turi ma, ka n kul diri vi.

⁸N ŋmanila sana n dɔɣiriba sani; ka ŋmani tinzun’ nira m ma puuni bihi sani.

⁹ N suhu zaa kul yɛla a jɛmbu duu zuɣu, ka di yɛla kul nyamdi n ni. Bɛ ni tur’ a tu’ shɛŋa zaa ʒila n zuɣu.

¹⁰N yi siɣisi mmaŋa n-lo noli, bɛ turi ma la n ni niŋ shɛm maa zuɣu.

¹¹Ka n zaŋ buɣu leei n situra ye, ka bɛ maani ma ansarisi.

¹²N nyɛla ninvuɣ’ shɛb’ bɛn ʒi tiŋ’ dunɔdali gbini ni zuri so nyaaŋa, ka danyuriba zaŋ ma niŋ yila ni yiina.

¹³Amaa nyin’ Yawɛ ka man’ kul suhira. Naawuni, garigim ma a ni zali saha shɛli a yurilim maŋli din galisi la puuni min’ a ʒiɛyimtali sɔŋsim la puuni.

¹⁴Fam’ ma baɣiri firibu ni bahi. Tiligim’ ma n dimnim’ nuu ni. Tiligim’ ma kɔbulli ŋɔ ni.

¹⁵Di chɛ ka kɔgbana lim ma bee n-chɛ ka kɔbulli di ma bee n-chɛ ka bɔɣ’ zilinli mum ma niŋ.

¹⁶Yawɛ, deemi n suhigu, dama a yurilim maŋli la viɛla. A nambɔzɔbo din galisi pam la zuɣu, ŋmaligim’ m polo na.

¹⁷Di lɛb’ a nyaaŋa biri man’ ŋun nyɛ a dabili ŋɔ; dama m bela nandahima ni, deemi n suhigu yomyom.

¹⁸Mirim’ ma, tiligim’ ma; fam ma n dimnim’ nuu ni bahi.

¹⁹A mi bɛ ni turi ma, ka dihiri ma vi, ka filindi ma shɛm yɛla; a mi n dimnim’ zaa.

²⁰Turi maa nyɛla din saɣim n suhu; ka n lan ka tahima. N daa lihi bo nambɔzɔbo, amaa ka bi nya li; ka lihi bo bɛn ni maai n suhu, ka bi nya so.

²¹ Bɛn’ daa zaŋla lɔɣu ni be bindir’ shɛli ni ti ma ni n di; ka kɔnyuri daa mali ma, ka bɛ zaŋ yabiga kom ti ma ni n nyu.

²²Chɛ ka bɛ bindira leei tɔŋ gbahi ba; ka chɛ ka bɛ churi puhibu leei zana gbahi ba.

²³ Chɛ ka bɛ nina niŋ liti, ka bɛ ku tooi nya; ka chɛ ka bɛ yaaŋkɔba gbarigi sahakam.

²⁴Chɛ ka a suhu yiɣisi bahi bɛ zuɣu, ka chɛ ka a suhuyiɣisili din galisi la di ba.

²⁵ Chɛ ka bɛ ʒiishee leei dabari, ka di zuɣu chɛ ka bɛ ku lan be bɛ yinsi.

²⁶Dama bɛ niŋ a ni pun darigi ninvuɣ’ shɛb’ tibili alaka; ka nahind’ a ni ti shɛb’ dansi la pahira.

²⁷Chɛ ka bɛ taali galisi pahi; di chɛ ka bɛ nya gaafara a sani.

²⁸ Kpihimmi bɛ yuya nyɛviyanim’ litaafi la ni, ka di chɛ ka bɛ sabi bɛ yuya pahi wuntizɔriba yuya ni.

²⁹Amaa n nyɛla ŋun be biɛrim mini nandahima ni. Naawuni, chɛ ka a tiliginsim yiko gbibi ma.

³⁰N ni yili yilli paɣi Naawuni yuli; ka zaŋ wumpaɣibo tibig’ o.

³¹Dimbɔŋɔ n-nyɛ din ni tiɣi Yawɛ nini gari nir’ yi zaŋ naɣila’ lantabili bee naɣilaa ni yila ni takarifiɛma mali sara.

³²Chɛ ka ninvuɣ’ shɛb’ bɛn nyari nahiŋgu nya li ka bɛ suhuri paligi; ka yi bɛn jɛmdi Naawuni ŋɔ mi chɛliya ka yi suhuri paligi.

³³Yawɛ wumdi nandaamba suhigu, ka bi tamd’ o niriba bɛn be sarika ni yɛla.

³⁴Alizanda ni nim’ mini dunia ni nim’ zaŋ tabili teeku mini binshɛɣukam zaa din be di ni, paɣimiy’ o.

³⁵Dama Naawuni ni tiligi Ziɔn, ka lan me Juda tinsi zali, ka o daba ti be nimaani su li.

³⁶O daba maa bihi ni ti su li, ka ninvuɣ’ shɛb’ bɛn yur’ o ti be nimaani.