Read Dagbani Yila 72 Bible Online

Yila 72 - Dagbani bible

Yila 72

¹[71] Naawuni, wuhim’ naa ka o dol’ a zaligu kariti saria, ka zaŋ a wuntia ti naa bia.

²Chɛ ka o doli wuntia soli kariti a niriba saria, ka doli zaligu kariti a tarimba saria.

³Chɛ ka zoya zuɣu niŋ bindira ka di niŋ niriba anfaani pam, ka chɛ ka wuntitali mi yi zahira daboya zuɣu.

⁴Chɛ ka o zabi niriba bɛn nyɛ tarimba zuɣu; ka fa nandaamba bahi ka darigi ninvuɣ’ shɛb’ bɛn nahindi ba tibili.

⁵Chɛ ka o be n-yuui kaman wuntaŋ’ mini goli ni be shɛm ŋɔ ʒiɛmani kam ni.

⁶Chɛ ka o be kaman saa ŋun miri bahiri bindira zuɣu la, ka chɛ ka o be kaman sakurili ŋun maari tiŋgbani la.

⁷Chɛ ka wuntitali be o ʒiɛman’ ni, ka chɛ ka suhudoo pam beni kaman goli ni beni ka o neesim be shɛm la sahakam.

⁸ O nam sulinsi ni zaŋla teeku noli hal ti kpa teeku shɛli noli yaha, ka lan zaŋ Yufretiiz Mɔɣili noli hal ti kpa dunia tariga zaa.

⁹Ninvuɣ’ shɛb’ bɛn be tiŋgban’ nɛli ni ni ti kana ti damd’ o tooni, ka o dimnim’ mi ti kana ti lu o tooni ka bɛ noya vaai taŋkpaɣu.

¹⁰Chɛ ka Speen mini teeku ni tiŋgban’ bihi nanim’ kana ti jɛm’ o, ka chɛ ka Shiiba nanima mini Siiba nanim’[72] ʒi pina na ti ti o.

¹¹Chɛ ka nanim’ zaa damd’ o tiŋa; ka chɛ ka zuliya kam zaa jɛm’ o.

¹²Dama o nyɛla ŋun fari tarimba bɛn kuhi bol’ o bahira; ka fari nandaamba mini bɛn ka bɛn sɔŋdi ba bahira.

¹³O zɔri ninvuɣ’ shɛb’ bɛn ka yaa mini nandaamba nambɔɣu; ka tiligiri nandaamba nyɛviya.

¹⁴O tiligiri bɛ nyɛviya nahiŋgu mini duŋtaariba nuu ni; bɛ nyɛviya nyɛla din viɛl’ pam o sani.

¹⁵Naawuni dolim’ naa maa nyɛvili! Naawuni chɛ ka bɛ ʒi salima yi Shiiba na ti ti o. Chɛ ka niriba suhimi Naawuni tir’ o sahakam. Chɛ ka niriba suhimi Naawuni daalibarika niŋd’ o ni dabisi’ muni puuni zaa.

¹⁶Chɛ ka puri atam niŋ pam. Chɛ ka daboya zuɣu zaa zibigi bindira, ka chɛ ka di niŋ pam kaman Lɛbanɔn bindira ni niŋdi shɛm la. Chɛ ka fɔntinsi ni pali niriba kaman mɔri ni zibigi mɔɣu ni shɛm la.

¹⁷Chɛ ka naa maa yuli ku kpi, ka chɛ ka o yul’ kul beni kaman wuntaŋ’ ni beni shɛm ŋɔ. Chɛ ka zuliya kam zaa nya alibarika o zuɣu. Ka chɛ ka zuliya kam zaa bol’ o alibarika naa.

¹⁸Paɣimiya Yawɛ ŋun nyɛ Izraɛlnim’ Naawuni ŋɔ. O kɔŋko n-nyɛ ŋun tumd’ alahiziba tuma.

¹⁹Paɣimiy’ o yuli din mali jilima ŋɔ sahakam. O chɛ ka o jilima pali dunia ŋɔ luɣilikam zaa. Ami! Ami!

²⁰Jɛsi bia Dauda wunsuhigunim’ tariga m-bala.