Read Dagbani Yila 77 Bible Online

Yila 77 - Dagbani bible

Yila 77

¹[78] N duhi n yee kum niŋ Naawuni, n duhi n yee kum niŋ Naawuni ni o deei n suhigu.

²M muɣisigu nyabu dali, n daa suhi n Duuma. N daa kpuɣila n nuhi zuɣusaa n-suhi Naawuni yuŋ zaa ka di bi wum ma, ka n suhu daa zaɣisi maabu.

³N yi tɛhi Naawuni yɛla, n kul ŋuhirimi, ka n yi kul zaŋ n suhu sɔŋ tiŋ’ suhir’ o, gbariginsim nti kpɛri n ni.

⁴A chɛ ka n nini kɔŋ pɔbbu, ka di muɣisi ma pam hal ka n ti kɔŋ yɛtɔɣa tɔɣisibu.

⁵Ka di chɛ ka n tɛhi kurimbuni ha yɛla, ka teei yuun’ shɛŋa din gari la yɛla.

⁶Ka n gbaai yila yilibu n suhu ni yuŋ, ka zaŋ n suhu sɔŋ tiŋa n-suhi Naawuni, ka bɔhi n suhu:

⁷“Ti Duuma kul yɛn zaɣisi ti mi pumpɔŋɔ zaŋ chani ka kul ku lan niŋ ti nirilim sahakam?

⁸O yurilim maŋli la naala zaa? O daalikaulinim’ la zanila tariga sahakam maa?

⁹Naawuni tamla o nirilim niŋbu la yɛla? O suhuyiɣisili chɛ ka o zaɣisila nambɔɣu zɔbu?”

¹⁰Di saha ka n yɛli, “Din niŋ ma suhugarigu nyɛla, Zallakudura Naa nudirigu yiko la taɣimi.”

¹¹Yawɛ, n teeg’ a tuun’ kara la yɛla; ka teeg’ a ni daa pun tum alahiziba tuun’ shɛŋa la gba yɛla.

¹²N zaŋ n suhu sɔŋ tiŋa n-tɛh’ a tuma zaa yɛla, ka zaŋ n suhu sɔŋ tiŋa n-tɛh’ a tuun’ kara yɛla.

¹³Naawuni, a soli nyɛla din be kasi; wun’ ŋuni n-lee galisi paai ti Naawuni ŋɔ?

¹⁴Nyini n-nyɛ Naawuni ŋun tumd’ alahiziba tumtumsa; ka nyɛ ŋun kahig’ a yiko tuma wuhi zuliya shɛba.

¹⁵A zaŋ a yiko nuu tilig’ a niriba bɛn nyɛ Yaakubu mini Yisifu zuliya la.

¹⁶Naawuni, kom ni daa nya a, kom maa ni daa shiri nya a, dabiɛm daa gbaai li mi, ka kɔbulli ni daa sɔhira.

¹⁷Ka sagbana daa kpaai kom bahina; ka saa daa tahira, ka a saa nyaɣisibu piɛma nyaɣisiri gindi luɣilikam zaa.

¹⁸Ka a saa tahibu be pɔhimʒiɛpiliŋga ni, ka a saa nyaɣisibu neei dunia ŋɔ ni zaa, ka dunia sɔhiri ka damda.

¹⁹A soli daa timla teeku ni gari, ka a sɔbil’ mi tim ko’ titaŋa ni gari, amaa ka so daa bi nya ka a napom’ bɔba doya.

²⁰A daa chɛ ka Musa mini Aduna gari tooni n-zaŋ a niriba bɛn ŋmani piɛri la chaŋ.