Read Dagbani Yila 79 Bible Online

Yila 79 - Dagbani bible

Yila 79

¹[81] Naawuni, zuliya shɛb’ kana ti kpe a tiŋgbɔŋ ni. Bɛ ta a jɛmbu du’ kasi la daɣiri, ka ŋme n-wurim Jɛrusalɛm.

²Bɛ zaŋ a daba niŋgbuna ti juri bɛn yiɣiri zuɣusaa ŋɔ, ka zaŋ bɛn ʒe a yim niŋgbuna ti mɔɣu ni biŋkɔbiri bɛn be tiŋgban’ ni.

³Bɛ yih’ a niriba ʒim Jɛrusalɛm, ka di doya zɔri kaman kom la, ka so kani ŋun ni sɔɣi ba.

⁴Ti leela ti ʒiʒiinitab’ ni maani shɛb’ ansarisi, ka leei bɛn gili ti ni maani shɛb’ ansarisi ka lari ti.

⁵Yawɛ, bɔ saha ka di kul yɛn be lala? A suhuyiɣisili kul yɛn beni la sahakam? A nyuli zabbu suhuyiɣisili maa yɛn dirimi kaman buɣim la?

⁶Chɛ ka a suhu yiɣisi bahila zuliya shɛb’ bɛn bi mi a la mini nam shɛŋa din niriba bi jɛmd’ a la zuɣu.

⁷Dama bɛ ku Yaakubu zuliya, ka wurim bɛ biɛhigu shee.

⁸Di darigi ti tibili ti yaannim’ daalahichi zuɣu. Zom’ ti nambɔɣu yomyom; dama ti nya filiŋ pam.

⁹Naawuni ŋun nyɛ ti tiliginsim ŋɔ, sɔŋmi ti a yuli jilima nyabu zuɣu. Fam’ ti bahi, ka chɛ ti daalahichi a yuli zuɣu.

¹⁰Bɔzuɣu ka niriba ni ti bɔhi, “Ya ka bɛ Naawuni maa lee be?” Darigim’ ninvuɣ’ shɛb’ bɛn yih’ a daba ʒim maa tibili ka timaŋmaŋ’ nini nya.

¹¹Gbilisim’ a tibili wum sarikanim’ ŋuhibu, ka tiligi bɛ ni zali ni bɛ kum shɛb’ la a yiko din galisi pam la zuɣu.

¹²Ti Duuma, bɔhim’ ti ʒiʒiinitab’ biɛri siɣimsiɣim buyopɔin zuɣu, ansarisi shɛŋa bɛ ni maan’ a la zuɣu.

¹³Di saha ka tinim’ bɛn nyɛ a niriba ni a ni gul’ shɛb’ kaman piɛgul’ ŋɔ kul ni puhir’ a sahakam ka paɣir’ a ʒiɛmani kam puuni.