Read Dagbani Yila 8 Bible Online

Yila 8 - Dagbani bible

Yila 8

¹[6] Yawɛ ŋun nyɛ ti Duuma ŋɔ, a yuli galisiya dunia ŋɔ zaa ni! A chɛ ka a jilima yi zahira zuɣusaa.

² A nyari paɣibu bibihi mini bimɔɣirisi noya ni a dimnim’ zuɣu. A chɛ ka a dima mini ŋun nyɛ biɛribɔhira fo bɛ noya.

³N yi lih’ a ni nam sagban’ shɛŋa ŋɔ, ka lihi goli mini saŋmar’ shɛb’ a ni nam ŋɔ,

⁴ bɔ n-lee nyɛ ninsalinima ka a tɛhiri bɛ yɛla bee daadamnim’ lee nyɛla bɔ ka a baɣa be bɛ ni?

⁵Amaa a nam ba ka bɛ biɛhigu pooi nyin’ Naawuni biɛla. A zaŋ jiri mini jilima pili ba kaman zuɣupila la.

⁶ A zaŋ a ni nam binshɛɣukam niŋ bɛ nuu ni, ka zaŋ binshɛɣukam zaa fukumsi niŋ bɛ nuu ni:

⁷piɛri mini niɣi zaa ni mɔɣu ni biŋkɔbiri gba

⁸ni noonsi bɛn yiɣiri zuɣusaa ŋɔ ni teeku ni zahim ni binnɛɔŋ kam ŋun be teeku ni.

⁹Yawɛ ŋun nyɛ ti Duuma ŋɔ, a yuli galisiya dunia ŋɔ zaa ni!