Read Dagbani Yila 83 Bible Online

Yila 83 - Dagbani bible

Yila 83

¹[85] Naawuni, di shini; Naawuni, di fo, a mi di kpalim ʒiya!

²Hal pumpɔŋɔ, a dimnim’ taala duŋ; ka ninvuɣ’ shɛb’ bɛn je a gba mal’ a gadama.

³Bɛ lɔrila nia biɛri zaŋ chaŋ a niriba polo; ka niŋdi tab’ saawara zaŋ chaŋ a ni guli a ninvuɣ’ shɛb’ la polo.

⁴Bɛ yɛrimi, “Kamiyana ka ti ku n-naai bɛ zuliya maa. Di chɛliya ka so ti lan teei Izraɛlnim’ yuli yɛla yaha.”

⁵Bɛ laɣimmi naai noli, ka lo nia biɛɣu jɛnd’ a.

⁶Ɛdomnima mini Ishimail zuliya ni Mɔabnima ni Hagirinima ni

⁷Gɛbalnima ni Ammɔnnima ni Amalɛknima ni Filistianima mini Taainima.

⁸Ka Asirianim’ gba pahi bɛ zuɣu n-chɛ ka Lɔt zuliya nya yaa.

⁹ Niŋm’ ba kaman a ni daa niŋ Midiannim’ mini Sisɛra ni Jabin shɛm Kishɔn Mɔɣili ni la.

¹⁰A daa ku ba Ɛndo, ka bɛ niŋgbuna dɔni tiŋgban’ ni ti pooi.

¹¹ Niŋm’ bɛ zuɣulaannim’ kaman a ni daa niŋ Orɛb mini Ziib shɛm la; ka niŋ bɛ nanim’ kaman a ni daa niŋ Zɛba mini Zalimuna shɛm la.

¹²Bɛna n-daa yɛli, “Chɛliya ka ti deei tiŋgbɔn shɛli din nyɛ Naawuni din’ la n-leei ti dini.”

¹³N Naawuni, niŋm’ ba kaman pɔhimʒiɛpiliŋga taŋkpagbiligu la; ka niŋ ba kaman pɔhim n-ʒiɛri wurigu bahiri la.

¹⁴Niŋmi ba kaman buɣim ni diri nyɔŋ shɛm la, bee kaman buɣim niɛm ni taari diri zoya zuɣu shɛm la,

¹⁵chɛ ka a pɔhim biɛɣu doli ba lala, ka chɛ ka a sanʒiɛ’ titali kpɛhi ba dabiɛm!

¹⁶Yawɛ, chɛ ka vi gbahi ba, ka sokam baŋ a yiko ni nyɛ shɛm.

¹⁷Chɛ ka bɛ di vi, ka dabiɛm mali ba sahakam; ka chɛ ka bɛ kpi ni vi.

¹⁸Chɛ ka bɛ baŋ ni a kɔŋko ŋun yuli nyɛ Yawɛ ŋɔ, n-nyɛ Zallakudura Naa ŋun su dunia ŋɔ zaa.