Read Dagbani Yila 84 Bible Online

Yila 84 - Dagbani bible

Yila 84

¹[86] Yawɛ ŋun nyɛ Tɔbbihi Naa ŋɔ, a jɛmbu duu shiri nyɛla luɣ’ shɛli din viɛli shee.

²N suhu zaa kul yɛla a jɛmbu duu maa ni benibu zuɣu hal ti yɛli ni bo m-bala. N niŋgbuŋ yaɣa pinaayi kul yiinila yila ni suhupiɛlli paɣiri nyin’ Naawuni ŋun kul be ŋɔ.

³Hal sakpaleensi mɛrila bɛ duri, ka ŋmanʒiɛhi mali bɛmaŋmaŋ’ tɛri a jɛmbu duu puuni; ka mali bɛ bihi sɔŋdi baɣind’ a sara maligu bimbini; nyin’ Yawɛ ŋun nyɛ Tɔbbihi Naa ŋun nyɛ n naa ni n Naawuni ŋɔ.

⁴Ninvuɣ’ shɛb’ bɛn be a jɛmbu duu n-kul yiini yila paɣir’ a sahakam mal’ alibarika.

⁵Ninvuɣ’ shɛb’ bɛn kpiɔŋ yir’ a sanna mal’ alibarika, bɛ nyɛla bɛn suhuri kul bɔri ni bɛ chaŋ Ziɔn ti jɛm’ a.

⁶Bɛ yi kpe Baka vinvamli la ni ni bɛ gari, bɛ chɛrimi ka di puhigir’ kom zɔra; ka siɣili saa ŋun daŋ mibu chɛri ka di kpɛri paana.

⁷Bɛ kul malila kpiɔŋ chana; bɛ ni nya Naawuni ŋun gari wuna zaa Ziɔn Zoli zuɣu la zuɣu.

⁸Yawɛ ŋun nyɛ Tɔbbihi Naawuni ŋɔ, deem’ n suhigu. Yaakubu Naawuni, gbilisim’ tibili wum!

⁹Naawuni, nyam’ ti nyɔtaɣirigu, lihim’ a ni pii na’ so ŋɔ ninni!

¹⁰N yi be a jɛmbu duu dahin yini, di so ni m be luɣ’ shɛli polo m-paai biɛɣ’ tuhili; m paɣiya ni n nyɛ Naawuni jɛmbu duu dunɔgula n-gari m be ninvuɣ’ biɛri yinsi.

¹¹Dama Yawɛ ŋun nyɛ Naawuni ŋɔ nɛmi kaman wuntaŋa ka be kaman nyɔtaɣirigu la. Ŋuna n-niŋdi ti nirilim ka chɛ ka niriba tiri ti jilima. Yawɛ bi mɔŋdi ninvuɣ’ shɛb’ bɛn tumdi din tuhi binsuma.

¹²Yawɛ ŋun nyɛ Tɔbbihi Naa ŋɔ, ŋunkam niŋ a naani mal’ alibarika!