Read Dagbani Yila 86 Bible Online

Yila 86 - Dagbani bible

Yila 86

¹[88] Yawɛ, gbilisim’ a tibili wum n suhigu, ka garigi ma, dama n nyɛla faralana ni nandana.

²Gbibi n nyɛvili, dama n zaŋla mmaŋ’ zaa ti a; tiligim’ a dabili ŋun niŋ a naani ŋɔ. Nyini n-nyɛ n Naawuni.

³N Duuma, zom’ ma nambɔɣu, dama nyini ka n kuhiri niŋda dabisi’ muni zaa.

⁴N Duuma, chɛ ka mani a dabili ŋɔ mali suhupiɛlli; dama nyini ka n kul suhira.

⁵N Duuma, a nyɛla Naawun’ suŋ, ka chɛri niriba taali, ka a yurilim maŋli galisi zaŋ chaŋ bɛnkam zaa suhir’ a sani.

⁶Yawɛ, gbilisim’ tibili wum n suhigu; wummi n suhigu shɛli n ni suhir’ a ni a zo ma nambɔɣu ŋɔ.

⁷N daa fabili niŋ a n wahala dabisili dali, ka a garigi ma.

⁸Ti Duuma, wuna puuni, wun’ so kani m-be ka nyini, ka tuun’ shɛli mi kani ŋ-ŋman’ a tuma.

⁹ Ti Duuma, a ni nam zuliya shɛb’ la zaa ni kana ti gbani a tooni tibig’ a yuli.

¹⁰Dama nyini n-galisi, ka tumd’ alahiziba tuma; a ko n-nyɛ Naawuni.

¹¹Yawɛ, wuhim’ ma a soli, ka n dol’ a yɛlimaŋli la; tim ma suhuyini, ka n tibigir’ a yuli.

¹²N Duuma Naawuni, M paɣir’ a ni n suhu zaa, ka ni tibigir’ a yuli sahakam.

¹³Dama a yurilim maŋli zaŋ chaŋ m polo galisiya pam; a yihi n shia kpiimba biɛhigu shee.

¹⁴Naawuni, ninʒeensinim’ yiɣisi lu n zuɣu; ninkuunsinim’ laɣimya m-bɔri ni bɛ yihi n nyɛvili, bɛ nyɛla ninvuɣ’ shɛb’ bɛn bi lihi nya a.

¹⁵Amaa n Duuma, a nyɛla Naawuni ŋun zɔri nambɔɣu ni ŋun niŋdi nirilim, a bi jɛri suli yom, ka a yurilim maŋli min’ a ʒiɛyimtali mi galisi pam.

¹⁶Ŋmaligim’ m polo na n-zo ma nambɔɣu; zaŋm’ a kpiɔŋ ti a dabili ŋɔ, tiligim’ a dab’ bipuɣiŋga bia ŋɔ.

¹⁷Wuhim’ ma a nirilim shihirili, ka lala chɛ ka bɛnkam je ma la nya li ka di vi; dama nyini Yawɛ pun sɔŋ ma ka maai n suhu.