Read Dagbani Yila 9 Bible Online

Yila 9 - Dagbani bible

Yila 9

¹[7] Yawɛ, n ni paɣ’ a ni n suhu zaa; n ni yɛl’ a daalahiziba tuma zaa yɛla.

²N ni mali suhupiɛlli ka duh’ a. Zallakudura Naa, n ni yili yila paɣ’ a yuli.

³N dimnim’ yi ŋmaligi, bɛ tuurimi lu n-kpi a tooni.

⁴A kari ma saria ka di doli soli; a ʒini nam ʒiishee n-kari ma saria, ka nya ka m-mali yɛlimaŋli.

⁵A wuhiya ni chɛfirinim’ mali taali, ka chɛ ka ninvuɣ’ biɛri bahi yoli; ka a kpihim bɛ yuya zaa zaŋ hal ni saha din ka bahigu.

⁶A bahi ti dimnim’ yoli zaa; ka saɣim bɛ fɔntinsi, ka so ku lan teei bɛ yɛla yaha.

⁷Amaa Yawɛ kul ʒila o nam ʒiishee sahakam, ka zal’ o nam ʒiishee ni o kari saria.

⁸O dolila wuntia soli kariti dunianim’ saria; o bi gaŋdi so o saria karibu ni.

⁹Yawɛ sani ka bɛn nyari nahiŋgu sɔɣira, o sani n-nyɛ sɔɣibu shee muɣisigu saha.

¹⁰Ninvuɣ’ shɛb’ bɛn zaa mi a yuli zaŋ bɛ tahima niŋla a ni; ka a mi bi zaɣisiri ninvuɣ’ shɛb’ bɛn jɛmdi nyin’ Yawɛ.

¹¹Yilimiya yila paɣi Yawɛ ŋun be Ziɔn ŋɔ! Yɛlimiya zuliya kam zaa o ni tum tuun’ kar’ shɛŋa yɛla!

¹²Dama ŋuna m-bɔhiri biɛri niriba ʒim yihibu zuɣu. O bi tamdi bɛn nyari nahiŋgu kumsi yɛla.

¹³Yawɛ, zom’ ma nambɔɣu! Nyam’ bɛn je ma ni chɛ ka n di wahala shɛŋa! Nyini n-nyɛ ŋun yihiri ma kum ni,

¹⁴ka lala zuɣu chɛ ka n tooi zani Ziɔn dunɔdaya ni n-yɛli n ni paɣir’ a shɛlikam zuɣu shɛm yɛla, n ni mali suhupiɛlli a ni tiligi ma la zuɣu.

¹⁵Zuliya shɛb’ gbi bɔɣili sɔŋ ŋ-ŋmaligi lu di ni; bɛmaŋmaŋ’ ni bari tɔn shɛli ŋmaligi gbahi ba.

¹⁶Yawɛ kahig’ omaŋ’ wuhi, o kari saria ka tuumbiɛrinim’ maŋmaŋ’ nuhi tuma leei zana ŋmaligi gbahi ba.

¹⁷Ninvuɣ’ biɛri mini zuliya shɛb’ bɛn zaa tam Naawuni yɛla ni ti chaŋ ti be kpiimba biɛhigu shee.

¹⁸Bɛ kul ku tam nandaamba yɛla sahakam; ka faranim’ tahima niŋbu mi kul ku kpalim yoli sahakam.

¹⁹Yawɛ, yiɣisim’ zani; di chɛ ka ninsalinim’ yaa gari a yaa! Chɛ ka zuliya kam ka a sanna ka a ti kari ba saria.

²⁰Yawɛ, chɛ ka dabiɛm gbahi ba! Chɛ ka zuliya kam baŋ ni bɛ kul nyɛla ninsalinima.