Read Dagbani Yila 90 Bible Online

Yila 90 - Dagbani bible

Yila 90

¹[93] Ti Duuma, nyini n-nyɛ ti ni pun be so sani ʒiɛmani kam ni hal ni pɔŋɔ.

²A ni daa na bi nam zoya bee a ni daa na bi nam tiŋgbani mini dunia ŋɔ, nyini n-daa nyɛ saha din ka bahigu Naawuni.

³A daa labisi ti taŋkpaɣu ni; ka yɛli, “Yinim’ daadamnima, labimiya taŋkpaɣu ni yaha!”

⁴ Yuun’ tuhili yi ti gari, di ŋmanila sɔhila a sani, bee ŋ-ŋmani kaman yuŋ saha biɛla yuusim.

⁵A chɛ ka daadamnim’ vuura kaman zahindi la. Bɛ lan ŋmanila mɔri din puhiri yirina asibaasi.

⁶Bɛ zoorimi kaman momaha la asibaasi; zaawuni ka bɛ ti zaɣi kpi.

⁷A sujee naai ti mi zaa; ka a suhuyiɣisili nyaŋ ti zaa.

⁸A zaŋla ti tuumbiɛri zal’ a tooni, ka ti ni tumdi alahichi shɛŋa ashilɔni yi n-do palɔni a ninni.

⁹Dama a suhuyiɣisili chɛmi ka ti dabisa garita; ti yuma kul naarimi kaman siɣimbu la.

¹⁰Ti nyɛviya dabisa nyɛla yuun’ pisopɔin, ka ti yi mali yaa, di ni niŋ yuun’ pihinii; amaa di yuma maa zaa tiri ti la wahala mini suhugarigu; ka di ku yuui ka di naai ka vuui.

¹¹Ŋuni n-lee mi a sujee yiko ni nyɛ shɛm? A suhuyiɣisili galisimi kaman bɛ ni lur’ a sizuura shɛli ni galisi shɛm.

¹²Dinzuɣu wuhim’ ti ka ti kaani ti dabisa, din ni chɛ ka ti niŋ yɛm ti suhuri ni.

¹³Yawɛ, bɔ saha ka di yɛn niŋ? Dim’ suɣilo. Zom’ a daba nambɔɣu.

¹⁴Wuhim’ ti a yurilim maŋli la asiba, din ni chɛ ka ti yili suhupiɛlli yila, ka ti suhuri piɛli ti dabisa zaa ni.

¹⁵Tim’ ti suhupiɛlli dabisi’ gbaliŋ kaman a ni daa chɛ ka ti nya suhugarigu shɛm, ka chɛ ka ti suhuri paligi yuun’ gbaliŋ kaman ti ni daa nya zaɣ’ biɛɣu shɛm.

¹⁶Chɛ ka a tuma yi zahira a daba sani; ka chɛ ka a jilima ŋɔ yi zahira bɛ bihi sani.

¹⁷Ti Duuma Naawuni, niŋm’ ti nirilim ka chɛ ka ti nuhi tuma tɔŋ. Iin, chɛ ka ti nuhi tuma tɔŋ!