Read Dagbani Ŋaha 10 Bible Online

Ŋaha 10 - Dagbani bible

Ŋaha 10

¹Bi’ so ŋun mali yɛm tir’ o ba suhupiɛlli, amaa bi’ so ŋun nyɛ jɛrigu tirila o ma suhusaɣiŋgu.

²Nir’ yi zaŋ ninvuɣ’ biɛtali soli bo n-nya buni, di ku niŋ anfaani, amaa wuntitali tiligiri nir’ kum ni.

³Yawɛ n-chɛ ka wuntizɔriba bi gbɛri kum, amaa o chɛ ka ninvuɣ’ biɛri bi nyari bɛ ni bɔri shɛli.

⁴Vinnyaɣili chɛ ka fara gbaari nira, amaa ka tuma tumbu viɛnyɛliŋga mi chɛ ka nir’ leeri bundana.

⁵Ninvuɣ’ so ŋun kpuɣi puu atam di kpuɣibu saha nyɛla yɛndana, amaa ninvuɣ’ so ŋun doya gbihiri atam kpuɣibu saha nyɛla vi dira.

⁶Alibarika be wuntizɔr’ ni, amaa duŋtaabo yɛtɔɣa m-be ninvuɣ’ biɛɣu noli ni.

⁷Wuntizɔra yɛla teebu mali alibarika. Amaa ninvuɣ’ biɛɣu ŋun’ yuli ni kpi.

⁸Ŋun mali yɛm o suhu ni n-doli zaligunima. Amaa jɛrigu ŋun mali yɛtɔɣ’ yoya ni bahi yoli.

⁹Ŋunkam doli yɛlimaŋli soli nyɛla ŋun yi barina ni. Amaa ŋun doli bilikɔnsi soli, o gbini ni vii.

¹⁰Ŋunkam kahind’ o tab’ nini nyɛla ŋun tahiri yɛla na, amaa ŋunkam mali suhukpeeni kpahiri niriba zuɣuri ni nyɛla ŋun tahiri suhudoo na.

¹¹Wuntizɔra noli nyɛla nyɛvili kɔbilinini. Amaa duŋtaabo yɛtɔɣa m-be ninvuɣ’ biɛɣu ŋun’ noli ni.

¹² Tab’ jɛlinsi nyɛla din tahiri zabili na, amaa yurilim limsiri taali balibu kam.

¹³Ninvuɣ’ so ŋun mali tɛhi’ zilima, o noli ni ka yɛm yɛtɔɣa yirina. Amaa ŋun ka yɛm yaaŋa deerila fiɛbiga.

¹⁴Yɛndana nyarila baŋsim pahira. Amaa jɛrigu yɛtɔɣ’ yoya tahirila saɣiŋgu na.

¹⁵Bundaannim’ buni n-nyɛ din guli ba, ka faranim’ fara bahiri ba yoli.

¹⁶Wuntizɔra laara nyɛla din tahir’ o nyɛvili shee, ka ninvuɣ’ biɛɣu nyɔri nyɛ din kpɛhir’ o alahichi ni.

¹⁷Ŋunkam deei saɣisigu nyɛla ŋun doli so’ shɛli din kuni nyɛvili shee, amaa ŋun zaɣisi zuɣu ni kpahibu nyɛla ŋun kpe yɔɣu.

¹⁸Ʒirilana nyɛla ŋun sɔɣiri jɛlinsi. Ka ŋunkam zuri niriba nyaaŋa nyɛ jɛrigu.

¹⁹Yɛtɔɣ’ gbaliŋ puuni ka alahichi yirina, amaa yɛndana nyɛla ŋun gbaar’ omaŋa ni yɛtɔɣa pam tɔɣisibu.

²⁰Ninvuɣ’ suŋ yɛtɔɣa ŋmanila anzinfa viɛlli, amaa ninvuɣ’ biɛɣu ŋun tɛha buchi bi yaɣi lala.

²¹Wuntizɔra yɛtɔɣa sɔŋdi niriba pam, amaa jɛra kpirila bɛ yɛm kalinsi zuɣu.

²²Yawɛ daalibarika chɛ ka nir’ leeri bundana, ka o bi zaŋdi suhugarigu pahiri di zuɣu.

²³Gala tumbu ŋmanila diɛma jɛrigu sani, amaa yɛm biɛhigu niŋdila tɛhi’ zilimalan’ nyaɣisim.

²⁴Ninvuɣ’ biɛri ni zɔri shɛli dina m-paari ba, amaa wuntizɔriba nyarila bɛ ni bɔri shɛli.

²⁵Sanʒiɛɣu yi ti ʒiɛra, ninvuɣ’ biɛri ku lan beni, amaa wuntizɔriba bɛn kul ni beni sahakam.

²⁶Kaman dam din miha ni to noli ni, ka nyɔhi biɛri nimbihi ni shɛm, lala ka vinnyaɣinim’ gba be bɛ tumalaannim’ sani.

²⁷Yawɛ zɔbu nyɛla din tiri nir’ nyɛvili wɔɣinli, amaa ninvuɣ’ biɛri bɛn’ yuma ni nyɛla biɛla.

²⁸Wuntizɔriba tahima niŋbu tahirila suhupiɛlli na, amaa ninvuɣ’ biɛri bɛn’ ku nya bɛ ni bɔri shɛli.

²⁹Yawɛ soli dolibu nyɛla gooni din mali kpiɔŋ bɛn biɛhigu be tibi sani, amaa di nyɛla din kuri ninvuɣ’ biɛri.

³⁰Wuntizɔriba bɛn’ kul ku vuui, amaa ninvuɣ’ biɛri ku kpalim tiŋgbɔŋ ŋɔ ni.

³¹Wuntizɔriba yɛtɔɣa nyɛla yɛm yɛtɔɣa, amaa ʒiŋmariba ʒiri ni zani tariga.

³²Wuntizɔriba mi yɛtɔɣ’ shɛŋa din niŋ kamaata yɛlibu, amaa ninvuɣ’ biɛri bɛn’ yɛtɔɣa kul nyɛla yɛtɔɣ’ kaha.