Read Dagbani Ŋaha 13 Bible Online

Ŋaha 13 - Dagbani bible

Ŋaha 13

¹Bi’ so ŋun mali yɛm, ŋuna n-deeri o ba saɣisigu, amaa ansarisimaana bi deeri zuɣu ni kpahibu.

²Ninvuɣ’ suma yɛtɔɣa puuni ka din viɛl’ yirina ka bɛ dira, amaa bibiɛhi suhuri yɛla zaɣ’ biɛɣu tumbu zuɣu.

³Ninvuɣ’ shɛb’ bɛn gbibi bɛ noya nyɛla bɛn tiligiri bɛ nyɛviya, amaa ninvuɣ’ shɛb’ bɛn bi gbibi bɛ noya nyɛla bɛn bahiri yoli.

⁴Vinnyaɣilana bi nyar’ o suhu ni bɔri binshɛŋa, amaa ŋun tumdi tuun’ kpɛma ŋun’ nyar’ o suhu ni bɔri shɛlikam zaa.

⁵Wuntizɔriba je ʒiri, amaa ninvuɣ’ biɛri bɛn’ tuma nyɛla vidibo mini filiŋ nyabu.

⁶Wuntitali nyɛla din guli ninvuɣ’ shɛb’ bɛn tumdi din tuhi, amaa alahichi nyɛla din bahiri ninvuɣ’ biɛri yoli.

⁷Ninvuɣ’ shɛb’ niŋdi kaman bɛ nyɛla bundaannima, amaa ka ka shɛli, ka shɛb’ mi niŋdi kaman bɛ nyɛla faranima, amaa ka mali buni pam.

⁸Buni nyɛla din taɣiri nir’ nyɛvili, amaa so bi varisiri faralana.

⁹Wuntizɔriba firilanim’ kul nɛmi, amaa ka ninvuɣ’ biɛri firilanim’ kpira.

¹⁰Turi tubu zuɣu ka bɛn bi wumdi yɛlimaŋli zabira, amaa ninvuɣ’ shɛb’ bɛn mali yɛm nyɛla bɛn deeri saɣisigu.

¹¹Nir’ yi bo n-nya azichi yomyom di dii bi nabira, amaa bɛn bɔri nyari li biɛlabiɛla, di nabirimi.

¹²Nir’ yi niŋ binshɛli tahima ka ti bi nya li, di damdila o suhu, amaa nir’ yi bɔri shɛli ka nya li, di nyɛla nyɛvili tia.

¹³Ninvuɣ’ shɛb’ bɛn ʒiɛm wuhibu ni bo bahiyoli ti bɛmaŋa, amaa bɛn tiri zaligu jilima ni nya laara.

¹⁴Yɛnnim’ wuhibu nyɛla nyɛvili kɔbiliga, di ni chɛ ka nir’ yi kum zana ni.

¹⁵Yɛm chɛ ka nir’ nyari jilima, amaa bɛn ka li soli nyɛla din bahiri ba yoli.

¹⁶Yɛndana niŋdila binshɛɣukam ni yɛm, amaa jɛrigu ŋun’ wuhirila jɛrilim palo ni.

¹⁷Tumo ŋun biɛ’ tahirila yɛla na, amaa tumo ŋun ʒe yim tahirila faako na.

¹⁸Ŋunkam zaɣisi wuhibu ni leei faralana ni vidira, amaa ŋun deeri wuhibu ni nya jilima.

¹⁹Nir’ yi nya o suhu ni bɔri shɛli, di nyaɣisila o sani, amaa nir’ yi chɛ zaɣ’ biɛɣu tumbu, di nyɛla din chihira jɛra sani.

²⁰Ŋunkam mini yɛnnim’ be leerila yɛndana, amaa ŋun mini jɛra be nyarila biɛrim.

²¹Ashaara doli alahichinima, amaa tɔŋbu n-nyɛ wuntizɔriba laara.

²²Ninvuɣ’ suma chɛri fali zaani bɛ yaansi, amaa alahichinim’ buni nyɛla wuntizɔriba ni ti yɛn su shɛli.

²³Nandan’ gbansɔɣu ni tooi niŋ bindirigu pam, amaa ka bɛn doli soli din bi tuhi fa li.

²⁴Ninvuɣ’ shɛb’ bɛn bi darigiri bɛ bihi tibili je ba mi, amaa ninvuɣ’ shɛb’ bɛn yuri bɛ bihi saɣisiri ba mi viɛnyɛliŋga.

²⁵Wuntizɔriba nyari bindirigu diri tiɣira, amaa ka kum mali ninvuɣ’ biɛri.