Read Dagbani Ŋaha 14 Bible Online

Ŋaha 14 - Dagbani bible

Ŋaha 14

¹Yɛm mɛrila o yili, amaa jɛrilim ŋun’ wurindila o yili.

²Ninvuɣ’ shɛb’ bɛn doli soli din tuhi nyɛla bɛn zɔri Yawɛ, amaa ninvuɣ’ shɛb’ bɛn mali biɛriyoli ʒiɛmd’ o mi.

³Jɛra yɛtɔɣa nyɛla fiɛbiga n-fiɛbiri bɛ yaansi zuɣu, amaa yɛnnim’ yɛtɔɣa n-gbibi ba.

⁴Naɣikɔra yi ka luɣ’ shɛli, bindirigu gba kani, naɣikɔra yaa puuni ka bindirigu pam yirina.

⁵Shɛhiralan’ ŋun ʒe yim bi ŋmari ʒiri, amaa ʒiri shɛhiralan’ ŋun’ kul tuhirila ʒiri bahira.

⁶Ansarisimaana bɔrila yɛm kɔŋda, amaa baŋsim yɛla bi to ŋun mali tɛhi’ zilima sani.

⁷Zom’ jɛrigu sani, dama a ku nya baŋsim yɛtɔɣa nimaani.

⁸Yɛnnim’ yɛm n-chɛ ka bɛ mi bɛ ni chani luɣ’ shɛli, amaa jɛra bɛn’ jɛrilim kpɛhiri ba la yɔɣu.

⁹Jɛra maanila alahichi sanyoo sara maligu ansarisi, amaa Naawuni niŋdi wuntizɔriba nirilim.

¹⁰Suhu m-mi biɛrim shɛli din be di ni, ka di mini zino ku tooi laɣim mali di suhupiɛlli.

¹¹Ninvuɣ’ biɛɣu yili ni wurim, amaa ninvuɣ’ suŋ ŋun’ suɣili kul ni ʒiɛya.

¹² So’ shɛli beni ŋ-ŋmani din tuhi nir’ sani, amaa ka di bahigu ti nyɛla kum.

¹³Hal lari puuni suhugarigu beni, ka suhupiɛlli bahigu mi nyɛ suhusaɣiŋgu.

¹⁴Ninvuɣ’ shɛb’ bɛn bi ʒe yim ni nya bɛ laara kaman bɛ tuma ni simdi shɛm, ka ninvuɣ’ suma nya bɛ laara kaman bɛ tuma ni simdi shɛm.

¹⁵Bɛn tɛha bi zilima bɛn’ kul niŋdila binshɛɣukam yɛda, amaa yɛnnim’ bɛn’ kpahindila yɛla ni chani shɛm.

¹⁶Yɛnnim’ gbaarila bɛmaŋa n-yiri zaɣ’ biɛɣu ni, amaa jɛra bɛn’ baɣa kani, ka bi gbaari bɛmaŋa.

¹⁷Suhuyiɣisililana tumdila jɛrilim, ka yɛndan’ mi nyɛ ŋun be baalim.

¹⁸Bɛ zaŋdila jɛrilim n-dihi bɛn tɛha bi zilima nachiinsi, amaa baŋsim n-nyɛ yɛnnim’ zuɣupila.

¹⁹Tuumbiɛtumdiba ni ti gbani ninvuɣ’ suma tooni, ka ninvuɣ’ biɛri ti baɣi wuntizɔriba dunɔdaya.

²⁰Hal nandaamba ʒiʒiinitab’ je ba, amaa bundaannim’ bɛn’ mali zɔnim’ pam.

²¹Bɛn lihi ʒiɛm bɛ ʒiʒiinitaba nyɛla alahichinima, amaa ninvuɣ’ so ŋun niŋ nandana nirilim mali alibarika.

²²Ninvuɣ’ shɛb’ bɛn lɔri nia biɛɣu birigiya, amaa ninvuɣ’ shɛb’ bɛn nia viɛla nyari jilima mini ʒiɛyimtali niriba sani.

²³Tuuni kam tumbu mali nyɔri, amaa yɛtɔɣa tɔɣisibu kɔŋko nyɛla din tahiri fara na.

²⁴Yɛnnim’ yɛm n-nyɛ bɛ zuɣupila, amaa jɛrilim n-nyɛ jɛra dolibi.

²⁵Yɛlimaŋli shɛhiralana nyɛla ŋun tiligiri nyɛviya, amaa ŋun ŋmari ʒiri ŋun’ nyɛla nyaanyira.

²⁶Yawɛ zɔbu puuni ka nir’ niŋdi naani din mali kpiɔŋ, ka o bihi nyari sɔɣisili shee.

²⁷Yawɛ zɔbu nyɛla nyɛvili kɔbilinini din ni chɛ ka nir’ yi kum zana ni.

²⁸Niriba pam n-nyɛ naa jilima, amaa niriba yi kani, naa pala shɛli.

²⁹Ninvuɣ’ so ŋun suhu bi yiɣisiri yomyom nyɛla tɛhi’ zilimalana, amaa ninvuɣ’ so ŋun suhu yiɣisiri yomyom kpaŋsirila jɛrilim.

³⁰Suhudoo tirila ninsal’ niŋgbuŋ nyɛvili, amaa kɔr’ yoya chɔɣisirila nir’ kɔba ni.

³¹Ninvuɣ’ shɛb’ bɛn niŋdi nandaamba alaka nyɛla bɛn turi ŋun nam ba, amaa ninvuɣ’ shɛb’ bɛn niŋdi nandaamba nirilim tir’ o la jilima.

³²Ninvuɣ’ biɛri tuumbiɛri n-luhiri ba, amaa wuntizɔriba nyari kpɛhili shee bɛ biɛrisuntali zuɣu.

³³Yɛm mali biɛhigu shee ninvuɣ’ shɛb’ bɛn mali tɛhi’ zilima tɛha ni, amaa di ka jɛra bɛn’ suhuri ni.

³⁴Wuntitali nyɛla din tibigiri zuliya, amaa alahichi nyɛla din dihiri niriba vi.

³⁵Kpambal’ so ŋun mali yɛm, ŋuna ka naa yura, amaa kpambal’ so ŋun tumdi vi tuma, o suhu yiɣisirimi bahir’ o zuɣu.