Read Dagbani Ŋaha 15 Bible Online

Ŋaha 15 - Dagbani bible

Ŋaha 15

¹Zilim’ balli maari suhuyiɣisili, amaa yɛtɔɣ’ yoli yiɣisirila nir’ suhu.

²Yɛndan’ tɔɣisirila baŋsim yɛtɔɣa, amaa jɛrilim n-yiri jɛra noya ni na.

³Yawɛ nina kul bela luɣilikam, ka o yuuni ninvuɣ’ biɛri mini ninvuɣ’ suma.

⁴Zilim’ balli nyɛla nyɛvili tia, amaa yɔhiŋ yɛtɔɣa nyɛla din chɛ ka nir’ suhu saɣinda.

⁵Jɛrigu n-zaɣisir’ o ba ni wuh’ o shɛli, amaa ŋunkam deeri saɣisigu nyɛla ŋun mali yɛm.

⁶Buni palila wuntizɔriba yinsi, amaa ashaara kul lurila ninvuɣ’ biɛri nyamma zuɣu.

⁷Yɛndana tɔɣisirila baŋsim yɛtɔɣa, jɛra bɛn’ tɛha puuni pa lala n-nyɛ li.

⁸Ninvuɣ’ biɛri sara maligu nyɛla din chihiri Yawɛ sani, amaa ninvuɣ’ shɛb’ bɛn tumdi din tuhi suhigu nyɛla din tiɣir’ o nini.

⁹Ninvuɣ’ biɛri soli nyɛla din chihiri Yawɛ sani, amaa o yuri ninvuɣ’ so ŋun doli wuntitali soli.

¹⁰Ŋun chɛ soli bahi ni ti nya tibidarigibo pam, ka ŋunkam mi je ni bɛ kpah’ o zuɣu ni ni kpi.

¹¹Kpiimba biɛhigu shee mini chiyaama buɣim kul dola palɔni Yawɛ sani, ka wula ka ninsalinim’ suhuri ni yɛla ku do palo ni o sani.

¹²Ansarisimaaniba je ni so kpahi bɛ zuɣuri ni; bɛ ku chaŋ yɛnnim’ sani.

¹³Suhupiɛlli nyɛla din chɛ ka nir’ lara, amaa suhugarigu nyɛla din chɛ ka nandahima mali nira.

¹⁴Ninvuɣ’ so ŋun mali tɛhi’ zilima suhu yɛla baŋsim zuɣu, amaa jɛrilim m-be jɛra noya ni.

¹⁵Nandaamba bɛn’ dabisa zaa nyɛla wahala dabisa, amaa bɛn suhuri piɛla kul puhirila chuɣu sahakam.

¹⁶Nir’ yi mali biɛla ka zɔri Yawɛ, di so ni nir’ mali buni pam ka di mal’ o muɣisigu.

¹⁷Niriba yi diri ʒiɛvari kɔŋko ka mali yurilim ni taba, di so ni niriba ŋubiri naɣ’ kpaba ka je taba.

¹⁸Suhuyiɣisilinim’ tahirila zabili na, amaa bɛn suhuri bi yiɣisiri yomyom goorila zabili.

¹⁹Vinnyaɣilana soli zuɣu kul zibigila gɔhi, amaa ŋun tumdi din tuhi soli nyɛla solɔɣu.

²⁰Bi’ so ŋun mali yɛm tir’ o ba suhupiɛlli, amaa jɛra ʒiɛmdila bɛ manima.

²¹Jɛrilim tuma tirila ŋun ka yɛm suhupiɛlli, amaa ŋun mali tɛhi’ zilima ŋun’ tumdila din tuhi.

²²Saawara niŋbu yi kani, nia lɔbu bi paana, amaa saawaranim’ pam yi beni, bɛ dirila nasara.

²³Nir’ yi garigi bɔhigu viɛnyɛla di nyɛla suhupiɛlli nir’ kam sani. Ka nir’ yi tɔɣisi yɛtɔɣa di tɔɣisibu saha, di viɛla.

²⁴Yɛnnim’ bɛn’ sani, nyɛvili soli durila zuɣusaa din ni chɛ ka bɛ ku siɣi tiŋgban’ ni kpiimba biɛhigu shee.

²⁵Yawɛ wurindi karimbaandan’ yili, amaa ka guli pakoli tiŋgbani tarisi.

²⁶Nia biɛri nyɛla din chihiri Yawɛ sani, amaa wuntizɔriba yɛtɔɣa nyɛla din viɛla.

²⁷Bɛn diri zalinsi nyɛla bɛn bɔri yɛla tiri bɛ yiŋnima, amaa bɛn je birapu dibu ni be.

²⁸Wuntizɔra tɛhirila o ni yɛn garigi shɛm, amaa ninvuɣ’ biɛɣu ŋun’ noli ni zaɣ’ biɛɣu n-yirina.

²⁹Yawɛ be katiŋ’ ka chɛ ninvuɣ’ biɛri, amaa o deeri wuntizɔriba suhigu.

³⁰Nina neesim chɛ ka nir’ suhu piɛla, ka lahibali viɛlli tiri niŋgbuŋ alaafee.

³¹Nir’ yi gbilisi tibili wum saɣisigu viɛnyɛliŋga, bɛ ni kal’ o pahi yɛnnim’ ni.

³²Bɛnkam zaŋ bɛ ni wuhi ba shɛli niŋ bɛ baɣaka ʒiɛmdila bɛmaŋa, amaa bɛn wum saɣisigu ni nya tɛhi’ zilima.

³³Yawɛ zɔbu nyɛla yɛm wuhibu ni be shɛli ni, ka maŋsiɣisibu be tooni ka jilima doli.