Read Dagbani Ŋaha 17 Bible Online

Ŋaha 17 - Dagbani bible

Ŋaha 17

¹Nir’ yi ŋubiri ka’ kuma ka mali suhudoo, di so yil’ shɛli nim’ bɛn diri bindir’ nyaɣisa ka zabili be di yili maa ni.

²Dabili ŋun mali yɛm ni ti su bidɔɣiro ŋun tumdi vi tuma, ka ni ti di fali kaman daŋ ni nir’ la.

³Duɣu ka bɛ mali buɣisiri anzinfa, ka zaŋdi buɣim pam buɣisiri salima, amaa Yawɛ m-buɣisiri ninsal’ suhu.

⁴Tuumbiɛtumda gbilisiri tibili wumdi ninvuɣ’ biɛɣu yɛtɔɣa, ka ʒiŋmara mi gbilisiri tibili wumdi yɛtɔɣ’ biɛri.

⁵Bɛnkam maani nandaamba ansarisi turila ŋun nam ba. Ka bɛnkam mali suhupiɛlli bɛ tab’ daashaara zuɣu ni nya tibidarigibo.

⁶Yaansi nyɛla ninkura jilima zuɣupiligu; ka bihi mi jilima nyɛ bɛ laamba.

⁷Yɛtɔɣ’ viɛla tɔɣisibu bi mili jɛrigu, ka ʒiri gba yɛtɔɣa bi simdi nabia.

⁸Birapu tibu ŋmanila tim bɛn tiri li sani, bɛ yi kul chaŋ luɣilikam bɛ dirila nasara.

⁹Ŋunkam chɛri ŋun turi niriba taali paŋd’ o nyɛla ŋun bɔri zɔtali, amaa ŋunkam teeri zabili nyɛla ŋun saɣindi zɔtali.

¹⁰Saɣisigu kpɛri ninvuɣ’ so ŋun mali tɛhi’ zilima pam n-gari bɛ fiɛbi jɛrigu fiɛbiga bukɔbiga.

¹¹Ninvuɣ’ biɛri kul bɔrila duŋtaabo, amaa bɛ ni tim tumo ŋun nyɛ putɔɣulana ka o lu bɛ zuɣu.

¹²Bɛ yi gbaai jɛŋgbin’ nyaŋ bia ka chɛ o ka o chirig’ a, di so ni a zaŋ a nyɔɣu yo jɛrigu o jɛrilim tuma saha.

¹³Nir’ yi zaŋ zaɣ’ biɛɣu yo zaɣ’ viɛlli samli, zaɣ’ biɛɣu ku milig’ o yiŋa.

¹⁴Zabili piligu ŋmanila bɛ ni yi cheei kom bahi la, dinzuɣu zom’ yi zabili ni ka di na bi piligi.

¹⁵Ŋunkam ti ninvuɣ’ biɛɣu yɛlimaŋli mini ŋunkam galim wuntizɔra, di zaa nyɛla din chihiri Yawɛ sani.

¹⁶Bɔzuɣu ka jɛra gbibi liɣiri ni bɛ da yɛm, ka lee nyɛ bɛn ka yɛm din ni tooi bɔhim?

¹⁷A zo nyɛla ŋun yur’ a sahakam, ka mabihi mi nyɛ bɛ ni dɔɣi shɛba ni bɛ sɔŋdi taba ashaara saha.

¹⁸Ninvuɣ’ so ŋun ka yɛm n-ni saɣi po pɔri n-zan’ o kpee nyaaŋa ni o di samli.

¹⁹Ŋunkam yuri zabili nyɛla ŋun yuri alahichi. Ŋun me dunɔbia din du pam nyɛla ŋun bɔri kɔb’ kaba.

²⁰Ninvuɣ’ so ŋun suhu bi ʒe yim ku tɔŋ. Ka ŋunkam ŋmari ʒiri kul bela barina ni.

²¹Ŋun dɔɣi jɛrigu nya yɛla; jɛrigu ba ka suhupiɛlli.

²²Suhupiɛlli nyɛla tila’ suŋ, amaa suhugarigu din’ nyɛla din kuuri kɔba.

²³Ninvuɣ’ biɛɣu deeri birapu ashilɔni ni di chɛ ka o taɣi zaligu soya.

²⁴Ŋun mali tɛha yuuni bɔrila yɛm, amaa jɛrigu ŋun kul lihirila dunia luɣilikam.

²⁵Bihi bɛn nyɛ jɛra tirila bɛ banim’ suhugarigu, ka tiri bɛ ma ŋun dɔɣi ba biɛrim.

²⁶Di bi tu ni bɛ zali ŋun ka taali samli bee ka bɛ fiɛbi kpambaliba bɛ biɛrisuŋ zuɣu.

²⁷Ninvuɣ’ so ŋun bi tɔɣisiri yɛtɔɣa yiriŋ nyɛla ŋun mali baŋsim, ka ninvuɣ’ so ŋun mali suɣilo nyɛ ŋun mali tɛhi’ zilima.

²⁸Hal jɛra bɛn fo n-ʒiya, bɛ ni boli ba yɛnnima, bɛ yi bi yaai bɛ noya bɛ ni kali ba pahi yɛnnima ni.