Read Dagbani Ŋaha 18 Bible Online

Ŋaha 18 - Dagbani bible

Ŋaha 18

¹Ninvuɣ’ so ŋun be o ko nyɛla ŋun kul niŋd’ o ni bɔri shɛli, ka o nini bi tiɣiri shɛb’ ni tumdi din tuhi ka di viɛli shɛm.

²Jɛrigu bi bɔri tɛhi’ zilima, amaa ka naɣ’ wuhirila omaŋmaŋ’ tɛha ni nyɛ shɛm.

³Ninvuɣ’ biɛtali ni be shɛli, naŋgbankpeeni gba bela nimaani. Ka jilima tibu yi ka shɛli, filiŋ bela nimaani.

⁴Ninsal’ noli ni yɛtɔɣa nyɛla kom din zilima, ka yɛm kɔbilinini nyɛ kulibɔŋ kom din zɔra.

⁵Di bi tuhi ni a zani ninvuɣ’ biɛɣu nyaaŋa saria karibu ni, ka mɔŋ ŋun ka taali yɛlimaŋli saria karibu ni.

⁶Jɛrigu yɛtɔɣa tahirila zabili na, ka jɛrigu noli ni yɛtɔɣa lan bɔri buri tir’ o.

⁷Jɛra noli ni yɛtɔɣa n-saɣindi ba, ka bɛ noli ni yɛtɔɣa nyɛ zana din gbahiri bɛmaŋmaŋa.

⁸Tikub’ yɛtɔɣa ŋmanila saɣibɔri’ nyaɣisa; di kul chanimi ti dooni niŋgbina ni.

⁹Vinnyaɣilan’ mabia n-nyɛ bukaata saɣinda.

¹⁰Yawɛ yuli nyɛla din du pam ka mali yaa, ka wuntizɔriba zɔri kpɛri di ni tiligira.

¹¹Bundaannim’ buni n-nyɛ bɛ fɔntin’ titali din mali yaa, ka bɛ tɛhi ni di nyɛla goon’ shɛli din du pam.

¹²Nir’ suhu ni karimbaani n-tahir’ o saɣiŋgu na, amaa maŋsiɣisibu m-be tooni ka jilima doli.

¹³Nir’ yi na bi wum yɛtɔɣili bahigu ka daŋ garigibu, di nyɛla jɛrilim mini vi.

¹⁴Ninsal’ shia yi mali yaa di deeri dɔro, amaa nira kɔba ni yi chɔɣisi, ŋuni n-leei ni tooi gbibi li?

¹⁵Ninvuɣ’ so ŋun mali yɛm kul bɔhindila baŋsim pahira, ka yɛnnim’ tiba kul bɔri ni di wumdi baŋsim yɛtɔɣa.

¹⁶Pini nyɛla din maani soli tiri nira, di nyɛla din chɛ ka nir’ tooi nyari ninvuɣ’ wɔɣira.

¹⁷Nir’ yi daŋ tooni ti tɔɣisi yɛtɔɣa o malila yɛlimaŋli, faashee o mini ŋun mali taba maa ti kana ti bɔh’ o bɔhigunima.

¹⁸Kuɣa pihi sɔŋ lihi nya nyɛla din ŋmaari naŋgbankpeeni, ka lan nyɛ din maani wɔɣira ayi bɛn mali taba yɛla.

¹⁹Mabi’ so bɛ ni tum taali mali yaa gari fɔntiŋ’ din nyɛ zaɣ’ titali, ka lala zabili ŋmanila dapua din kpari birini dunoli.

²⁰Ninsal’ noli ni yɛtɔɣa puuni ka o puli paana, o noli ni yɛtɔɣa puuni ka o lan tiɣira.

²¹Kum mini nyɛvili bela zilinli yiko ni, ka bɛn yuri li ni di di nyɔri.

²²Ŋunkam kpuɣi paɣa nya binsuŋ, ka nya nirilim niŋbu Yawɛ sani.

²³Faralan’ tɔɣisirila yɛtɔɣa ni sizuura lubu, amaa bundan’ ŋun kul tuhirimi bahira.

²⁴Zɔnim’ shɛb’ zaŋla zɔtali yɛla niŋ asahi, amaa zɔ’ maŋli so beni gari nir’ mabia gba.