Read Dagbani Ŋaha 2 Bible Online

Ŋaha 2 - Dagbani bible

Ŋaha 2

¹M bia, a yi deei n yɛligu, ka doli n zaligunim’ din be a suhu ni,

²ka gbilisiri tibili viɛnyɛliŋga n-wumdi yɛm yɛtɔɣa, ka zaŋ a suhu niŋ baŋsim yɛtɔɣa ni,

³a yi shiri bo yɛm, ka moog’ a nini bahi tɛhi’ zilima zuɣu,

⁴a yi bo li kaman anzinfa la, ka bo li ni nimmoo kaman azichi shɛli din sɔɣi la,

⁵dindina a ni baŋ Yawɛ zɔbu ni nyɛ shɛm, ka nya baŋsim din nyɛ Naawuni dini.

⁶Dama Yawɛ n-tiri yɛm. O noli ni ka baŋsim mini yɛla baŋbu yirina.

⁷O zaŋ yɛm din nyɛ yɛlimaŋli yɛm zali wuntizɔriba, ka leei nyɔtaɣirigu gu ninvuɣ’ shɛb’ bɛn ka galimi.

⁸O guli ninvuɣ’ shɛb’ bɛn doli zaligu soli, ka taɣiri ninvuɣ’ shɛb’ bɛn ʒe o yim barina ni.

⁹Di saha yi ni baŋ wuntitali mini zaligu soli ni biɛrisuntali ni so’ viɛlli kam.

¹⁰Dama yɛm ni ka a suhu ni na, ka baŋsim niŋ a nyaɣisim.

¹¹Yɛm ni ti gul’ a, ka yɛla baŋbu gba taɣ’ a.

¹²Di ni tilig’ a zaɣ’ biɛɣu ni, ka tilig’ a ninvuɣ’ shɛb’ bɛn tɔɣisiri yɛtɔɣ’ biɛri nuu ni,

¹³ka tilig’ a ninvuɣ’ shɛb’ bɛn zaɣisi wuntitali soya dolibu ka dolila zibisim soya la,

¹⁴bɛn mali suhupiɛlli zaɣ’ biɛɣu tumbu ni ka lan mali suhupiɛlli yɛtɔɣ’ biɛri tɔɣisibu ni la nuu ni.

¹⁵Di ni lan tilig’ a ninvuɣ’ shɛb’ bɛn soya golim ka bɛ biɛhigu bi tuhi nuu ni.

¹⁶A ni tiligi pagɔrili ŋun nyɛ zinalana naŋgbammalisim ni,

¹⁷ŋun daa chɛ o yidaan’ tuuli, ka tam o ni daa lo Naawuni alikauli shɛli yɛla la.

¹⁸Dama o soli nyɛla din kuni kum shee, ka o soya kuni kpiimba biɛhigu shee.

¹⁹Bɛnkam chaŋ o sani bi lan labina bee n-lan nya nyɛvili soli.

²⁰Dinzuɣu doli ninvuɣ’ suma soli, ka doli wuntizɔriba soli.

²¹Dama ninvuɣ’ suma n-nyɛ bɛn ni ti be tiŋgbɔŋ maa ni, ka ninvuɣ’ shɛb’ bɛn ka taali nyɛ bɛn ni ti kpalim be tiŋgbɔŋ maa ni.

²²Amaa bɛ ni ti ku ninvuɣ’ biɛri la tiŋgbɔŋ maa ni, ka darigi yihi bɛn bi ʒe yim di ni.