Read Dagbani Ŋaha 23 Bible Online

Ŋaha 23 - Dagbani bible

Ŋaha 23

¹A mini naa yi ʒini ni yi di bindirigu, nyin’ kpahimmi baŋ din ʒe a tooni maa ni nyɛ shɛli.

²A suhu yi ye bindirigu maa dibu zuɣu, nyin’ gbaam’ amaŋa.

³Miri ka a chɛ ka a suhu ye naa bindir’ nyaɣisa zuɣu, dama di nyɛla yɔhiŋ bindira.

⁴Miri ka a nahind’ amaŋa buni nyabu zuɣu, niŋmi yɛm din ni chɛ ka a yi di yɛla ni.

⁵A nini ti yɛn nya li la, ka di chaŋ; dama yim ka di yɛn bili kpiŋkpama yiɣi kpe zuɣusaa kaman tɔrili la.

⁶Miri ka a di zunyuŋnim’ bindira bee n-chɛ ka a kɔre kpe di ni di nyaɣisim zuɣu;

⁷dama kaman zabigu ni zaani lɔŋni shɛm la, lala n-nyɛ ba. Bɛ ni yɛl’ a, “Dim’ ka nyu.” amaa di bi paai bɛ puu ni.

⁸A ni di biɛla shɛli maa, a ni ti li bahi, ka a yɛtɔɣ’ viɛla bahi yoli.

⁹Miri ka a di jɛrigu alizama, o ni lihi ʒiɛm a yɛm yɛtɔɣa maa.

¹⁰Miri ka a vuɣi tintariga kpaa din daa pun beni kurimbuni ha bee n-fa kpibisi palo,

¹¹dama bɛ tiligira nyɛla ŋun mali yaa. O ni zab’ bɛ zuɣu.

¹²Chɛ ka a baɣa be wuhibu ni, ka gbilisi tibili wum baŋsim yɛtɔɣa.

¹³Miri ka a chɛ a bihi tibili darigibu. A yi fiɛb’ ba fiɛbiga, bɛ ku kpi.

¹⁴A yi fiɛb’ ba fiɛbiga, a ni tiligi bɛ nyɛviya ka bɛ ku chaŋ kpiimba biɛhigu shee.

¹⁵M bia, a yi mali yɛm, n suhu ni piɛla.

¹⁶A yi tɔɣisiri yɛlimaŋli yɛtɔɣa, di ni niŋ ma nyaɣisim.

¹⁷Miri ka a zabiri alahichinim’ nyuli, amaa kul jɛmmila Yawɛ.

¹⁸Biɛhiŋ kani, a mali dahin’ shɛli biɛhigu tahima, ka a tahima maa ni niŋ pali.

¹⁹M bia, wumma, niŋmi yɛm, ka niŋ tɛha niŋ a suhu ni zaŋ chaŋ a biɛhigu polo.

²⁰Miri ka a zaŋ amaŋ’ pahi ninvuɣ’ shɛb’ bɛn nyuri wain pam zuɣu bee n-zaŋ amaŋ’ pahi ninvuɣ’ shɛb’ bɛn suhuri ye nimdi ŋubbu zuɣu;

²¹dama bɛn nyuri dam kuuna mini pulaannim’ ni leei faranima; ka bɛ gɔ’ gbihibo nyɛ din ni chɛ ka bɛ chaŋ gbinfini.

²²Wumm’ a ba ŋun dɔɣ’ a yɛligu. Miri ka a ʒiɛm a ma o yi ti kurigi.

²³Dam’ yɛlimaŋli mini yɛm ni wuhibu ni baŋsim, ka miri ka a zaŋ li kɔhi.

²⁴Wuntizɔra ba ni mali suhupiɛlli pam; ŋunkam dɔɣi bi’ so ŋun mali yɛm ni mali suhupiɛlli o zuɣu.

²⁵Chɛ ka a ba min’ a ma mali suhupiɛlli; chɛ ka paɣ’ ŋun dɔɣ’ a mali suhupiɛlli.

²⁶M bia, zaŋm’ a suhu ti ma, ka kpahim m biɛhigu;

²⁷dama pagɔrili ŋmanila bɔɣ’ zilinli, paɣ’ zinalan’ ŋmanila kɔbil’ muɣiliŋga.

²⁸O sɔɣimi doya gu kaman ŋmɛnditol’ la, ka chɛ ka niriba pam bi ʒe yim.

²⁹Ninvuɣ’ banim’ biɛhigu n-lee nyɛ mbusim? Ninvuɣ’ banima n-lee mali suhugarigu? Ninvuɣ’ banima n-lee bɔri zabili? Ninvuɣ’ banima n-lee mali yɛtɔɣ’ bihi? Ninvuɣ’ banima n-lee mali dansi ka di ka daliri? Ninvuɣ’ banima n-lee mali nin’ ʒiɛri?

³⁰Bɛna n-nyɛ bɛn ʒiini nyuri wain yuura ni binnyuri kpɛma balibubalibu.

³¹Wain yi ti mɔha, ka be pipia ni kpeera, ka yiɣiri lɛbira, nyin’ di lihi li.

³²Di bahigu ti ŋmanila wɔɣ’ dimli, ka dimda kaman gariŋga la.

³³A nina ni nya alahiziba binyara, ka a tɛha yɛtɔɣa gabi.

³⁴A ni ti ŋmanila ninvuɣ’ so ŋun do teeku sunsuuni, ka ŋmani ŋun do ŋariŋ puuni daantaliga zuɣu.

³⁵A ni ti yɛli, “Bɛ ŋme ma, amaa m bi nya daŋa. Bɛ bu ma, amaa di bi biɛra. Bɔ saha ka n nini yɛn neei? N lan bɔrila wain ni n nyu.”