Read Dagbani Ŋaha 28 Bible Online

Ŋaha 28 - Dagbani bible

Ŋaha 28

¹Ninvuɣ’ biɛri kul zɔrimi hal so yi bi kariti doli ba, amaa wuntizɔriba bɛn’ kul malila suhukpeeni kaman gbuɣinli la.

²Tiŋgbɔn shɛli din niriba taari duŋ, di malila zuɣulaan’ bɔbigu, amaa zuɣulaan’ so ŋun mali yɛm yi dira, binshɛlikam niŋdila viɛnyɛliŋga yuui.

³Tarim’ so ŋun nahind’ o tarim’ taba ŋmanila sa’ so ŋun mi n-ʒi bindira zaa chaŋ.

⁴Ninvuɣ’ shɛb’ bɛn bi doli zaligu paɣirila ninvuɣ’ biɛri, amaa ninvuɣ’ shɛb’ bɛn doli zaligu mini ba bi tuhira.

⁵Ninvuɣ’ biɛri bi mi din niŋ kamaata, amaa ninvuɣ’ shɛb’ bɛn jɛmdi Yawɛ bɛn’ mi li viɛnyɛliŋga.

⁶Nir’ yi nyɛ faralana ka o biɛhigu be tibi, di so ni o nyɛ bundana ka nyɛ bilikɔɣino o tuma ni.

⁷Bi’ shɛb’ bɛn doli zaligu nyɛla bɛn mali yɛm. Amaa bi’ shɛb’ bɛn zaŋ bɛmaŋ’ pahi pulaannim’ zuɣu nyɛla bɛn dihiri bɛ banim’ mini bɛ manim’ vi.

⁸Ninvuɣ’ so ŋun niŋ o kɔhimma nyɔri ti yaɣi ni o nya buni pam, o bɔri li zaanila ninvuɣ’ so ŋun niŋdi nandaamba nirilim.

⁹Nir’ yi zaɣisi zaligu dolibu, hal dilan’ wunsuhigu nyɛla din chihira.

¹⁰Ninvuɣ’ shɛb’ bɛn yɔhim wuntizɔriba kpɛhi zaɣ’ biɛɣu ni ni ti lu bɛmaŋmaŋ’ ni gbi bɔɣ’ shɛŋa ni. Amaa ninvuɣ’ shɛb’ bɛn ka galimi ni ti nya laara din viɛla.

¹¹Bundana tɛhiya ni o mali yɛm omaŋ’ duhibu ni, amaa faralan’ ŋun mali fahim ni nya li o biɛhigu ni.

¹²Wuntizɔriba yi di nasara, niriba malila suhupiɛlli pam, amaa ninvuɣ’ biɛri yi di nasara, niriba sɔɣirimi.

¹³Ŋunkam sɔɣi zaɣ’ biɛɣu ku tɔŋ, amaa ŋunkam yihi li palɔni, ka zaɣisi li ni nya nambɔzɔbo.

¹⁴Ninvuɣ’ so ŋun zɔri Yawɛ sahakam mali alibarika, amaa ninvuɣ’ so ŋun suhu kpɛma ni nya mbusim.

¹⁵Na’ so ŋun nyɛ putɔɣulana yi su tarimba, o ŋmanila gbuɣinli ŋun ŋumda bee jɛŋgbini ŋun yiɣina ni o gbaai so.

¹⁶Na’ so ŋun ka tɛhi’ zilima nyɛla putɔɣulana ŋun niŋdi niriba fitiina, amaa ninvuɣ’ so ŋun je zalinsi bini ni mali nyɛvili wɔɣinli.

¹⁷Ninvuɣ’ so yi ku o kpee, yin’ chɛ ka ŋun ku o kpee maa kul dari ginda hal ti kpi; ka di chɛliya ka so sɔŋ o.

¹⁸Ŋun doli yɛlimaŋli soli ni tiligi, amaa ŋun doli bilikɔnsi soli ni ti lu bɔɣili ni.

¹⁹Ŋun kɔra, o ni mali bindirigu pam, amaa ŋun doli binshɛŋa din ka buchi, fara ni gbaag’ o pam.

²⁰Ninvuɣ’ shɛb’ bɛn ʒe yim ni nya alibarika pam, amaa ninvuɣ’ so ŋun bɔri ni o nya buni yomyom ku yi tibidarigibo ni.

²¹Niriba gaŋbu bi viɛla, amaa bindirigu biɛla zuɣu ni tooi chɛ ka nir’ tum gala.

²²Shimilan’ bɔri ni o nyala buni yomyom, ka bi mi ni ashaara nyɛla din yɛn kana ka biɛhiŋ kani.

²³Ŋunkam kpahi nir’ zuɣu ni, di nyaaŋa o ni nya yurilim dilan’ sani n-gari ninvuɣ’ so ŋun zaŋ naŋgbammalisim yɛtɔɣa tɔɣis’ o.

²⁴Ŋunkam zu o ba bee o ma binshɛli ka yɛli ni di pala zaɣ’ biɛɣu, dilan’ nyɛla ŋun pahi ninvuɣ’ kuriba ni.

²⁵Diribarilimlan’ nyɛla ŋun bɔri zabili, amaa ŋunkam niŋ Yawɛ naani ni tɔŋ.

²⁶Ninvuɣ’ shɛb’ bɛn nini tiɣi bɛmaŋmaŋ’ yɛm nyɛla jɛra, amaa ninvuɣ’ shɛb’ bɛn doli yɛm soli ni yi barina ni.

²⁷Ŋunkam tiri nandaamba pini, shɛli ku poog’ o, amaa ŋunkam lab’ o nini kpaŋa, noli ni di o.

²⁸Ninvuɣ’ biɛri yi di nasara, niriba zɔrimi sɔɣira, amaa bɛ yi ti lan kani, wuntizɔriba zoorimi pahi.