Read Dagbani Ŋaha 29 Bible Online

Ŋaha 29 - Dagbani bible

Ŋaha 29

¹Bɛ yi kul saɣisiri nira, ka o kul niŋdi tipawumli, o ni ti kabisi yim ka ku lan tooi tib’ kpaŋ.

²Wuntizɔriba yi diri nam, niriba malila suhupiɛlli, amaa ninvuɣ’ biɛri yi su fukumsi, niriba fabindimi.

³Bi’ so ŋun bɔri yɛm, o tirila o ba bee o ma suhupiɛlli, amaa ŋun doli pagɔra ni bahi o buni yoli.

⁴Na’ so ŋun doli zaligu soli, o tiŋ’ ni mali suhudoo, amaa na’ so ŋun yu liɣiri pam ni wurim’ o tiŋa.

⁵Ŋunkam paɣir’ o ʒiʒiinikpee ti yaɣi nyɛla ŋun bariti o ʒiʒiinikpee maa zana.

⁶Ninvuɣ’ biɛri biriginsim puuni zana m-beni, amaa wuntizɔriba bɛn’ yiinila yila, ka mali suhupiɛlli.

⁷Wuntizɔriba mi nandaamba yɛlimaŋli ni nyɛ shɛli, ninvuɣ’ biɛri bɛn’ ka lala tɛhi’ zilima.

⁸Ansarisimaaniba wurindila tiŋa, amaa yɛnnim’ bɛn’ maarila niriba suhuri.

⁹Yɛndan’ yi tahi jɛra ʒiishee, vuri yɔbu mini ansarisi ku mali tariga.

¹⁰Ninvuɣ’ shɛb’ bɛn kuri niriba chihiri bɛn ka taali, bɛ nyɛla bɛn bɔri ni bɛ ku ninvuɣ’ shɛb’ bɛn biɛhigu tuhi.

¹¹Jɛrigu n-yihiri suhuyiɣisili palo ni. Amaa yɛndan’ ŋun kul gbib’ li la baalim.

¹²Naa yi wumdi ʒiri yɛtɔɣa, o kpamba zaa yɛn nyɛla ninvuɣ’ biɛri.

¹³Tarim’ mini ŋun nahindi niriba zaa malila bin’ yini, Yawɛ n-nyɛ ŋun chɛ ka bɛ zaa nina ne.

¹⁴Naa yi doli zaligu soli n-kariti nandaamba saria, o nam ni zani yuui.

¹⁵Fiɛbiga mini zuɣu ni kpahibu nyɛla din tiri yɛm, amaa bɛ ni chɛ bi’ so bahi, dihirila o ma vi.

¹⁶Ninvuɣ’ biɛri yi nya yaa, biriginsim pahirimi, amaa wuntizɔriba ni nya bɛ lubu.

¹⁷Saɣisim’ a bihi, ka bɛ ti a vuhim, ka ti a suhupiɛlli.

¹⁸Anabitali yɛtɔɣa yi ka luɣ’ shɛli nimaani nim’ baɣa ka shɛl’ ni, amaa ninvuɣ’ shɛb’ bɛn doli zaligu mali suhupiɛlli.

¹⁹Bɛ bi mali noli ni yɛtɔɣa kɔŋko saɣisiri tumtumdiba, dama hal bɛ yi kul baŋ a ni yɛli shɛm, bɛ baɣa ku bɛ di ni.

²⁰A nya ninvuɣ’ so ŋun tɔɣisiri yɛtɔɣa yomyom? Jɛrigu mali tahima gari dilana.

²¹Bɛ yi pooi dabili o bilim ni, di bahigu ti ku viɛla.

²²Suhuyiɣisililan’ nyɛla ŋun tahiri zabili na, ka suhuyiɣisili pam tahiri biriginsim pam na.

²³Nir’ karimbaani n-tahir’ o filiŋ na, amaa ŋun siɣisir’ omaŋ’ ni nya jilima.

²⁴Ŋun zaŋ omaŋ’ tabili tayiɣa je omaŋmaŋ’ nyɛvili; o yi wumdi niriba ni yɛri zaɣ’ biɛ’ shɛli din yɛn niŋ tayiɣ’ maa, amaa ka o bi viir’ o gbini.

²⁵Nir’ yi zɔri o taba dabiɛm, di nyɛla zana, amaa ninvuɣ’ so ŋun niŋ Yawɛ naani ni yi yɛla ni.

²⁶Niriba pam bɔri ni naa yuri ba, amaa Yawɛ sani ka nir’ nyari din niŋ kamaata.

²⁷Wuntizɔriba je ninvuɣ’ biɛri yɛlli, ka ninvuɣ’ biɛri gba je wuntizɔriba yɛlli.