Read Dagbani Ŋaha 31 Bible Online

Ŋaha 31 - Dagbani bible

Ŋaha 31

¹Naa Lɛmuɛl yɛtɔɣa, din nyɛ o ma ni daa wuh’ o anabitali yɛtɔɣ’ shɛli.

²Aai, m bia! Aai, m pul’ ni bia! Aai, n nɔpoli bia!

³Miri ka a zaŋ a yaa ti paɣiba, a mi di zaŋ a soya ti bɛn kuri nanima.

⁴Lɛmuɛl, wumma, di bi simdi ni nanim’ nyuri wain bee ka nanim’ chɛ ka bɛ kɔre be dam din kpɛm’ nyubu ni.

⁵Di yi pa lala bɛ ni nyuli kuli, ka tam zaligu yɛla, ka mɔŋ ninvuɣ’ shɛb’ bɛn be muɣisigu ni zaa yɛlimaŋli.

⁶Zaŋmi dam din kpɛma n-ti ninvuɣ’ so ŋun yɛn kpi, ka zaŋ wain ti ninvuɣ’ shɛb’ bɛn be nandahima pam ni,

⁷ka bɛ nyu li ka tam bɛ fara yɛla, ka ku lan teei bɛ suhugarigu yɛla.

⁸Zanimi ninvuɣ’ shɛb’ bɛn ku tooi tɔɣisi yɛtɔɣa zaani n-tɔɣisi bɛ yɛtɔɣa ti ba. Zabimi bɛn ka yaa yɛlimaŋli zuɣu.

⁹Yɛlim’ din beni, karimi saria ni wuntizɔbo. Zabimi faranim’ mini nandaamba yɛlimaŋli zuɣu.

¹⁰Ŋuni n-lee ni tooi nya paɣ’ so ŋun nyɛ yidaampaɣ’ maŋli? O gari salima.

¹¹O yidan’ niŋ o naani o suhu ni, ka shɛli ku poog’ o yidana maa.

¹²O niŋdila o yidana din viɛla o biɛhigu ni zaa, ka pa ni zaɣ’ biɛɣu.

¹³O nyɛla ŋun bɔri piɛri kɔbiri mini gumdi shee, ka zaŋ o nuhi tumdi tuma ni o suhu zaa.

¹⁴O ŋmanila kɔhigɔriba ŋarima; o ʒir’ o bindirigu yirila katiŋ’ na.

¹⁵O daŋdila yiɣisibu di ni na bi neei saha shɛli n-niŋdi bindirigu tir’ o yiŋnima, ka tir’ o tumtumdiba bɛn nyɛ bipuɣinsi tuma.

¹⁶O zahindila puu pɔi ka naanyi da li. O zaŋdila o ni tum tuma nya laɣ’ shɛli n-ko wain tihi puu.

¹⁷O nyɛla ŋun mali kpiɔŋ, ka kpaŋsir’ o bɔɣiri n-tumdi kpiɔŋ tuma.

¹⁸O mi ni o daguya mali nyɔri, o firila bi kpiri yuŋ.

¹⁹O gbibila gummua o nuu ni, ka mali o nubihi wahiri jɛni.

²⁰O tiri nandaamba pina, ka tiri bɛn ka pina.

²¹Wari yi beni o suhu bi zɔhiri o yiŋnim’ zuɣu, dama o yiŋnim’ zaa yɛrila situr’ tibisa.

²²O wuɣir’ omaŋmaŋ’ garo bimpara. O situra nyɛla tampiɛl’ viɛlli mini tan’ ʒiɛkpeein.

²³Sokam mi o yidana tiŋ’ maa dunɔdaya gbini, ka o mini tiŋgbɔŋ maa ni kpamba laɣindi ʒiina.

²⁴O shɛrila tan’ piɛla binyɛra kɔhira, ka maani shɛlɔriti kɔhiri kɔhigɔriba zuɣu.

²⁵Kpiɔŋ mini jilima n-nyɛ o situra, o suhu bi zɔhiri saha shɛŋa din kanna zuɣu.

²⁶O yaar’ o noli n-tɔɣisiri yɛm yɛtɔɣa, ka nirilim niŋbu wuhibu be o noli ni.

²⁷O gbib’ o yiŋnim’ viɛnyɛliŋga; o pala vinnyaɣilana.

²⁸O bihi ni yiɣisi paɣ’ o ka o yidan’ gba paɣ’ o, yɛli,

²⁹“Paɣiba pam tum din viɛla, amaa nyini n-gari bɛ zaa.”

³⁰Nɛma nyaɣinyaɣi nyɛla yɔhiŋ, ka viɛlim nyɛ din naara, amaa paɣ’ so ŋun zɔri Yawɛ n-nyɛ ŋun simdi paɣibu.

³¹Tim’ o o nuhi tuma tarili, ka chɛ ka o tuma paɣ’ o tiŋ’ maa dunɔdaya ni.