Read Dagbani Ŋaha 8 Bible Online

Ŋaha 8 - Dagbani bible

Ŋaha 8

¹Yɛm bi boonila niriba? Ka tɛhi’ zilima mi duhiri di yee?

²O ʒiɛla luɣ’ shɛŋa din du zuɣu mini so’ naŋgban’ kpansi ni sochira zuɣu.

³ O ʒiɛla fɔntinsi dunɔdaya ni, o bela dunɔdaya maa gbini n-kuhiri boona:

⁴“Yinima ninsalinim’ ka m boona. Bɛnkam be bɛ nyɛviya ni ka m booni maa.

⁵Yinim’ bɛn nyɛ tarimba ŋɔ, bomiya yɛm. Yinim’ bɛn ka fahim ŋɔ, bomiya li.

⁶Wummiya, dama n yɛn tɔɣisila bintitaŋa yɛtɔɣ’ viɛla, ka din yɛn yi n noli ni na nyɛla din tuhi.

⁷Dama yɛlimaŋli ka n yɛn yɛli; ninvuɣ’ biɛtali nyɛla din chihiri n noli ni yibu na.

⁸N yɛtɔɣa zaa nyɛla wuntizɔbo yɛtɔɣa, di shɛli pala ʒiri bee n-nyɛ din gɔŋ.

⁹Di zaa nyɛla din tuhi ninvuɣ’ so ŋun baŋ di gbinni sani, ka nyɛ din tuhi ninvuɣ’ shɛb’ bɛn mali baŋsim sani.

¹⁰Piimi n wuhibu ŋɔ ka chɛ anzinfa. Piimi baŋsim ka chɛ salima din viɛla.

¹¹Dama yɛm so salima nɛma, ka a ku tooi zaŋ a ni bɔri binshɛŋa zaa buɣisi yɛm.

¹²Man’ yɛm, m mini baŋsim m-be, ka baŋsim mini fahim be n sani.

¹³Nir’ yi zɔri Yawɛ, o nyɛla ŋun je zaɣ’ biɛɣu. N je karimbaani mini maŋduhibu ni zaɣ’ biɛɣu ni ʒiŋmabo yɛtɔɣa.

¹⁴M mali kpamdi zilinkom din viɛla mini yɛm maŋli. M mali tɛhi’ zilima, ka lan mali kpiɔŋ.

¹⁵Mani n-chɛ ka nanim’ diri nam. Mani n-sɔŋdi zuɣulaannim’ ka bɛ zaani zaligu shɛŋa din doli yɛlimaŋli.

¹⁶Mani n-chɛ ka zuɣulaannim’ su bɛ niriba, ka chɛ ka bɛnkam su niriba su ba viɛnyɛliŋga.

¹⁷N yuri bɛn yuri ma, ka ninvuɣ’ shɛb’ bɛn bɔri ma ni nimmoo nyari ma.

¹⁸Buni mini jilima be n sani, ka azichi din yuura mini tɔŋsim be n sani.

¹⁹N daanfaani so salima, hal salima alali gba. Ka n ni tiri niriba binshɛli gari anzinfa viɛlli.

²⁰N dolila wuntia soli ka doli yɛlimaŋli soli.

²¹N zaŋdi buni tiri ninvuɣ’ shɛb’ bɛn yuri ma, ka chɛ ka bɛ daazichi duri paana.

²² Mani ka Yawɛ daa daŋ nambu o tuma piligu ni, din daa nyɛ o tuuli tuma kurimbuni ha.

²³Yumakaʒe din garila ka o daa nam ma, mani ka o daa daŋ nambu pɔi ka naanyi nam dunia ŋɔ.

²⁴Bɛ daa dɔɣi ma ka teeku na kani, ka kɔbilinina din bilisiri kom pampam gba daa na kani.

²⁵Bɛ daa dɔɣi ma, ka zoya na kani, ka daboya gba na kani,

²⁶o daa na bi nam tiŋgbani mini puri bee n-sɔŋ dunia tampuɣili.

²⁷O ni daa nam zuɣusaa, n daa beni, o ni daa booi booli gili teeku zuɣu, n daa beni.

²⁸O ni daa chɛ ka sagbana din be zuɣusaa ŋɔ zani viɛnyɛliŋga ka yɔhi teeku ni kɔbilinina,

²⁹o ni daa zali teeku di tarisi ni nyɛ shɛm din ni chɛ ka di kom ku zo n-yaɣi o ni zal’ li shɛli tariga, o ni daa booi tiŋgbani tarisi saha shɛli,

³⁰di saha maa n daa bela o luɣili zuɣu kaman tumtumdiba kpɛm’ la. O suhu daa piɛli n zuɣu dabisili kam, ka n kul mali suhupiɛlli o sani sahakam.

³¹N daa mali suhupiɛlli o dunia din pali binnɛma ŋɔ zuɣu, ka mali suhupiɛlli ninsalinim’ zuɣu.

³²M bihi, pumpɔŋɔ wummiya n yɛligu. Ninvuɣ’ shɛb’ bɛn doli n soli mali suhupiɛlli.

³³Wummiya n wuhibu, ka niŋ yɛm. Miriya ka yi zaɣisi li.

³⁴Ninvuɣ’ so ŋun wumdi n yɛligu, ka ʒe n dunɔdali gbini dabisili kam, ka ʒe n dunoli ni guhiri mali suhupiɛlli.

³⁵Dama ŋunkam bo n-nya ma, o nya nyɛvili, ka Yawɛ ni niŋ o nirilim.

³⁶Amaa ninvuɣ’ shɛb’ bɛn kɔŋ ma, bɛmaŋ’ ka bɛ tum barina maa. Ninvuɣ’ shɛb’ bɛn zaa je ma nyɛla bɛn yuri kum.