Read Dagbani Ŋaha 9 Bible Online

Ŋaha 9 - Dagbani bible

Ŋaha 9

¹Yɛm me o yili, ka sa daantalisi ayopɔin.

²O kɔr’ o biŋkɔbiri, ka zaŋ o wain gabi taba, ka mali bindira dibu shili zali.

³O tim o yiŋ’ bipuɣinsi ni bɛ chaŋ tiŋ’ puuni luɣ’ shɛŋa din du pam shee ti boli niriba.

⁴“Yinim’ bɛn nyɛ tarimba ŋɔ, kamiya kpe na.” O yɛri bɛn ka yɛm,

⁵“Kamiyana ti di m bindira ŋɔ, ka nyu n ni zaŋ wain shɛli gabi tab’ ŋɔ.

⁶Zaŋmiya ʒilinsi biɛhigu bahi ka be, ka doliya tɛhi’ zilima soli.

⁷Ŋunkam mali ansarisimaana n-zali dɛde, o kpa turi. Ŋunkam kpahi ninvuɣ’ biɛɣu zuɣu ni ni nya daŋa.

⁸A yi kpahi ansarisimaana zuɣu ni, o ni leei ŋun je a. A yi kpahi ŋun mali yɛm zuɣu ni, o ni yur’ a.

⁹Wuhimi yɛnnima, ka bɛ nyari yɛm pahira. Wuhimi wuntizɔriba, ka bɛ nyari anfaani bɔhimbu puuni.

¹⁰ Yawɛ zɔbu n-nyɛ yɛm piligu. Ŋun nyɛ kasi ŋɔ baŋbu tahiri tɛhi’ zilima na.

¹¹Dama n zuɣu ka a ni nya nyɛvili wɔɣinli, ka a nyɛvili yuma pahi.

¹²A yi nyɛ yɛndana, nyini n-yɛn di a yɛm maa nyɔri, a mi yi maani ansarisi, a kɔŋko n-yɛn di wahala.”

¹³Paɣ’ jɛrigu kul tahirila pampam, o nyɛla ŋun be ʒilinsi ni, ka bi mi shɛli.

¹⁴O ʒiinila o yiŋ’ dunɔdali gbini bee tiŋ’ puuni luɣ’ shɛŋa din du pam shee

¹⁵m-booni ninvuɣ’ shɛb’ bɛn gariti chani bɛ chandi shee.

¹⁶“Yinim’ bɛn be ʒilinsi ni ŋɔ, kpɛmiya kpe na.” Ka yɛri bɛn ka yɛm mi;

¹⁷“Ko’ zurili nyaɣisa, ka nir’ ni sɔɣi di bindir’ shɛli nyaɣisa.”

¹⁸Amaa bɛ bi mi ni kpiimba be nimaani, ka o saamba be kpiimba biɛhigu shee.