Read Dagbani Waazuyihira 1 Bible Online

Waazuyihira 1 - Dagbani bible

Waazuyihira 1

¹Jɛrusalɛm Naa Dauda bia ŋun nyɛ karimba la yɛtɔɣa m-bɔŋɔ.

²Karimba maa yɛliya, Din ka buchi mi din ka buchinima; din kul ka buchi mi din ka buchinima! Di zaa shiri ka buchi.

³Ninsalinim’ ni tumdi shɛlikam dunia ŋɔ puuni, bɔ ka bɛ lee nyari di ni?

⁴Ʒiɛmana kanimina ka vuura, amaa dunia ŋɔ din kul ni beni sahakam.

⁵Wuntaŋ’ kul puhirimina n-chani ti lura, ka lan zɔri yomyom labiri o ni puhiri shɛli polo.

⁶Pɔhim ʒiɛri kparila nudirigu polo n-chaŋ gili hal ti paai nuzaa polo n-kul chani gindi hal ti paai di piligu shee yaha.

⁷Mɔɣa kom zɔri ti lurila teeku ni, amaa ka di bi paana. Kɔzɔrima maa ni zɔri yiri luɣ’ shɛŋa na, nimaani ka di na kul zɔri yirina.

⁸Binshɛɣukam yɛla wumdi daadam ka di ka yɛtɔɣa. Nini bi nyari tiɣira, ka tibili mi bi wumdi tiɣira.

⁹Din daa pun beni na kul ni beni. Ka din daa pun niŋ mi na kul ni niŋda. Binshɛli kani n-nyɛ bin’ palli dunia ŋɔ ni.

¹⁰Ka bee binshɛli beni, ka bɛ ni yɛli, “Nyamiya, bini ŋɔ din’ nyɛla bin’ palli?” Di nyɛla binshɛli din pun beni hal ka bɛ na bi dɔɣi ti gba.

¹¹Ninvuɣ’ shɛb’ bɛn daa pun be kurimbuni ha la, so bi lan teeri bɛ yɛla. Lala n-nyɛ li ka ninvuɣ’ shɛb’ bɛn ti yɛn doli ninvuɣ’ shɛb’ bɛn na yɛn yi dunia palo ŋɔ ni na nyaaŋa ti ku teei bɛ gba yɛla.

¹²Man’ karimba ŋun nyɛ Izraɛlnim’ naa m-be Jɛrusalɛm ŋɔ

¹³daa ti lo nia n tɛha puuni ni n vihi baŋ binshɛɣukam din niŋdi dunia ni. Di nyɛla Naawuni ni zaŋ tuun’ shɛli ti daadamnim’ ka bɛ tumdi ka di tiri ba suhugarigu.

¹⁴N nyaya ka daadamnim’ ni tumdi shɛlikam dunia ŋɔ ni zaa nyɛla din ka buchi, ka ŋmanila nir’ yi zɔri doli pɔhim.

¹⁵Binshɛli din gɔŋ ku tooi lan teei tuhi; ka nir’ mi ku tooi yɛli binshɛli din kani yɛla.

¹⁶ Ka n daa yɛli n suhu ni, “M bo n-nya yɛm pam gari na’ shɛb’ bɛn pun daŋ n tooni ʒini Jɛrusalɛm ŋɔ zaa; ka kpahim baŋ yɛla pam yɛm mini baŋsim puuni.”

¹⁷N lan kpahim baŋ yɛm mini jɛrilim ni yinyatali ni nyɛ shɛm; ka nya ka di ŋmanila nir’ yi zɔri doli pɔhim.

¹⁸N kpahimya nya ka ninvuɣ’ shɛb’ bɛn bɔri yɛm pam nyɛla bɛn mali suhuyiɣisili. Ka ninvuɣ’ shɛb’ bɛn mi bɔri baŋsim pam nyɛla bɛn mali suhugarigu.