Read Dagbani Waazuyihira 10 Bible Online

Waazuyihira 10 - Dagbani bible

Waazuyihira 10

¹Zo’ kpima chɛ ka tulaale nyom niŋdila biɛribiɛri; lala ka jɛrilim biɛla saɣindi yɛm mini jilima.

²Yɛndan’ nyɛla ŋun tumdi din tuhi, amaa ka jɛrigu mi nyɛ ŋun tumdi din bi tuhi.

³Hal jɛra yi doli soli, bɛ bi tumdi yɛm tuma, bɛ chɛ ka sokam baŋdi ni bɛ nyɛla jɛra.

⁴Naa suhu yi yiɣisi bah’ a zuɣu, nyin’ di yɛli ni a lan je o tuma, dama a yi gbaag’ amaŋ’ be balim, di ni ku taali maa.

⁵Zaɣ’ biɛ’ shɛli ka n nya dunia ŋɔ ni, chirimbu titali maa mi yirila zuɣulaannim’ sanna.

⁶Bɛ zaŋdila jɛra zaani zaashe’ kara ni, ka zaŋdi bundaannim’ zaani tarimba zaashee.

⁷N nyaya ka daba bari yuri, ka chɛ ka nabihi chani tiŋa kaman daba la.

⁸ Ŋunkam gbi bɔɣili ni lu di ni, ka ŋunkam mi chibi gooni voli, wahu ni dim’ o.

⁹Ŋunkam kpɛri kuɣa ni nya daŋ’ di ni, ka ŋunkam mi wɔriti dari ni be di daŋ’ nyabu barina ni.

¹⁰A lɛhu yi gbilim ka a bi sahi li, ka zaŋ li ni a tum tuma, a ni di wahala pam; amaa yɛm nyɛla din sɔŋdi nir’ ka o diri nasara.

¹¹Nir’ yi lo wahu kabire o dimbu nyaaŋa, di ku ku ŋun lo o kabire maa buchi.

¹²Yɛnnim’ yɛm yɛtɔɣa tir’ ba la jilima, amaa jɛra yɛtɔɣa nyɛla din diri ba.

¹³Bɛ noya ni yɛtɔɣa piinimi ni jɛritali, ka naari ni putɔɣu ni yinyari.

¹⁴Amaa di zaa yoli, jɛra kul tɔɣisiri yɛtɔɣa. So bi mi din yɛn niŋ, ka ŋuni n-lee ni tooi yɛl’ o kpee din ti yɛn niŋ dahin’ shɛli ha?

¹⁵Jɛra tuma nyɛla din gbarigiri ba, hal ka bɛ bi lan mi yiŋ’ soli gba.

¹⁶Tiŋgbɔn shɛli din naa nyɛ bia, ka di zuɣulaannim’ diri ka nyuri yuŋ hal ka biɛɣ’ ti neera; mbusim be di tiŋgbɔŋ maa zuɣu.

¹⁷Amaa tiŋgbɔn’ shɛli din naa nyɛ nabia alali, ka di zuɣulaannim’ diri di ni simdi ni bɛ diri saha shɛli ni bɛ nya kpiɔŋ ka pa ni bɛ nyu m-buɣi, di tiŋgbɔŋ maa mal’ alibarika.

¹⁸Nir’ yi nyɛ vinnyaɣilana o duu yɔɣira gɔŋdimi, ka o baɣa yi ka di ni, o duu maa ti yindimi.

¹⁹Diri ka nyuri nyɛla din tahiri lari na; ka wain nyɛ din tiri nir’ suhupiɛlli; amaa liɣiri n-chɛ ka nir’ nyar’ o suhuyubu.

²⁰Miri ka a tu naa, hal di sɔɣi tu o; a mi miri ka a tu bundana, hal di tu o a duu puuni gba, dama di pa shɛli ka nooŋa bee binyiɣirigu kam ti zaŋ a ni yɛli shɛm maa chaŋ ti yɛli.