Read Dagbani Waazuyihira 2 Bible Online

Waazuyihira 2 - Dagbani bible

Waazuyihira 2

¹Ka n daa lo nia ni n niŋ din ni ti ma nyaɣisim. Amaa ka di gba nyɛla din ka buchi.

²Ka n daa yɛli, “Lari nyɛla jɛrilim, ka nyaɣisim bɔbu mi nyɛla din ka buchi.”

³N daa loya n yɛm puuni ni n nyu dam n-nya suhupiɛlli, ka tum jɛrilim; ka yɛm daa kul be n tɛha ni. N daa tɛhiya ni di ni simdi ni nir’ zaŋ o dunia ŋɔ yili saha biɛla ŋɔ tum tuun’ shɛli m-bala.

⁴ N daa tum tuun’ kara. N daa me yiya, ka ko wain tihi puri.

⁵N daa ko ʒiɛri puri mini tihi puri, ka tiwala balibu kam tihi be di ni.

⁶Ka n daa gbi mɔɣa ŋ-ŋɔŋdi di kom yɔɣiri li.

⁷ N daa da daba bɛn nyɛ dɔbba mini paɣiba, ka bɛ daa dɔɣi daba n yiŋ’ puuni. Ka n daa lan mali niɣi mini piɛri ni buhi gari ninvuɣ’ shɛb’ bɛn zaa daa daŋ n tooni be Jɛrusalɛm.

⁸ N daa laɣisi anzinfa mini salima ni nanim’ azichi na ti puli, ka su tiŋgbana. N daa mali baansi bɛn nyɛ dɔbba mini paɣiba; ka daa mali mamanim’ pam n-di niŋgbuŋ nyaɣisim.

⁹ N daa niŋ ninvuɣ’ titali gari ninvuɣ’ shɛb’ bɛn zaa daa pun daŋ n tooni di Jɛrusalɛm, ka daa lan mali yɛm pam.

¹⁰N daa nya n suhu ni kul bɔri shɛlikam. N daa bi zaɣisi n suhu ni kul bɔri nyaɣisim shɛlikam. N daa nyu bara n ni tum nya shɛli zuɣu. N tuma laara zaa ni daa nyɛ shɛli m-bala.

¹¹Di saha ka n daa tɛhi n ni daa tum shɛlikam zaa yɛla ni n ni daa kpaŋ mmaŋ’ shɛm niŋ li, ka di zaa kul nyɛla din ka buchi. Di ŋmanila nir’ yi zɔri doli pɔhim, ka binshɛli ka dunia ŋɔ ni mali buchi.

¹²Dama, naa kul ni tumla na’ shɛb’ bɛn pun daŋ o tooni ni tum shɛli. Di saha ka n daa tɛhi yɛm mini biɛri yoli ni jɛrilim yɛla.

¹³Di nyaaŋa ka n daa baŋ ni yɛm so jɛrilim kaman neesim ni so zibisim shɛm la.

¹⁴Yɛndaannim’ bela neesim ni, ka jɛra mi be zibisim ni. Amaa m mi ni yɛl’ yini n-ʒe n-guli bɛ zaa.

¹⁵Ka n daa yɛli n suhu ni, “Din yɛn niŋ ma, dina n-yɛn niŋ jɛra; ka bɔzuɣu ka di lee simdi ni m mali yɛm pam?” Ka n daa yɛli n suhu ni, “Dimbɔŋɔ gba nyɛla din ka buchi.”

¹⁶So bi yɛn teeri yɛndana bee jɛrigu yɛla sahakam; dama saha shɛli kanna ka bɛ ni ti tam bɛ zaa yɛla, dama bɔzuɣu ka yɛnnim’ mini jɛra zaa yɛn kpi kpiri yini?

¹⁷Dinzuɣu ka n nyee nyɔni biɛhigu, dama binshɛlikam din niŋdi dunia ŋɔ ni nyɛla din tiri ma suhugarigu, dinzuɣu di zaa nyɛla din ka buchi, ka ŋmani nir’ yi zɔri doli pɔhim.

¹⁸N nyee nyɔni n ni niŋ wahala nya shɛlikam zaa dunia ŋɔ ni, dama m mi ni n yɛn chɛ li zalila na’ shɛb’ bɛn yɛn doli n nyaaŋa.

¹⁹Di pa shɛli ka bɛ ti nyɛla yɛnnim’ bee jɛra, so n-ku tooi baŋ. Amaa bɛna nti yɛn su n ni zaŋ n yɛm niŋ wahala nya shɛlikam dunia ŋɔ ni ŋɔ. Dimbɔŋɔ gba nyɛla din ka buchi.

²⁰Di saha ka n daa yolitim zaŋ chaŋ n ni niŋ wahala nya shɛlikam dunia ŋɔ ni maa polo.

²¹Dama shɛlini so mi n-zaŋ yɛm mini baŋsim ni tuumbaŋsim yɛm tum nya shɛli, ka ti chɛ li tila ŋun bi di di wahala ni o di di nyaɣisim. Dimbɔŋɔ gba nyɛla din ka buchi ni zaɣ’ biɛɣu.

²²Ninsal’ ni tumdi tuma ka niŋdi wahala dunia ŋɔ ni m-bɔri ni o nya shɛli maa buchi lee nyɛla dini?

²³ Ninsal’ dunia ŋɔ yili biɛhigu zaa puuni, o tuma zaa nyɛla din tir’ o biɛrim mini suhugarigu, hal ka o bi tooi vuhir’ o yubu yuŋ gba. Dimbɔŋɔ gba nyɛla din ka buchi.

²⁴ Ninsal’ ni kul ni niŋ shɛli nyɛla o di ka nyu, ka di o tuma nyaɣisim. N nyaya ka dimbɔŋɔ gba nyɛla din yi Naawuni sanna.

²⁵Dama di yi pa o zuɣu, ŋuni n-lee ni tooi nya n-di bee n-di o tuma nyaɣisim?

²⁶ Dama Naawuni nini ni tiɣi so, o tiri dilan’ yɛm mini baŋsim ni suhupiɛlli, amaa ka chɛ ka alahichilana ŋun’ tumdimi laɣisiri sɔŋdi ni ŋun’ Naawuni ti zaŋ li ti o nini ni tiɣi ninvuɣ’ so. Dimbɔŋɔ gba nyɛla din ka buchi, ka lan ŋmani nir’ yi zɔri doli pɔhim.