Read Dagbani Waazuyihira 4 Bible Online

Waazuyihira 4 - Dagbani bible

Waazuyihira 4

¹N daa lan nya nahiŋgu shɛŋa din be dunia ŋɔ ni. N daa nya ninvuɣ’ shɛb’ bɛn nyari nahiŋgu maa ni kumdi shɛm, ka ka ŋun goori ba. Ninvuɣ’ shɛb’ bɛn daa nahindi ba maa daa mali yiko pam, dinzuɣu ka bɛ daa ka ŋun ni gooi ba maa.

²Ka n daa tɛhi ni ninvuɣ’ shɛb’ bɛn pun kpi la mali zuɣusuŋ gari ninvuɣ’ shɛb’ bɛn na be bɛ nyɛviya ni.

³Amaa bɛn so bɛ zaa nyɛla bɛ ni bi dɔɣi shɛb’ ka bɛ nini nya ninvuɣ’ biɛtali tuma din tumdi dunia ŋɔ ni la.

⁴Ka n daa lan nya ka ninsalinim’ tuma mini bɛ baŋsim puuni, bɛ zabirila tab’ nyuli. Dimbɔŋɔ gba nyɛla din ka buchi, di ŋmanila nir’ ŋun zɔri doli pɔhim.

⁵Jɛra n-zaŋdi bɛ nuhi taɣindi tab’ ʒiya, ka chɛ ka kum kuri ba.

⁶Dinzuɣu nir’ yi nya biɛla diri ka mali suhudoo, di so ni o niŋ wahala nya pam. Di ŋmanila nir’ ŋun zɔri doli pɔhim.

⁷Ka n lan nya shɛli dunia ni, ka di gba nyɛla din ka buchi.

⁸Nyama, ninvuɣ’ so n-daa beni m-be o ko. O daa ka bihi bee mabihi, ka nyɛ ŋun tumdi tuma ka bi vuhira, amaa ka o nini bi tiɣir’ o ni mali shɛli. Ka o daa bɔhi, “Ŋuni n-lee ni tumdi pam ka bi diri di nyaɣisim?” Dimbɔŋɔ gba nyɛla din ka buchi, ka lan tiri suhugarigu.

⁹Niriba ayi laɣim be so ninvuɣ’ yino, dama bɛ ni tooi tum bɛ tuma viɛnyɛliŋga.

¹⁰Bɛ ni yino yi lu, ŋun’ la ni yiɣis’ o zali. Amaa mbusim be ninvuɣ’ so ŋun be o ko zuɣu. O yi lu, o ka ŋun ni yiɣis’ o zali.

¹¹Niriba ayi yi do n-tab’ taba, bɛ ni ni tula, amaa nir’ yi do o ko, wula ka o yɛn niŋ ka o ni tula?

¹²Niriba ayi yi vara, bɛ ni yino ni luh’ o kpee, amaa niriba ayi ni tooi luhi ninvuɣ’ yino. Mih’ ata gabiga bi chihiri yom.

¹³Nachimbil’ so ŋun nyɛ faralana ka mali yɛm, o so ninvuɣ’ kurigu ŋun nyɛ naa, ka nyɛ jɛrigu ŋun ku saɣi deei saɣisigu.

¹⁴Bɛ ni tooi dɔɣi nabia ka o nyɛla faralana, amaa o ni tooi yi sarika ni na ti di nam.

¹⁵N nyaya ka sokam bɛn be dunia ŋɔ ni zaa dolila nachimbil’ so ŋun di nam zani naa zaani.

¹⁶Di pa shɛli o ni di n-su shɛb’ kalinli ku mali tariga, amaa bɛn doli nyaaŋa na nini ku tiɣ’ o. Yɛlimaŋli dimbɔŋɔ gba nyɛla din ka buchi, ka ŋmanila nir’ ŋun zɔri doli pɔhim.