Read Dagbani Waazuyihira 7 Bible Online

Waazuyihira 7 - Dagbani bible

Waazuyihira 7

¹ Yu’ suŋ so tulaale viɛlli, ka kum dali so dɔɣibu dali.

²Nir’ yi chaŋ kumsi ni be yil’ shɛli, di so ni o chaŋ dimma ni nyubu ni be yil’ shɛli. Dinzuɣu di simdi ni bɛn be bɛ nyɛviya ni baŋ ni kum nyɛla din yɛn paai sokam zaa.

³Suhugarigu so lari, dama nandahima nyɛla din tahiri suhukpaŋsibo na.

⁴Yɛndana suhu bɔrila kumsi ni be yil’ shɛli, amaa jɛra suhuri bɔrila suhupiɛlli ni be yil’ shɛli.

⁵Nir’ yi wum yɛndana saɣisigu, di so ni o wum jɛrigu yila.

⁶Dama jɛra lari ŋmanila gɔhi ni be buɣim ni duɣu gbinni tahiri shɛm la; ka dimbɔŋɔ gba ka buchi.

⁷Yɛlimaŋli, nahiŋgu nyɛla din chɛri ka yɛndan’ niŋdi jɛrigu, ka birapu dibu mi saɣindi nira.

⁸Bini bahigu so di piligu; ka suɣilo so karimbaani.

⁹ Di chɛ ka a suhu yiɣisiri yomyom, dama jɛra suhuri ni ka suhuyiɣisili be.

¹⁰Miri ka a bɔhi, “Bɔ n-lee chɛ ka yuun’ shɛŋa din gari la so pumpɔŋɔ ŋɔ?” Dama lala bɔhigu pala yɛm bɔhigu.

¹¹Yɛm viɛla, ka ŋmanila fali, ka niŋdi bɛn be dunia ŋɔ ni anfaani.

¹²Di nyɛla din ni tooi sɔŋ nira kaman liɣiri ni sɔŋdi nir’ shɛm. Baŋsim daanfaani nyɛla yɛm tiri ninvuɣ’ so ŋun mal’ li nyɛvili.

¹³Kpahimmi Naawuni tuma; o yi niŋ shɛli ka di gbiligi, ŋuni n-lee ni tooi mal’ li zali dɛde?

¹⁴Mali suhupiɛlli tɔŋbu saha, ka yɛla mi yi ti paag’ a, nyin’ teemi ni Naawuni n-tahiri suhupiɛlli mini yɛlimuɣisira maa zaa na. Dinzuɣu ninsalinim’ ku tooi baŋ binshɛli din yɛn niŋ bɛ kalinsi nyaaŋa.

¹⁵M biɛhigu din ka buchi ŋɔ puuni, n nya binshɛɣukam zaa. Wuntizɔriba kpiri bɛ wuntitali tuma puuni, ka ninvuɣ’ biɛri kul tumdi tuumbiɛri ka mali nyɛvili wɔɣila.

¹⁶Di wuhi ni a nyɛla wuntizɔra ti yaɣi, a mi di wuhi ni a nyɛla yɛndan’ ti yaɣi. Di niŋ lala ku amaŋa.

¹⁷Miri ka a niŋ ninvuɣ’ biɛɣu, a mi di nyɛ jɛrigu. Di niŋ lala n-kpi ka a saha na bi paai.

¹⁸Di simdi ni a vili zaɣ’ yini gbibi, amaa ka di chɛ din’ la gba bahi; dama ninvuɣ’ so ŋun zɔri Naawuni ni tooi gbibi di bina ayi maa zaa.

¹⁹Yɛm tiri yɛndan’ kpiɔŋ gari nanim’ pia bɛn be tiŋ’ puuni.

²⁰Yɛlimaŋli, so ka dunia ŋɔ ni n-nyɛ wuntizɔra ŋun kul tumdi tuun’ suma, ka na ʒi n-tum alahichi.

²¹Di doli wumdi niriba ni yɛri shɛlikam, di yi pa lala, a ni ti wum ka a tumtumda tur’ a.

²²Ka amaŋmaŋ’ mi a suhu ni ni a gba tur’ a tab’ pam.

²³N yɛm puuni ka n zaŋ baŋ dimbɔŋɔnim’ zaa. N daa yɛliya, “N ni niŋ yɛndana, amaa ka m mini di shee ti wɔɣa.

²⁴Yɛm shee wɔɣa, ka di biɛhigu shee zilim’ pam; ka di bo n-nya to pam.

²⁵N daa zaŋ n zaɣa niŋ baŋsim bɔbu ni ni m bo n-nya yɛm mini binyara pam, ka m baŋ ni ninvuɣ’ biɛtali nyɛla jɛrilim, ka jɛrilim nyɛ yinyari.

²⁶N nya binshɛli ka di to n-gari kum. Dina n-nyɛ paɣ’ so ŋun ŋmani zana. O ni wuhi ni o yur’ a shɛm ŋmanila zana mini tɔŋ, ka o nuhi nyɛ bandi. Ninvuɣ’ so ŋun bɔri ni o niŋ din tiɣi Naawuni nini ni yi o yɛla ni, amaa alahichilan’ ni lu o zana maa ni.

²⁷Karimba maa yɛliya, ‘Nyama, n lan nya dimbɔŋɔ, n zaŋla binshɛŋa pahi di tab’ ni ni m baŋ di laasabu.

²⁸N suhu kul bɔrila binshɛli nyabu, amaa ka na bi nya li. N nya do’ yino niriba tuhili puuni, amaa ka bi nya paɣ’ yino niriba tuhili maa puuni.

²⁹Amaa bin’ yini ŋɔ ka n naɣ’ kpahim nya: Naawuni nam ninsalinim’ dɛde, amaa tinim’ lee bo yɛligabira pam ti timaŋa.’ ”