Read Dagbani Sulemaana Yila 1 Bible Online

Sulemaana Yila 1 - Dagbani bible

Sulemaana Yila 1

¹ Naa Sulemaana yilli din nyɛ yila puuni yili viɛlli.

²Mɔɣisim’ n kpariŋ; a yurilim so wain.

³A kpaʒiɛrima nyom viɛla; a yuli ŋmanila tulaale. Dinzuɣu ka paɣiba yur’ a maa.

⁴Zaŋm’ ma mali kuli, chɛ ka ti niŋ yomyom. Naa zaŋ ma kpe o duu. Ti ni di dari ka mali suhupiɛlli a zuɣu; ti ni paɣ’ a yurilim maa gari wain; dina n-chɛ ka bɛ yur’ a maa.

⁵Jɛrusalɛm paɣiba, n sabigimi, amaa ka viɛli pam. N sabigimi kaman tiŋgban’ nɛl’ ni Kɛdar tanti suɣa la, amaa ka viɛli pam kaman Naa Sulemaana pateesanima.

⁶Di lihi ʒiɛm’ ma, n ni sabigi maa zuɣu. Wuntaŋa n-kpe ma ka n sabigi maa. N tizɔdɔbba jɛla suli niŋ ma; bɛ chɛ ka n gulila wain tihi puu, ka kɔŋ dahima maani mmaŋa.

⁷N suhu ni yuri so, yɛlim’ ma, “Ya polo ka a zaŋd’ a piɛri chani ka bɛ ti ŋubiri mɔri? Ya polo ka a chɛ ka bɛ dooni vuhiri wuntaŋ’ ni? Bɔzuɣu ka m be kaman paɣ’ so ŋun pa sariga dol’ a tab’ biŋkɔbbaligu?”

⁸Paɣ’ viɛla ni paɣ’ viɛlli, a bi mi? Doli piɛri maa naba n-zaŋ a buhi chaŋ ka bɛ ti ŋub’ mɔri luɣ’ shɛli din miri piɛguliba tanti suɣa la.

⁹N yur’ a, n ni zaŋ a ŋmahindila Firawuna chɛchɛbunsi wɔridibiga.

¹⁰Tibikpara viɛl’ a tapaɣisi zuɣu ka nyiŋgokɔriti viɛl’ a nyiŋgoli ni.

¹¹Ti ni mali salima mini anzinfa yɛri ti a.

¹²N naa daa dola o bindoo zuɣu, ka n tulaale nyom deei nimaani zaa.

¹³N yura ŋmanila mɛɛr kpalambila m-pa m biha sunsuuni.

¹⁴N yura ŋmanila tipum din yirigi Ɛngɛdi wain tihi puu ni.

¹⁵N yura, a viɛli pam, a shiri viɛli pam; a nina bemi kaman ŋmana la.

¹⁶N yura, a viɛli pam. Yɛlimaŋli, a shiri viɛli pam. Ti bindoo nyɛla momaha.

¹⁷Sida dari n-nyɛ ti yiŋ’ dapuhi, ka ti yɔɣira nyɛ timaha.