Read Dagbani Sulemaana Yila 2 Bible Online

Sulemaana Yila 2 - Dagbani bible

Sulemaana Yila 2

¹N ŋmanila Sharɔn tutuɣu din pum viɛli pam, ka ŋmani vinvamli ni Paɣiviɛligakushihikom.

²Paɣiviɛligakushihikom ni ʒe go’ tihi sunsuuni shɛm, lala ka n yura be paɣisara sunsuuni.

³Apil tia ni be nyɔŋ tihi sunsuuni shɛm la, lala ka n yura be nachimba sunsuuni. N yur’ o mahim ʒinibu ka o wala nyaɣisi pam n sani.

⁴O daa zaŋ ma kpe o bindira dibu duu, ka o ni daa lo shɛm zaŋ chaŋ m polo nyɛla o bɔri ma mi.

⁵Chɛ ka n di wain tiwala n-nya kpiɔŋ, ka di apil ka n nini neei, dama doo bɔbu chɛmi ka n ni chɔɣisi zaa.

⁶O zaŋla o nuzaa gbaai n zuɣu mali, ka zaŋ o nudirigu bɔbindi ma.

⁷Jɛrusalɛm paɣiba, pomiya saŋkpalima bee muli zaɣ’ nyama ni yi ku chɛ ka ti tab’ bɔbu kɔre yiɣisi bee n-kpaŋsi li, ka di saha na bi paai.

⁸N wumla n yura kukoli. Nyama, o yila zoya zuɣu zɔrina. O zɔrimi duri kunkuna kani n sanna.

⁹N yura ŋmanila molifu bee saŋkpaliŋ polli. Nyama, ŋuna n-ʒe ti gooni nyaaŋa n-vɔbisiri lihiri ti takɔriti ni, ka lihiri dari din puli gabi tab’ voya ni ŋɔ.

¹⁰N yura yɛli ma, N ni yuri so pam, ŋun viɛli pam n sani, Yiɣisim’ ka n sanna.

¹¹Dama saa ŋmaaya, ka kikaa gba gari.

¹²Tihi pum puma mɔɣu ni. Noonsi kumbu saha paaya, ka ti wumdi ŋmambihi kumsi ti tiŋgbɔŋ ni.

¹³Fiig tihi gbaai wolibu, ka wain tihi daai pum, ka di pum maa nyo kaman tulaale la. N yura ŋun nyɛ n ni yuri so pam, Yiɣisim’ ka n sanna.

¹⁴A ŋmanila ŋmani ŋun be tampima voya ni. Chɛ ka n nya a ninni tampima voya maa ni. Chɛ ka n wum a kukoli, dama a kukoli viɛli pam, ka a ninni viɛli pam.

¹⁵Gbahim’ ŋɔri mini bɛ bihi bɛn saɣindi ti wain tihi puri la. Dama ti wain tihi maa daari pum.

¹⁶N yura nyɛla n ni su so, ka n gba nyɛ o ni su so. O zaŋd’ o biŋkɔbbaligu chani ka bɛ ti ŋubiri mɔri Paɣiviɛligakushihikom puuni.

¹⁷Biɛɣu ti yɛn neei ka zibisim zo la, n yura, nyin’ ŋmaligim’ niŋ kaman molifu bee saŋkpaliŋ la n-zo n-yi Bɛtɛr zoya zuɣu na.