Read Dagbani Sulemaana Yila 6 Bible Online

Sulemaana Yila 6 - Dagbani bible

Sulemaana Yila 6

¹Paɣiba ni paɣ’ viɛlli, a yura maa lee be ya? Wuhim’ ti a yura maa ni kpa shɛli polo ka ti bo o sɔŋ a.

²N yura maa chaŋla o puu ni, o chaŋla tulaale tihi puu vuɣisi ni ni o ti chɛ ka o piɛri ŋub’ mɔri ka o bo paɣiviɛligakushihikom na.

³N yura maa n su ma ka n gba su o. O chɛ ka o biŋkɔbbaligu ŋubiri mɔri Paɣiviɛligakushihikom shee.

⁴N yura, a viɛlimi kaman Tiriza, ka viɛli kaman Jɛrusalɛm la, ka a ni be shɛm ŋmanila tɔbbihi bɛn gbibi tuutanima.

⁵Ŋmaligim’ a nini ka chɛ ma, dama di gbaari ma! A zabiri yirigirimi kaman buhi ni zɔri sirigiri Giliad Zoli zuɣu shɛm la.

⁶A nyina piɛlimi kaman bɛ ni su piɛ’ nyaan’ shɛb’ kom ka bɛ zaɣ’ yino kam mali jaa, ka bɛ ni so bi kɔŋ o bala.

⁷A kparima ŋmanila pumpɔrinchi’ bɔɣa m-be a sariga ni.

⁸Di pa shɛli na’ so ni tooi mali napaɣiba pihiyɔbu, ka mali mamanim’ pihinii ni paɣisara bɛn’ ka kalinli.

⁹N ŋman’ piɛlli ŋun luɣ’ shɛli ka galimi maa kul nyɛla zaɣ’ yino ko. O kɔŋko n-kul nyɛ o ma bipuɣiŋga. O ka dalinli. Paɣiba yi kul nya o, bɛ paɣir’ o mi. Napaɣiba mini naa mamanim’ gba yi kul nya o bɛ paɣir’ o mi.

¹⁰Ŋuni n-lee ŋmani biɛkaali, ka piɛli kaman goli, ka ne kaman wuntaŋa, ka o ni be shɛm ŋmani tɔbbihi bɛn gbibi tuutanim’ chani la?

¹¹Ka n daa chaŋ tiwala tihi puu ni, ni n ti nya vinvamli ni tipuma, ka nya wain tihi puma, ka nya pumpɔrinchihi tihi puma.

¹²N ti yɛn baŋ, ka doo bɔbu kɔre zaŋ ma ti ʒili baɣili n nabia o chɛchɛbuŋ’ ni.

¹³Shulam paɣa, labimina, labimina! Labimina, labimina ka ti ti nya a. Bɔzuɣu ka yi lihiri man’ Shulam paɣa, kaman m bela tɔbbihi bɛn pie tab’ ʒiɛya buyi sunsuuni wari waa ŋɔ?