Read Dagbani Sulemaana Yila 7 Bible Online

Sulemaana Yila 7 - Dagbani bible

Sulemaana Yila 7

¹Nabipuɣiŋga, a naba viɛli namda ni pam! A gbalipina bela polipoli kaman nyiŋgokor’ shɛli tuumbaŋda ni mali.

²A nyuɣu bela polipoli kaman pipi’ shɛli din puuni na ʒi n-kɔŋ wain shɛŋa bɛ ni zaŋ gab’ taba. A puli ŋmanila alikama mɔri din laɣisi puya, ka paɣiviɛligakushihikom ʒe n-gil’ li.

³A biha ayi ŋmanila muli zaɣ’ pola ayi, ka ŋmani saŋkpalima ayi.

⁴A nyiŋgoli ŋmanila wɔbinyina ka bɛ zaŋ me pii zali. A nina ŋmanila Hɛshibɔn kom din do m-miri Batirabim dunol’ la. A nyee ŋmanila Lɛbanɔn pia din be Damaskus polo la.

⁵A zuɣu ŋmanila Kamɛl Zoli. A zabiri nyɛlisirimi kaman ago la. Di viɛlim ni tooi chɛ ka naa kɔŋ omaŋ’ gbaabu.

⁶A viɛli pam, ka a viɛlim maa mali kɔre, n yura ŋun nyɛ paɣ’ viɛlli.

⁷A ŋmanila abie tia, ka a biha be kaman di wala yila la.

⁸Ka n yɛli, “N ni du abie tia maa, n-gbaai di wula gbibi.” N suhigu nyɛla a biha kul be kaman wain wala yila la, ka a vuhim ʒiɛɣu ŋmani apil nyom.

⁹Ka a noli mɔɣisibu ŋmani wain viɛlli din chani viɛnyɛliŋga. Dindina, n yuya ni wain maa paagi n yura maa n-zo n-tiɛli o naŋgbampiba min’ o nyina.

¹⁰N yura n-su ma, ka o kɔre be n ni.

¹¹N yura, kamina ka ti yi kpaŋa nti gbɛri tiŋkpansi.

¹²Chɛ ka ti chaŋ wain tihi puri ni nti nya di daai pum. Ti cham’ ti nya di puma maa yirigiya, ka nya pumpɔrinchihi tihi gba daai pum. Nimaani ka n ni wuh’ a n ni yur’ a shɛm.

¹³Tulaale mɔri chɛ ka di nyom chani ginda, ka tiwal’ viɛla zaa ʒe m-baɣi ti dunoya. N yura, di zaɣ’ kura mini zaɣ’ pala ka n zaŋ zal’ a.