Read Dagbani Sulemaana Yila 8 Bible Online

Sulemaana Yila 8 - Dagbani bible

Sulemaana Yila 8

¹N di bi zaɣisi ka a nyɛla n tizɔdoo ŋun daa mɔɣi m ma bihili! N yi di nya a samban’ ni, n naan mɔɣis’ a noli ka so ku galim’ ma.

²N ni zaŋ a kuli m ma yiŋa, n ni zaŋ a ti kpɛhi ŋun daa dɔɣi ma du’ gbɛrili ni. N ni ti a wain viɛlli mini m pumpɔrinchihi wala kom ka a nyu.

³N di bi zaɣisi ka a nuzaa tabila n zuɣu gbibi, ka a nudirigu mi bɔb’ gbaai ma mali.

⁴Jɛrusalɛm paɣiba, pomiya ni yi ku chɛ ka ti tab’ bɔbu kɔre yiɣisi bee n-kpaŋsi li.

⁵Ŋuni n-lee yi mɔɣu polo kanna ka zaŋ omaŋ’ dalim’ o yura ŋɔ? Apil tia gbini ka n daa neeg’ a. Nimaani ka a ma daa be n-wolisiri ni o dɔɣ’ a; nimaani ka ŋun daa dɔɣ’ a daa be n-wolisira.

⁶Zaŋm’ ma tabil’ a suhu kaman a nyɛla dalinli la, ka zaŋ ma pa a baɣiri zuɣu kaman n nyɛla dalinli la. Dama yurilim malila yaa kaman kum la, ka kɔre mali yaa kaman gballi. Di dirimi kaman buɣim la, ka di buɣim zilinli mali kpiɔŋ pam.

⁷Kom pam ku tooi kpihi yurilim, ka kokpɛɣu mi ku tooi di li. Nir’ yi zaŋ o yiŋ’ azichi zaa ni o da yurilim, bɛ ni mal’ o ansarisi.

⁸Ti malila ti tizɔpaɣa, ka o biha bi yaɣi lala. Ka wula ka ti lee yɛn niŋ ti tizɔpaɣ’ maa, dɔbba yi ti kana ti bɔr’ o?

⁹O yi di nyɛla dikili, ti naan me anzinfa pia tam o zuɣu; ka o yi di nyɛla dunoli, ti naan zaŋ sida dapaɣa yo o.

¹⁰N ŋmanila dikili, ka m biha ŋmani gaɣibihi. N nyɛla ŋun chɛ ka o nyari suhudoo.

¹¹Sulemaana wain tihi puu daa bela Baalihamɔn ka pukpariba daa haayi li o sani, bɛ zaa yinoyino daa yɔrila anzinfa laɣibaligu tuhilituhili.

¹²Nyin’ Sulemaana n-su anzinfa laɣibaligu tuhilituhili maa, ka pukpariba maa mi su anzinfa laɣibaligu kɔbisiyiyi. Man’ malila mmaŋmaŋ’ dahalali wain tihi puu.

¹³Nyin’ ŋun be puri ni ŋɔ, n zɔnim’ wumd’ a yɛtɔɣa; chɛ ka n gba wum li.

¹⁴N yura, niŋm’ yomyom, be kaman molifu la bee kparibua ŋun be tulaale tihi zoya zuɣu.