Read Dagbani Aizaia 11 Bible Online

Aizaia 11 - Dagbani bible

Aizaia 11

¹ Wulipolli ni ti puhi yi Jɛsi gbirili ni na. Wulli ni ti to n-yi o nyaɣa ni na n-wali.

²Yawɛ shia ni ti siɣ’ o zuɣu na nti ti o yɛm mini baŋsim, ka ti o yiko mini saɣisigu ni baŋsim mini Naawuni zɔbo.

³Yawɛ zɔbu nti yɛn nyɛ o suhu ni yuri shɛli. O ti ku kari nimmira saria bee n-kari, “Bɛ yɛliya,” saria.

⁴ Amaa o ni ti dolila wuntia soli n-kari nandaamba saria; ka kari saria din tuhi ti dunia ŋɔ bɛn ka. O ni ti zaŋ o nol’ ni yɛligu n-fiɛbi dunianima; ka lan zaŋ o nol’ ni yɛligu n-ku ninvuɣ’ biɛri.

⁵ O ni ti zaŋ wuntitali kaman shɛlɔrigu la n-lo o shee ni; ka zaŋ ʒiɛyimtali kaman shɛlɔrigu la n-lo o shee ni pahi.

⁶Kunduna mini piɛri ni ti laɣim doya, ka jɛŋgbina mini bubihi ti laɣim doya, ka naɣibihi mini gbuɣimbihi ni gbuɣim pola ti laɣim doya, ka bihi ti vɔri ba chana.

⁷Niɣi mini bɛ ni booni biŋkɔb’ so bɛɛr la ni ti laɣim ŋubiri mɔri, ka bɛ bihi ti laɣim doya. Ka gbuɣinli ni ti ŋubiri mɔri kaman nahu la.

⁸Bimɔɣiriga ni ti be gariŋga voli gbini diɛmda, ka bia ŋun ŋmaai bihili ni ti zaŋ o nuu tim bahiga voli ni.

⁹ Binshɛli ku niŋ ba n zoli din be kasi la zuɣu. Dama Yawɛ baŋsim ni ti pali dunia ŋɔ ni kaman kom ni pali teeku shɛm la.

¹⁰ Dahin shɛli kanna, ka so ni ti yi Jɛsi zuliya ni na n-lee shihirili zuliya kam sani, ka o biɛhigu shee ni ti viɛla, ka niriba ti bɔhiri bɔr’ o shee.

¹¹Dindali maa ti Duuma ni ti lan zaŋ o niriba bɛn kpalim be tinduya ni la labisi yiŋ’ na yaha. O ni ti yihi ba Asiria mini Ijipti ni Patrɔs ni Itiɔpia[6] ni Ɛlam ni Babilɔn ni Hamat ni teeku duli tinsi ni teeku noli tinsi ni na.

¹²O ni ti wuhi zuliya kam shihirili ni o lan laɣindi Izraɛlnim’ mini Judanim’ bɛn daa wurim be dunia ŋɔ yaɣa anahi ŋɔ ni la.

¹³Ifriim zuliya ni ti chɛ nyuli zabbu, ka Juda zuliya dimdi la ti kpi. Ifriim zuliya ti ku lan zab’ Juda zuliya nyuli; ka Juda zuliya mi ti ku lan nyɛ Ifriim zuliya dimnima.

¹⁴Bɛ ni lu Filistianim’ bɛn be wulinluhili polo la zuɣu. Bɛ ni ti laɣim di ninvuɣ’ shɛb’ bɛn be wulimpuhili polo nim’ nɛma. Bɛ ni ti nyaŋ Ɛdomnim’ mini Mɔabnima, ka Ammɔnnim’ ti jɛmdi ba.

¹⁵ Yawɛ ni chɛ ka Ijipti mɔɣili la kom nyuui, ka chɛ ka pɔhim tulli ʒe na ti kpe Yufretiiz Mɔɣili ni. Ka o ti pirigi li kulibombih’ ayopɔin m-mali soli ti ba ka bɛ chaŋ tiŋ’ du.

¹⁶Dinzuɣu bɛ ni ti ŋme solɔɣu yi Asiria na, ka o niriba bɛn kpalim maa dol’ li kaman o ni daa mali soli ti Izraɛlnim’ shɛm saha shɛli bɛ ni daa yi Ijipti na la.