Read Dagbani Aizaia 13 Bible Online

Aizaia 13 - Dagbani bible

Aizaia 13

¹Amɔz bia Aizaia ni daa deei yɛtɔɣ’ shɛli zaŋ chaŋ Babilɔnnim’ polo m-bɔŋɔ:

²Duhimiya tuuta zuɣusaa daboli din nyɛ zaɣ’ nɛli zuɣu. Kuhimiya yɛli tɔbbihi, ka kpuɣi yi nuhi zuɣusaa wuhi ni yi cham’ ti liri tin’ shɛli din niriba mali karimbaani la.

³Man’ Yawɛ maŋmaŋ’ ni chɛ ka n ni niŋ n tɔbbi’ shɛb’ naani, ka mali ba nyuri bara la tuhi n suhu ni yiɣisi bahi ninvuɣ’ shɛb’ zuɣu.

⁴Wummiya zoya zuɣu vuri, salo vuri n-nyɛ li. Wummiya nama balibu mini zuliya balibu niriba tab’ laɣimbu vuri. Yawɛ ŋun nyɛ Tɔbbihi Naa ŋɔ n-laɣindi tɔbbihi ni o tuhi tɔbu.

⁵Bɛ yila dunia ŋɔ luɣ’ shɛlikam zaa na. Yawɛ zaŋ o suhuyiɣisili bidibbina na ni o ti saɣim dunia ŋɔ zaa.

⁶ Yawɛ dabisili dali miriya. Kpiɔŋlan’ Naa ni yɛn tahi saɣiŋgu na dabisi’ shɛli dali maa miriya. Fabilimiya!

⁷Dinzuɣu sokam bɔɣiri ni cheei kom, ka bɛ ku lan mali suhukpeeni.

⁸Bɛ ni ti nya biɛrim, ka dabiɛm kpe ba pam. Biɛrim maa ni ti ŋmanila paɣ’ ni yi wolisiri ni o dɔɣi ka biɛrim shɛli mal’ o la. Bɛ ni ti lihiri tab’ ninni ka dabiɛm mali ba. Bɛ nini ni ti mooi.

⁹Nyamiya, Yawɛ dabisili maa dali shiri kanna. Di ti yɛn nyɛla o sujee min’ o suhuyiɣisili ni o putɔɣu niŋbu dali. O ni ti chɛ ka dunia ŋɔ kpalimla tiŋgban’ nɛli, ka ku alahichinim’ bɛn be di ni zaa.

¹⁰ Saŋmarisi bɛn laɣim gbilligbilli be zuɣusaa ŋɔ ti ku ne; ka wuntaŋ’ ti ku ne o puhibu na saha, ka goli ti ku piɛla.

¹¹N ni darigi dunia ŋɔ nim’ tibili bɛ tuumbiɛri zuɣu, ka darigi ninvuɣ’ biɛri tibili bɛ tuumbiɛri zuɣu. N ni siɣisi karimbaannim’ mini bɛnkam duhiri bɛmaŋa ni putɔɣunima.

¹²N ni chɛ ka daadamnim’ nyabu ti niŋ tom kaman salima din viɛla nyabu ni to shɛm la, ka chɛ ka ninsalinim’ nyabu niŋ tom kaman Ofiri salima nyabu ni to shɛm la.

¹³Dinzuɣu man’ Yawɛ sujee ni n suhuyiɣisili maa dali, n ni ti chɛ ka zuɣusaa dam, ka chɛ ka tiŋgbani dam pam di biɛhigu shee.

¹⁴Tinzunnim’ ni ti yiɣisi guui kaman tɔhinima n-kari doli ba la bee kaman piɛri bɛn ka gul’ la n-kuli bɛmaŋmaŋ’ tiŋgbana ni mini bɛ niriba sani.

¹⁵Bɛ yi ti nya so, bɛ ni zaŋ bini kuh’ o ka di pili yi, ka bɛ mi yi ti gbaai so, bɛ ni zaŋ takɔb’ ku o.

¹⁶Bɛ ni zaŋ bɛ biliɛri fiɛbi bina chɛrisichɛrisi bɛ ninni, ka ʒe bɛ yinsi nɛma, ka bili bɛ paɣiba.

¹⁷Nyama, n chɛ ka Miidianim’ maani shili ni bɛ liri ba. Bɛ je anzinfa, bɛ mi baɣa ka salima ni.

¹⁸Bɛ ni zaŋ bɛ tɔbiri mini bɛ piɛma n-to n-ku bipola. Bɛ ku zo biliɛri mini bibihi nambɔɣu.

¹⁹ Babilɔn nyɛla nam tiŋgban’ suŋ gari nam tiŋgbana zaa. Di nyɛla Kalidianim’ jilima ni bɛ ni mali shɛli nyuri bara. Man’ Naawuni ni wurim li kaman n ni daa wurim Sɔdom mini Gomɔra shɛm la.

²⁰So ku lan be nimaani saha shɛlikam yaha. Laribunim’ ku lan ti bɛ suɣa zali nimaani. Piɛguliba mi ku lan chɛ ka bɛ piɛri dɔni nimaani.

²¹ Amaa mɔɣu ni biŋkɔbiri n-ni be nimaani. Ka viri mini taatahi kpe m-be bɛ yinsi; ka mɔɣu ni buhi be nimaani n-yiɣiri jamda.

²²Kunduna ni ti tam bɛ pihi zuɣu kumda, ka yɔbahi be bɛ nayili viɛla puuni kumda. Babilɔn saha miriya, ka di dabisili ku lan tirisi tooni.