Read Dagbani Aizaia 26 Bible Online

Aizaia 26 - Dagbani bible

Aizaia 26

¹Dindali maa, niriba ni ti yili yilli ŋɔ Juda tiŋgbɔŋ ni yɛli, “ Ti tiŋ’ ŋɔ mali yaa! Naawuni n-nyɛ ŋun guli di goma!

²Yoomiya tiŋ’ maa dunoya, ka chɛ ka zuliya shɛli din niriba nyɛ wuntizɔriba ka ʒe yim ŋɔ gari kpe.

³A ni ti ninvuɣ’ shɛb’ bɛn ʒe yim, ka lihir’ a ninni la suhudo’ maŋli, bɛ ni niŋ a naani zuɣu.

⁴Niŋmiya Yawɛ naani sahakam, dama Yawɛ ŋun nyɛ Naawuni maa n-taɣiri ti ka chɛri zaɣ’ biɛɣu sahakam.

⁵O filim karimbaannima; ka saɣim bɛ tiŋ’ din mali yaa; ka daai di goma luhi tiŋa.

⁶Bɛn nyari nahiŋgu mini nandaamba ni be di ni chani gindi ka mali bɛ naba nɔri li.

⁷Nyin’ ŋun be tibi ŋɔ m-mali soli din be polipoli ti wuntizɔriba. Bɛ ni doli so’ shɛli nyɛla so’ viɛlli.

⁸Yawɛ, ti dolila a yubu ni nyɛ shɛli, ka niŋ a ni doli so’ shɛŋa kariti saria naani. A kɔŋko ka ti kul bɔra.

⁹N suhu zaa kul yɛla a zuɣu yuŋ. Nyini ka n suhu zaa kul bɔra. Dama a yi kari dunia mini niriba bɛn be di ni saria, di chɛmi ka bɛ baŋdi din tuhi.

¹⁰A yi niŋ ninvuɣ’ biɛri nirilim, bɛ bi bɔhindi din tuhi niŋbu. Hal bɛ ni kul be wuntizɔriba tiŋgbɔŋ ni la zaa yoli, bɛ bi niŋdi din tuhi. Bɛ bi saɣi ni Yawɛ nyɛla ŋun galisi.

¹¹ Yawɛ, a kpuɣ’ a nuu zuɣusaa, amaa bɛ bi nya li. Chɛ ka bɛ baŋ a ni yur’ a niriba shɛm, ka chɛ ka bɛ di vi. Zaŋm’ a ni yɛn zaŋ buɣim shɛli wɔb’ a dimnim’ la wɔb’ ba.

¹²Yawɛ, a ni ti ti suhudoo; dama yɛlimaŋli, nyini n-chɛ ka ti niŋ ti ni niŋ shɛlikam zaa.

¹³Yawɛ ŋun nyɛ ti Naawuni ŋɔ, duumanim’ shɛba n-yi su ti, amaa a kɔŋko ka ti mi.

¹⁴Bɛ kpiya ka ku lan be yaha. Bɛ shihi ku lan yiɣisi, dama a darigi bɛ tibili ka chɛ ka bɛ kpi; so ku lan teei bɛ yɛla yaha.

¹⁵Amaa Yawɛ, a chɛ ka ti yɛligi, ka chɛ ka ti tiŋgbɔŋ tintarisi yɛligi pahi, ka ti ti a jilima di zuɣu.

¹⁶Yawɛ, a ni daa darig’ a niriba maa tibili la, bɛ nandahima puuni, bɛ daa suh’ a pam.

¹⁷Yawɛ, a chɛ ka ti kuhimi kaman paɣa ni wolisiri ni o dɔɣi ka kuhiri biɛrim zuɣu shɛm la.

¹⁸Ti daa wolisirimi ka kuhiri biɛrim zuɣu, amaa ka ti lee bi dɔɣi shɛli. Ti bi di nasara; ti mi bi dɔɣi so ni o zani ti zaani dunia ŋɔ ni.

¹⁹Yi ninvuɣ’ shɛb’ bɛn kpi ni ti neei kum ni. Yinim’ bɛn zaa kpi m-be gbala ni, yiɣisimiya yili suhupiɛlli yila. Maligim ni luri mahigiri tiŋgbani shɛm la, lala ka tiŋgbani yɛn chɛ ka ninvuɣ’ shɛb’ bɛn pun kpi la neei.”

²⁰N niriba, kpɛmiya yi duri ka yo yi dunoya. Sɔɣimiya ka di tooi biɛla ha, ka Naawuni suhuyiɣisili maa saha gari.

²¹Dama Yawɛ ni yi o biɛhigu shee alizanda ni kana ti darigi dunianim’ tibili bɛ tuumbiɛri zuɣu. Bɛ ni daa ku ninvuɣ’ shɛb’ ashilɔni zaa yɛla ni ti yi palo, ka tiŋgbani ti ku lan sɔɣi bɛ ni daa ku ninvuɣ’ shɛb’ maa.