Read Dagbani Aizaia 28 Bible Online

Aizaia 28 - Dagbani bible

Aizaia 28

¹Izraɛl zuliya nam be barina ni. Di tipum zuɣupiligu din mali jilima, ka pili bɛ zuɣulaannim’ bɛn yu nam pam zuɣuri ni la nyɛla din kpaara. Bɛ zuɣuri zaa nyola tulaale, amaa ka bɛ lee nyu wain buɣi do nimaani.

²Nyama, ti Duuma mali ninvuɣ’ so ŋun mali kpiɔŋ ni yiko din ni tooi lu bɛ zuɣu. O ni kana kaman sakuɣa saa bee sa’ kurili ni kopaliga nti di tiŋgbani maa.

³Zuɣulaannim’ bɛn nyɛ karimbaannim’ ni bɛn nyu wain buɣi la, bɛ ni ti no n-taai ba.

⁴Zuɣulaannim’ bɛn nyɛ karimbaannim’ maa jilima la ni ti kpaai kaman fiig tihi walibu saha tiwal’ shɛŋa din daŋ moobu ni yi luna ka bɛ pihi li, ka di nuu ni paabu n-to ka bɛ pun di li la.

⁵Dahin shɛli kanna, ka Yawɛ ŋun nyɛ Tɔbbihi Naa ŋɔ ni ti ŋmanila tipum zuɣupiligu din mali jilima o niriba bɛn tiligi sani.

⁶O ni ti chɛ ka bɛn nyɛ sariakaritiba doli yɛlimaŋli soli, ka ti bɛn ʒe dunɔdali gbini kariti bɛn kanna ni bɛ ti liri ba la suhukpeeni.

⁷Hal maligumaaniba mini anabinim’ gba nyurila wain n-chani laana. Bɛ nyula wain maa mini binnyur’ kpɛma n-chani laani ka birim. Bɛ bi lan baŋdi ʒii nyabu gbinni, bɛ mi bi lan kariti saria din tuhi.

⁸Bɛ teebuya zuɣu zaa nyɛla tiri, ka di luɣ’ shɛli ka nyam.

⁹Ka niriba bɔhira, “Bɔ ka o lee yɛn zaŋ wuhi ti? Ka yɛtɔɣ’ bɔ ka o lee yɛn zaŋ yɛl’ ti? Bihi bɛn ŋmaai bihili kɔŋko ka o yɛligu ni sɔŋ?

¹⁰Dama o kul wuhirila zaligu yiniyini mini wuhibu yiniyini ni kuligakuliga ni biɛlifu kpe, biɛlifu kpe.”

¹¹Yɛlimaŋli yi yi ku wum n ni yɛli shɛm, Naawuni ni chɛ ka tinzunnim’ zaŋ tinzun’ yɛtɔɣa wuhi ya.

¹² Yinima ninvuɣ’ shɛb’ o ni pun yɛli, “N tin ya vuhim mini suhudoo, amaa ka yi zaɣisi ni yi ku wum ti ma.”

¹³Dina n-chɛ ka Yawɛ wuhiri ya la zaligu yiniyini mini wuhibu yiniyini ni kuligakuliga ni biɛlifu kpe ni biɛlifu kpe. O niŋla lala ni di chɛ ka yi lɛb’ lu yi kpaya zuɣu n-nya dansi, ka zana gbahi ya, ka bɛ zaŋ ya chaŋ ti leei daba.

¹⁴Pumpɔŋɔ, yinim’ bɛn nyɛ ansarisimaaniba, ka di nam ʒini Jɛrusalɛm n-su n niriba ŋɔ, wummiya man’ Yawɛ ni yɛn’ yɛli shɛm.

¹⁵“Yi nyuri bara yɛri ni yinim’ laɣila kum zɔri, ka yi mini kpiimba biɛhigu shee lo tab’ alikauli. Yi niŋ yɛda ni alɔbo yi lu, di ku din ya, dama yi tɛhiya ni ʒiri mini yɔhiŋgu ni tiligi ya.”

¹⁶ Dinzuɣu yi Duuma ŋun nyɛ Yawɛ ŋɔ yɛliya, “Nyamiya, n zaŋla duu tanzaa kuɣili sɔŋ Ziɔn. Di nyɛla kuɣ’ shɛli din viɛli ka mali kpiɔŋ; ka ni chɛ ka duu tanzaa mali yaa. ‘Ka ŋunkam niŋ o yɛda ku zo dabiɛm.’

¹⁷Din tuhi niŋbu n-yɛn nyɛ di buɣisibu vulo, ka yɛlimaŋli nyɛ di bimbuɣisirigu.” Sanʒiɛɣu ni ʒe yi ni niŋ ʒiri shɛli yɛda la bahi, ka kokpɛɣu mi ʒi yi ni niŋ yɛda ni binshɛli ni tiligi ya la chaŋ.

¹⁸Di saha ka yi mini kum zɔri la saɣim, ka yi mini kpiimba biɛhigu shee alikauli la yiɣisi. Di nyaaŋa alɔbo yi ti lu, di ni din ya.

¹⁹Di ni lu yi zuɣu n-din ya; di ni lu yi zuɣu asiba n-gari yim, ka lu yi zuɣu wuntaŋ’ ni ni yuŋ. Ka yɛl’ biɛɣu kam ni chɛ ka yi baŋ Naawuni yɛligu gbinni!

²⁰Dinzuɣu yi ni ti ŋmanila ŋahili shɛli din wuhi: Bindoo bi waɣa ka nir’ ni tooi teeg’ omaŋ’ dɔni di zuɣu, ka chinchini gba bi yɛlima, ka nir’ ni tooi zaŋ li pil’ omaŋa.

²¹ Yawɛ ni yiɣisi tuhi kaman o ni daa niŋ shɛm Pɛrazim Zoli zuɣu mini Gibiɔn vinvamli ni la din ni chɛ ka o tum o ni lo ni o tum shɛm. O ni yɛn tum shɛli maa yi kul nyɛ yɛl’ saani kabo, o ni bahi tum o tuma din nyɛ alahiziba tuma maa naai.

²²Dinzuɣu pumpɔŋɔ di chɛliya ka n ni zaŋ yɛtɔɣ’ shɛŋa kpahiri yi zuɣu ni ŋɔ kun ya lari. Yi yi niŋ lala, di ni chɛ ka yi tiligibu niŋ tom. Dama n wum ti Duuma Yawɛ ŋun nyɛ Tɔbbihi Naa ŋɔ ni zali ka wuhi ni o ni saɣim tiŋgbɔŋ ŋɔ zaa shɛm.

²³Wummiya n ni yɛri ya shɛm. Chɛliya ka yi baɣa be n yɛligu ni.

²⁴Pukpar’ so n-na ʒi n-kɔr’ o puu n-kul kɔri li yɛrigira.

²⁵O yi kul ko o kɔbu, o biritila o bimbira din nyɛ nili mini buŋgu, ka biri alikama doli vuɣisi, ka biri chi di biribu shee, ka biri binshɛŋa din pahi dolisi putarisi.

²⁶O mi o tuma ni nyɛ shɛli, dama Naawuni n-nyɛ ŋun wuh’ o.

²⁷O bi zaŋdi kaburi jaambɔn’ titali buri buŋgu bee n-zaŋdi naɣikɔra tɔroko nɔri nili, amaa kaburi jaambɔn’ bila ka o zaŋdi buri buŋgu, ka zaŋdi li ŋmari nili.

²⁸O bi zaŋdi bini din ni saɣim siŋkaafa buri li. O mi o ni yɛn niŋ shɛm zaŋ naɣikɔra tɔroko kpe di ni no li ka di biɛlim ku bɔɣi.

²⁹Dimbɔŋɔ gba nyɛla din yi Yawɛ ŋun nyɛ Tɔbbihi Naa ŋɔ sanna. O saɣisiri niriba viɛnyɛliŋga, ka nyɛ yɛm zaalana.