Read Dagbani Aizaia 29 Bible Online

Aizaia 29 - Dagbani bible

Aizaia 29

¹Wɛi, yɛl’ biɛɣu ni paai Jɛrusalɛm din nyɛ Naawuni sara maligu bimbini, ka nyɛ Dauda ni daa be tin’ shɛli ni la. Chɛ ka churi ŋɔ kul puhiri yuuni kam.

²Di saha ka Naawuni ni chɛ ka yɛl’ biɛɣu kana ti paai tin’ shɛli bɛ ni booni “Naawuni sara maligu bimbini” la. Ka niriba ni ti kumdi ka fabinda, ka tiŋ’ maa zaa ni be kaman ʒim ni ŋam sara maligu bimbin’ shɛli.

³Naawuni ni ti lu tiŋ’ maa zuɣu m-me bindura tabili di gooni gili.

⁴Jɛrusalɛm, a ni ti bela tiŋgbani puuni ha tɔɣisiri yɛtɔɣa, ka a yɛtɔɣa yiri tiŋgban’ ni na. A kukoli ni ti ŋmanila kpim’ kukoli n-yiri tiŋgban’ ni na. A ti yɛn sɔɣirimi yɛri ka di yiri tiŋgban’ ni na.

⁵Jɛrusalɛm, n ni pɔbisi tinzunnim’ bɛn lir’ a zaa bahi kaman taŋkpaɣu la, ka chɛ ka bɛ tɔbbihi bɛn zɔr’ dabiɛm zo yomyom kaman pɔhim n-ʒe wurigu chaŋ la. Nini pɔbbu ni neebu

⁶ka Yawɛ ŋun nyɛ Tɔbbihi Naa ŋɔ ni chɛ ka saa tahibu mini tiŋgbani dambu ni pɔhim biɛɣu ni buɣim biɛɣu kana nti fa a bahi.

⁷Di saha maa tinzun’ tɔbbihi bɛn zaa kana ti liri tin’ shɛli din nyɛ Naawuni sara maligu bimbin’ la mini bɛ bidibbina ni bɛ tɔbutuhiri’ nɛma ni bɛ binshɛɣukam zaa ni ti yiɣi ka firi kaman zahindi la bee nir’ ni nya binshɛli ʒii yuŋ shɛm la.

⁸Tinzunnim’ bɛn zaa laɣim ni bɛ liri Ziɔn Zoli zuɣunima ni ŋmanila kum ni mali ninvuɣ’ so, ka o dɔni zahim zahindi ka o diri la bindirigu, ka yirigi neei ka kum na kul mal’ o la bee kaman kɔnyuri ni mali ninvuɣ’ so, ka o dɔni zahim zahindi ka o nyurila kom, ka yirigi neei ka kɔnyuri na kul mal’ o la.

⁹Kul leemiya jɛra! Kul leemiya zoomba! Buɣimiya n-chani laana, ka bi nyu wain bee binnyuri kpɛma!

¹⁰ Dama Yawɛ chɛ ka gom gbaai ya ni yi gbihi gbihiri biɛɣu. O pɔbi yi daanabinim’ nina, ka zaŋ bini pili yi nyariba zuɣuri.

¹¹Dimbɔŋɔ zaa ʒii nyabu ŋmanila bɛ ni zaŋ bini dihi litaafi shɛli noli tabili puuni yɛtɔɣa, ka so yi zaŋ li ti ninvuɣ’ shɛb’ bɛn mi karimbu ka yɛli ba, “Karimmiya litaafi ŋɔ,” bɛ ni yɛli, “Ti ku tooi karim li, bini ka bɛ zaŋ dihi di noli tabili.”

¹²Ka so yi zaŋ li ti ninvuɣ’ shɛb’ bɛn ʒi karimbu ka yɛli ba, “Karimmiya litaafi ŋɔ,” bɛ ni yɛli, “Ti ʒi karimbu.”

¹³ Ti Duuma yɛliya, Niriba ŋɔ yɛri ni bɛ jɛmdila mani, amaa ka bɛ ni yɛri shɛm ka gbinni, dama bɛ suhuri bela katiŋ’ ka chɛ ma. Ninsalinim’ zaligunim’ mini bɛ kaya soli ka bɛ doli jɛmdi ma.

¹⁴ Dinzuɣu n ni tum alahiziba tuma niriba ŋɔ sani, ka di gari ba ka niŋ ba alahiziba. Ninvuɣ’ shɛb’ bɛn nyɛ yɛnnim’ ni leei jɛra, ka bɛ yɛm maa leei din ka buchi.

¹⁵Mbusim be yinim’ bɛn zaŋ yi ni lo nia shɛŋa sɔɣi Yawɛ, ka tumdi yi tuma zibisim ni ŋɔ zuɣu, dama yi yɛra, “So bi nyari ti, So mi bi mi ti.”

¹⁶ Bɛ lɛbila yɛla pili ma. Yaɣimɛra mini yaɣiri pala yim. Bɛ ni mali binshɛli ku tooi yɛli ŋun mal’ li, “Pa nyini m-mali ma;” bee bɛ ni nam bin’ so ku tooi yɛli ŋun nam’ o, “A bi nam ma viɛnyɛliŋga.”

¹⁷Di ku yuui ka nyɔŋ puuni leei kɔbu shee kɔbu shee mi leei nyɔŋ.

¹⁸Dindali maa tikpiranim’ ni ti wum bɛ ni karindi litaafi puuni yɛri shɛm, ka zoomba bɛn be zibisim ni ti neei bɛ nina lihi nya.

¹⁹Nandaamba mini faranima ni ti lan nya suhupiɛl’ shɛli Yawɛ ŋun nyɛ Izraɛlnim’ Naawuni ŋun be kasi ŋɔ ni tiri la.

²⁰Ninvuɣ’ shɛb’ bɛn nahindi bɛ taba, ka maani ba ansarisi la ti ku lan beni. Bɛ ni ti ku tuumbiɛtumdiba zaa.

²¹Naawuni ni ti ku ninvuɣ’ shɛb’ bɛn zuri bɛ tab’ nyaaŋa mini bɛn fari tuumbiɛtumdiba bahira saria karibu ni ni bɛn ŋmari ʒiri m-mɔŋdi bɛn ka taali yɛlimaŋli la.

²²Dinzuɣu Yawɛ ŋun daa tiligi Ibrahimma o muɣisigu puuni la yɛli Yaakubu zuliya, “ Yi ku lan di vi, yi mi ninni biɛhigu ku lan taɣi.”

²³Bɛ nini yi ti nya bi’ shɛba n ni yɛn ti ba, di saha bɛ ni baŋ ni mani ŋun nyɛ Yaakubu zuliya Naawuni ŋun be kasi ŋɔ n-tum lala maa, ka ti ma jilima ka lu man’ ŋun nyɛ Izraɛl Naawuni ŋɔ sizuura.

²⁴Ninvuɣ’ shɛb’ bɛn nyɛ jɛra ni bɔhim baŋ, ka ninvuɣ’ shɛb’ bɛn kul ŋumdi bɛ kparima ni waawaayil’ la ni bɔri ni bɛ nya wuhibu, ka bɛ suhuri paligi.