Read Dagbani Aizaia 32 Bible Online

Aizaia 32 - Dagbani bible

Aizaia 32

¹Nyama, Na’ so ŋun doli yɛlimaŋli soli ni ti di nam, ka o kpambaliba nyɛ bɛn tumdi din tuhi.

²Bɛ zaa yinoyino ŋmanila luɣ’ shɛli nira ni ni zo nti sɔɣi tiligi pɔhim bee sanʒiɛɣu. Bɛ ŋmanila kɔzɔrim din zo n-tiɛli tiŋgban’ nɛli, ka ŋmani mahim din be tiŋgban’ nɛl’ ni tampin’ titali lɔŋni.

³Di saha bɛ ni ti neei bɛ nina, ka gbilisi bɛ tiba wum niriba yɛlimuɣisira.

⁴Ninvuɣ’ shɛb’ bɛn niŋdi yomyom bɛ tɛha ni ni ti leei baŋdiba, ka bɛn tɔri birilim ti tɔɣisi yɛtɔɣa din niŋ kamaata ni viɛnyɛliŋga.

⁵So ku lan zaŋ jɛrigu boli ninvuɣ’ titali bee n-zaŋ yɛmbimbiɛrilana boli ninvuɣ’ suŋ.

⁶Dama jɛrigu tɔɣisirila jɛrilim yɛtɔɣa, ka tɛhiri zaɣ’ biɛɣu tumbu yɛla. O ni tumdi shɛm min’ o ni yɛri shɛm nyɛla biriginsim zaŋ chaŋ Yawɛ sani. O mi na ʒi n-ti kum ni mali shɛb’ bindirigu bee n-niŋ kom ti kɔnyuri ni mali ninvuɣ’ shɛba.

⁷Ninvuɣ’ biɛɣu tuma nyɛla tuumbiɛri. O nyɛla ŋun zaŋ ʒiri ni o tum faranim’ barina, ka niŋdi din ni chɛ ka nandaamba kɔŋ yɛlimaŋli.

⁸Amaa ninvuɣ’ titali nyɛla ŋun tumdi din doli yɛlimaŋli soli, ka ʒe din tuhi nyaaŋa.

⁹Yinim’ paɣ’ shɛb’ bɛn nya vuhim, ka tɛhi ni shɛli bi mali ya la, yiɣisimiya wum n ni yɛn yɛli shɛm.

¹⁰Di ku paai yuuni ka yinim’ bɛn nya vuhim ŋɔ ni’ sɔhigi. Wain tihi ku wali, ka di daatam kpuɣibu ku beni.

¹¹Yinim’ paɣ’ shɛb’ bɛn nya vuhim ŋɔ, chɛliya ka yi ni’ sɔhira. Tɛhi’ shɛli ni bi mali yinim’ shɛb’ ŋɔ, chɛliya ka dabiɛm mali ya. Pirigimiya yi situra sɔŋ, ka zaŋ buri so yi shɛhi ni.

¹²Bumiya yi nyɔri ni suhusaɣiŋgu yi tiŋgbani din vuhiri mini yi tiwala tihi din saɣim la zuɣu.

¹³Dama gɔhi mini suligunyinyari bilila n niriba tiŋgban’ ni. Iin, kummiya suhupiɛlli ni daa be yil’ shɛŋa ni mini tin’ shɛl’ ni la zuɣu.

¹⁴Dama hal so ku lan be nayili, bɛ ni ti zo zaa ka chɛ tiŋ’ maa. Ka tiŋgula biɛhigu shee mini yiya lu n-dahim zaa n-kul doya sahakam. Ka nimaani leei mɔɣu ni bunsi gɔrim shee ni piɛri mɔri ŋubbu shee.

¹⁵Amaa Naawuni ni lan chɛ ka o shia siɣi ti zuɣu na, ka chɛ ka tiŋgban’ shɛli din kpi la leei tiŋgban’ shɛli din vuhira; ka puri atam niŋ pam.

¹⁶Di saha yɛlimaŋtali ni ti be tiŋgban’ nɛli ni, ka wuntitali mi ti be tiŋgban’ shɛli din vuhir’ ni.

¹⁷Ka wuntia tuma maa tahi suhudoo mini biɛri baalimtali ni naani niŋbu na sahakam.

¹⁸N niriba ni ti be suhudoo mini alaafee ni vuhim ni be luɣ’ shɛli,

¹⁹hal sakuɣa yi ti luna saɣim tibɔŋ la zaa, ka tiŋ’ maa lu n-dahim zaa.

²⁰Ninvuɣ’ shɛb’ bɛn ko n-dolisi kulibɔŋ bindira ni niŋ pam, ka bɛ suhiri paligi, ka niɣi mini bunsi gba nya mɔ’ suma ŋubi.