Read Dagbani Aizaia 34 Bible Online

Aizaia 34 - Dagbani bible

Aizaia 34

¹Zuliya kam ni niriba, kamiyana ti wum! Daadamnima, Wummiya! Dunia mini bɛnkam be di ni zaŋ tabili binshɛɣukam zaa, kamiyana ti wum!

²Yawɛ suhu yiɣisi bahi zuliya kam niriba zuɣu. O suhu yiɣisi bahi bɛ tɔbbihi zuɣu, ka zali ni o ni ku ba.

³Bɛ kpiimba ni ti yɛrigi luɣilikam, ka bɛ nyom yaɣi; ka bɛ ʒim ti zɔri teeni zoya zuɣu.

⁴ Wuntaŋ’ mini goli ni saŋmarisi ti ku lan beni, ka sagbana ti kpabikpabi kaman sɔŋ la; ka saŋmarisi ti luna kaman wain tia vari la bee kaman fiig tia wala ni suuri luri shɛm la.

⁵Yawɛ yi ti sahi o takɔbi maa naai alizanda ni, o ni zaŋ li lu Ɛdomnim’ bɛn nyɛ o ni zali ni o ku shɛb’ la zuɣu.

⁶Bɛ ʒim mini bɛ kpam ni ti ŋam Yawɛ takɔb’ maa kaman bɛ ni zaŋ piɛ’ shɛb’ mini bu’ shɛb’ mali sara ʒim ni bɛ kpam la. Dama Yawɛ ni mali sara Bɔzira. O ni ku niriba pam Ɛdom tiŋgbɔŋ ni.

⁷Daadamnim’ mini yɔnaɣila’ kara ni naɣila’ pola zaa ni ti lu n-doya. Bɛ ʒim ni ti zo n-tiɛli bɛ tiŋgbani, ka tiŋgbani maa nyu bɛ kpam tiɣi.

⁸Dama Yawɛ zali biɛri bɔhibu dabisili. O mi ni bɔhi biɛri maa ti Ziɔn.

⁹Ka Ɛdom mɔɣa leei kootaali, ka di tiŋgbani leei chilibi, ka di tiŋgbani maa taai buɣim di kaman kootaali la.

¹⁰ Buɣim ni di li wuntaŋ’ ni mini yuŋ zaa, ka di nyɔhi kpuɣi du zuɣusaa sahakam. Ka di tiŋgbani ni leei tiŋgban’ nɛli doya ʒiɛmani kam ni; ka so ku lan ka di ni na.

¹¹Ka viri mini kahiŋkɔri zaŋ li leei bɛ biɛhigu shee. Ka Yawɛ chɛ ka di lan leei tiŋgban’ kpiŋ yaha, kaman di ni daa pun be shɛm.

¹²Naa ti ku lan beni n-su bɛ tiŋgbɔŋ maa, ka nabihi zaa ti ku lan beni.

¹³Gɔhi ni ti zibigi bɛ nam yiya ni mini goma ni gili bɛ tin’ shɛŋa ni, ka yɔbahi mini viri ni be nimaani.

¹⁴Ka nimaani leei jɛŋgbina mini kunduna gɔbu shee, ka alizinnim’ be nimaani booni taba; ka Lilit[12] ni kani nimaani na ti vuhira.

¹⁵Viri ni ti te bɛ tɛri nimaani n-nye gala wɔɣi, ka dihiri bɛ bihi maa nimaani. Juri gba ni ti laɣindi nimaani.

¹⁶Vihimi Yawɛ kundi ni n-karim di ni yɛli shɛm. Biŋkɔbiri ŋɔ zaɣ’ yino ku pooi, ka bɛ mi zaa so ku kɔŋ bala. Dama Yawɛ n-zali ni di niŋ lala. Omaŋmaŋ’ Shia ni laɣim ba na.

¹⁷ Ŋuna n-yɛn pirigi tiŋgbani maa n-wuhi di tarisi ni nyɛ shɛm n-zaŋ li tari ba; ka bɛ kul su li sahakam, ka be di ni ʒiɛmani kam ni.