Read Dagbani Aizaia 35 Bible Online

Aizaia 35 - Dagbani bible

Aizaia 35

¹Tiŋgban’ nɛli ni ti mali suhupiɛlli, ka tiŋgban’ kuŋ gba ti mali suhupiɛlli ka bimpuma ti yirigi di ni m-be kaman taaŋkɔro la.

²Tiŋgban’ nɛli maa ni ti mali bimpuma pam, ka yili yila ni suhupiɛlli. Di viɛlim ni ti be kaman Lɛbanɔn zoya zuɣu viɛlim ni be shɛm la, ka di tiŋgbani vuhiri kaman Kamɛl Zoli mini Sharɔn vinvamli la. Ka sokam nya Yawɛ jilima ni ti Naawuni maa ni galisi shɛm.

³ Kpaŋsimiya bɛn nuhi gbarigi la mini bɛn duna gbarigi la.

⁴Yɛlim’ bɛnkam suhuri zɔhiri la, “Maliya kpiɔŋ ka di zɔriya dabiɛm! Yi Naawuni maa yɛn kamina ti bɔhi yi dimnim’ biɛri tin ya, ka tiligi ya.”

⁵Di saha zoomba nina ni ti neei, ka tikpiranim’ wum.

⁶ Gbariti ni ti yiɣi jɛm kaman waliga la, ka biriti ti yili yila ni suhupiɛlli. Kom ni ti zɔri yiri tiŋgbani din nyɛ zaɣ’ nɛl’ la ni na. Ka mɔɣa ti dɔni di ni.

⁷Ka mɔɣili dɔni bihigu tiŋgban’ tulli shee; ka tiŋgban’ kuŋ shee leei kɔbil’ nina. Ka mɔri zooi lim kunduna ni daa yi be luɣ’ shɛli.

⁸Solɔɣu ni ti be nimaani ka di yuli booni “Soli din be kasi.” Ninvuɣ’ shɛb’ bɛn be daɣiri ni ti ku doli soli maa; ka sochanda ŋun nyɛ jɛrigu gba ti ku yirigi soli maa zuɣu.

⁹Gbuɣima ti ku be nimaani, biŋkɔb’ biɛɣu mi ti ku doli soli maa. Ninvuɣ’ shɛb’ bɛn tiligi kɔŋko nti yɛn dol’ li.

¹⁰Yawɛ niriba bɛn tiligi ni ti yili yila kpe Jɛrusalɛm. Bɛ suhugarigu mini bɛ nandahima ni ti naai, ka bɛ leei bɛn mali suhupiɛlli sahakam.