Read Dagbani Aizaia 40 Bible Online

Aizaia 40 - Dagbani bible

Aizaia 40

¹Yi Naawuni yɛliya, “Maamiya n niriba suhuri, maamiya bɛ suhuri!

²Tɔɣisimiya Jɛrusalɛmnim’ suhumaabo yɛtɔɣa. Yɛlimiya ba ni bɛ di wahala saɣi lala. N darigi bɛ tibili ka di saɣi, ka yipa chɛ bɛ daalahichi taali zaa pumpɔŋɔ.”

³ Kukol’ shɛli n-kuhiri yɛra: “Malimiya soli mɔɣu ni ti Yawɛ! Malimiya soli maa tiŋgban’ nɛli ni ka di tuhi ti ti Naawuni maa!

⁴Ŋarimiya yiliŋ kam, ka gbi zoya mini kuŋkuna ka di siɣi n-leei tintani, ka mali luɣ’ shɛŋa din be gbirimagbirima la ka di niŋ polipoli.

⁵ Di saha Yawɛ jilima ni yi zahira ka sokam zaa nya li. Man’ Yawɛ n-yɛli lala.”

⁶Ka kukol’ shɛli daa kuhi yɛli, “Molimi molo!” Ka m bɔhi, “M molimi molo bɔ? Ka o yɛli ma, “Molimi molo yɛli ni ninsalinim’ zaa ŋmanila mɔri; bɛ bi yuuri gari tipum.”

⁷Yawɛ yi ti vuhi pam bahi mɔri zuɣu, di kuurimi, ka tipum kpahiri lura; yɛlimaŋli, ninsalinim’ shiri ŋmanila mɔri.

⁸ Mɔri shiri kuura, ka tipum kpahiri lura, amaa ti Naawuni maa ŋun’ yɛligu kul ni beni sahakam.”

⁹Ziɔnnima, dumiya zoya zuɣu nti moli lahiba’ suŋ molo. Jɛrusalɛmnima, duhimiya yi yee moli lahiba’ suŋ molo. Duhimiya yi kukoya pam yɛli Juda fɔntinsi ni nima, “Yi Naawuni kanna! Di zɔriya dabiɛm.”

¹⁰ Nyamiya, ti Duuma ŋun nyɛ Yawɛ ŋɔ kanimina ni o ti zaŋ yiko pam di nam. O ni tiligi ninvuɣ’ shɛb’ bɛn be o sani; o laara gba be o sani.

¹¹ O ni dih’ o piɛri kaman piɛgul’ ni dihir’ o piɛri shɛm la. O laɣisi piɛbihi niŋ o bɔɣiri ni, ka zaŋ ba buɣi o nyɔɣu zuɣu, ka zaŋ bɛ manim’ baalim kuli.

¹²Ŋuni n-na mi n-zaŋ o nuu tooi teeku kom m-buɣisi di ni nyɛ shɛm bee n-zaŋ o nutali buɣisi sagbana yɛliŋ, bee n-va tiŋgban’ ni taŋkpaɣu niŋ bini puuni, bee n-zaŋ zoya mini kuŋkuna pa sania zuɣu buɣisi li?

¹³ Ŋuni n-lee ni tooi wuhi Yawɛ Shia o ni yɛn niŋ shɛm bee ŋuni n-lee ni tooi wuh’ o shɛli bee n-saɣis’ o?

¹⁴Ŋuni ka o daa niŋ saawara ni o baŋ shɛli, ka ŋuni n-daa lee wuh’ o yɛlimaŋli soli. Ka ŋuni n-daa lee wuh’ o baŋsim bee n-wuh’ o o ni yɛn niŋ shɛm?

¹⁵Zuliya kam ŋmanila kom biɛla din tɔɣ’ lu bokati puuni, ka be kaman taŋkpa’ zim din pa sania zuɣu o sani. Nyama, ŋuna n-zahindi teeku ni gili tiŋgban’ bihi shɛŋa kaman taŋkpaɣu biɛla la.

¹⁶Lɛbanɔn tihi zaa dari ku saɣi sara maligu buɣim; ka di biŋkɔbiri zaa ku saɣi bɛ ni zaŋdi sara shɛli nyɔri buɣim la malibu.

¹⁷Zuliya kam zaa bi saɣi shɛli o sani. O bi lihi ba ka bɛ nyɛ shɛli o sani.

¹⁸Dindina, bɔ ka nir’ lee yɛn zaŋ Naawuni ŋmahindi bee bɔ ka nir’ lee yɛn zaŋ o buɣisi?

¹⁹ O bi ŋmani wun’ so tuumbaŋdiba ni mali zali, ka salindoora dooi salima pa di zuɣu, ka bɛ niŋ anzinfa zoligɔnim’ yɛliyɛl’ li la?

²⁰Nir’ yi bɔri ni o mali binshɛli n-zaŋ ti pini, o bɔrila da’ shɛli din bi dura n-zaŋ ti tuumbaŋda ka o mal’ li zali ka di ku lu.

²¹Yi na bi baŋ? Yi na ʒi n-wum? Bɛ pun bi yɛli ya kurimbuni ha? Yi bi mi dunia ni daa nam shɛm?

²²Ŋun ʒi o nam ʒiishee zuɣusaa ha n-daa nam li, ka ninsalinim’ bɛn be dunia ŋɔ ni ŋmanila salinsahi. O teela sagbana sɔŋ kaman sɔŋ la bee kaman tanti shɛl’ ni nir’ ni yɛn kpe m-beni.

²³O yihiri nanim’ nam ni, ka chɛri ka bɛ leeri bɛn pa shɛli.

²⁴Bɛ ŋmanila tibihi din nyaɣa na bi ba tiŋa, ka Naawuni yi chɛ ka tulim kana ti kpe li, di kuurimi ka pɔhim ʒe li ti bahi kaman wurigu la.

²⁵Dindina, ka bɔ ka nir’ lee yɛn zaŋ Naawuni ŋun be kasi ŋɔ buɣisi? So bi ŋman’ o.

²⁶Duhimiya yi zuɣuri lihi zuɣusaa. Ŋuni n-lee nam saŋmarisi? Ŋuna ŋun zali ba zaɣ’ bɔbili maa mi bɛ kalinli, ka mi bɛ zaa yuya. O yaa ni o yiko ni galisi zuɣu, o na ʒi n-kali pooi bɛ ni so.

²⁷Izraɛlnima, ka bɔ n-niŋ ka yi yɛri ni Yawɛ ʒi yi muɣisigu ni nyɛ shɛli bee bɛ yi ŋari ya, yi Naawuni baɣa kani?

²⁸Yi na bi baŋ? Yi na ʒi n-wum? Yawɛ n-kul nyɛ kurimbuni Naawuni. Ŋuna n-daa nam dunia ŋɔ zaa. Di bi wumd’ o, o mi bi gbarigira. So mi ku tooi baŋ o tɛha.

²⁹O tiri bɛn gbarigi yaa, ka tiri bɛn ka yaa yiko.

³⁰Hal di wumdi bipala ka bɛ gbarigira, ka di wumdi nachimba ka bɛ lura.

³¹Amaa ninvuɣ’ shɛb’ bɛn suhuri ye Yawɛ zuɣu ka bɛ guh’ o ni nya ya’ palli. Bɛ ni ti mali kpiɔŋ kaman tɔrili kpiŋkpama la. Bɛ ni guui ka di ku gbarigi ba. Bɛ ni chaŋ ka di ku wum ba.