Read Dagbani Aizaia 41 Bible Online

Aizaia 41 - Dagbani bible

Aizaia 41

¹Yinim’ bɛn nyɛ teeku dulinim’ ŋɔ, fomiya ka wum n ni yɛn yɛli ya shɛm ŋɔ. Di simdi ni zuliya kam labi neei bɛ kpiɔŋ. Bɛ zaŋm’ bɛ yɛtɔɣa kana ti tɔɣisi. Chɛliya ka ti laɣim saria karibu shee.

²Ŋuni n-lee zaŋ nasaridira ŋɔ yi wulimpuhili polo na, ka chɛ ka o diri nasara luɣ’ shɛlikam ŋɔ? O chɛ ka o nyaŋ nanim’ mini zuliya kam. O zaŋ o takɔbi tim bɛ ni n-niŋ ba kaman taŋkpaɣu la. Ka zaŋ o piɛma to n-wurim ba kaman wurigu la.

³O kari doli ba chani ni alaafee, ka di bi ŋman’ o naba shihiri tiŋa.

⁴Ŋuni n-lee zali dimbɔŋɔ ka niŋ li, ka wuhi ʒiɛmana yɛla piligu ni zaŋ kana? Man’ Yawɛ n-daa beni piligu ni, ka ni lan beni naabu ni.

⁵Teeku dulinim’ nyaya ka dabiɛm kpe ba, ka dunia ŋɔ luɣilikam nim’ niŋgbuna sɔhira, ka bɛ kab’ laɣimna.

⁶Ka bɛ sɔŋdi taba, ka yɛra, “M mali suhukpeeni!”

⁷Ka kapinta yɛli machɛle, “A niŋ viɛnyɛliŋga.” Ka ŋun kpɛri dari ka di niŋdi polipoli kpaŋsi ŋun kpahiri li tuɣiri taba ka yɛra, “Di tuɣibu maa viɛla;” ka bɛ zaŋ kpahikpahi li tuɣi taba, ka di ku tooi yihi.

⁸ “Amaa nyin’ Izraɛl ŋun nyɛ n dabili ŋɔ, nyin’ Yaakubu ŋun nyɛ n ni pii so, ka lan nyɛ n zo Ibrahimma zuliya ŋɔ;

⁹dunia ŋɔ luɣilikam ni ka n yih’ a na; ka bol’ a ka a yi dunia ŋɔ luɣ’ shɛlikam ni katiŋ’ na, ka n yɛl’ a, “A nyɛla n dabili. Mani m-piig’ a ka bi zaɣis’ a.”

¹⁰Di zɔri dabiɛm, m be a sani. Mani n nyɛ a Naawuni. Kul di zɔri dabiɛm! N ni ti a kpiɔŋ ka sɔŋ a, n ni tilig’ a ka gul’ a, ka chɛ ka a di nasara.

¹¹Ninvuɣ’ shɛb’ bɛn suhuri yiɣisi bah’ a zuɣu ni di vi; ka ninvuɣ’ shɛb’ bɛn tuhir’ a mi ni kpalim yoli ka kpi.

¹²A ni ti bo a dimnim’ shee, amaa ka ku nya ba; ninvuɣ’ shɛb’ bɛn tuhir’ a ni ti bahi yoli.

¹³Dama man’ Yawɛ ŋun nyɛ a Naawuni ŋɔ kul gbibila a nudirigu ni. Mani n-nyɛ ŋun yɛl’ a, “Di zɔri dabiɛm; n ni sɔŋ a la.”

¹⁴Yawɛ yɛliya, “ Yinim’ Izraɛlnim’ bɛn pɔri ka ka yaa ŋɔ, di zɔriya dabiɛm, n ni sɔŋ ya. Mani Izraɛl Naawuni ŋun be kasi ŋɔ n-nyɛ yi Tiligira.

¹⁵N ni chɛ ka yi be kaman nɛl’ la. N ni chɛ ka yi nyina nyɛ zaɣ’ pala ka dira. Yi ni niɛm zoya n-wurim li, ka niŋ daboya kaman wurigu la.

¹⁶Yi ni yɛli ba bahi, ka pɔhim ʒi ba chaŋ, ka sanʒiɛɣu ʒe n-wurim ba. Di saha yi suhuri ni paligi man’ Yawɛ zuɣu; ka yi paɣi mani ŋun nyɛ Izraɛl Naawuni ŋun be kasi ŋɔ.

¹⁷Faranim’ mini nandaamba yi ti bɔri kom ka bi nya, ka kɔnyuri chɛ ka bɛ lɔna kuui, man’ Yawɛ ni deei bɛ suhigu. Mani ŋun nyɛ Izraɛl Naawuni ŋɔ ku bahi ba.

¹⁸N ni chɛ ka mɔɣa dɔni zoya sunsuuni tiŋgban’ kuŋ ni, ka chɛ ka kɔbil’ nina yooi vinvama ni. N ni chɛ ka kom puhigi mɔɣu ni zɔra, ka chɛ ka kom yi tiŋgban’ kuŋ ni na zɔra.

¹⁹N ni chɛ ka sida tihi mini akasia tihi ni mitil tihi ni olivi tihi ni sipirɛs ni oki tihi ni gahi ti galisi mɔɣu ni.

²⁰Ka sokam zaa nya li ka baŋ ni man’ Yawɛ n-niŋ li. Bɛ ni baŋ ni Izraɛl Naawuni ŋun be kasi ŋɔ n-chɛ ka di niŋ maa.”

²¹Yawɛ ŋun nyɛ Yaakubu Naa ŋɔ yɛliya, “ Zaŋmiya yi yɛtɔɣa na, ka zaŋ yi ni mali yɛtɔɣ’ shɛli ni yi yɛli zaŋ chaŋ di polo na.

²²Zaŋmiya li na nti yɛli ti ashili yɛl’ shɛŋa din yɛn niŋ. Yɛlimiya ti kurimbuni ha yɛla ni nyɛ shɛm, ka ti zahim li nya din yɛn niŋ di puuni bee wuhimiya ti ashili yɛl’ shɛŋa din yɛn niŋ dahin’ shɛli ha.

²³Yɛlimiya ti din yɛn niŋ pumpɔŋɔ zaŋ chana, ka di chɛ ka ti baŋ ni yi shiri nyɛla wuna. Niŋmiya zaɣ’ viɛlli bee zaɣ’ biɛɣu ka di chɛ ka dabiɛm kpe ti ka ti tarigi.

²⁴Yi pala shɛli, ka yi tuma gba pa shɛli. Ŋunkam pii ya tum din chihira.

²⁵M bolila nuzaa polo ninvuɣ’ so ka o kana. O yila wulimpuhili polo na ka nyɛ ŋun jɛmdi ma. O ni du n-tam nanim’ zuɣu n-no ba kaman tandi la bee kaman yaɣimɛr’ ni nɔri yaɣiri shɛm la.

²⁶Ŋuni n-lee yɛl’ ti di yɛla piligu ni ha ni di chɛ ka ti baŋ li, ka ŋuni n-daŋ yɛli di yɛla, ka ti ni tooi yɛli ni o mali yɛlimaŋli? So daa pun bi yɛli di yɛla, ka so bi zaŋ li moli; so mi pun bi wum yi yɛtɔɣ’ shɛli.

²⁷N daa tuui zaŋ li yɛl’ la Ziɔnnima, ka zaŋ di lahiba’ suŋ molo m-moli Jɛrusalɛmnim’ sani.

²⁸Amaa n lihiya nya ka so kani. So ka bɛ ni n-nyɛ yɛtɔɣ’ tɔɣisira, ka n ni bɔh’ o bɔhigu ka o garigi.

²⁹Aai, bɛ zaa pa shɛli, bɛ tuma ka buchi; bɛ binnana gba ka yiko.”