Read Dagbani Aizaia 5 Bible Online

Aizaia 5 - Dagbani bible

Aizaia 5

¹Chɛliya ka n yili yilli ŋɔ ka yi wum, di nyɛla n yura min’ o tihi puu yilli: N yura m-mal’ o tihi puu ka di be daboli din tiŋgbani vuhiri zuɣu.

² O daa gbimi vuɣi kuɣa nimaani, ka bo ti’ viɛla na ti sa nimaani; ka sa gara zali puu maa sunsuuni, ka mali wain tɔɣiri bɔɣili sɔŋ di ni. O daa mali tahima ni di ni wali wain tia wala, amaa ka di ti walila wal’ biɛri.

³Di saha ka n yura maa yɛli Jɛrusalɛmnim’ mini Judanima, “Nyamiya m mini n tihi puu ŋɔ yɛla ŋɔ.

⁴Binshɛli beni ka di daa simdi ni n niŋ di ni ka m bi niŋ li? N daa mali tahima ni di ni wali wain tia wala, ka bɔ n-chɛ ka di ti zaŋ walila wal’ biɛri?

⁵“Pumpɔŋɔ n ni yɛli ya n ni yɛn niŋ n tihi puu maa shɛm. N ni sibigi di gariche bahi, ka wurim gooni din gil’ li, ka chɛ ka binsaɣinda kana ti saɣim li, ka daai li luhi.

⁶N ni chɛ li ka di bahi yoli. N ku wahi di nyoya ni bahi bee m-mali di ni, ka suligunyinyari mini gɔhi zooi lim li. N ni chɛ ka sagbana ku tɔɣisi kom bahi di ni.”

⁷Izraɛlnima n-nyɛ Yawɛ ŋun nyɛ Tɔbbihi Naa ŋɔ tihi puu maa; ka Judanim’ nyɛ ti’ shɛŋa o ni sa ka yuri li. O di bɔri ni o nya ka bɛ tumdila din tuhi, amaa ka ti nya ka bɛ kurila niriba. O di bɔri ni o nya ka bɛ tumdila wuntia tuma, amaa ka ti wumdila kumsi.

⁸Mbusim be yi zuɣu, yi zali yiya tuɣi taba, ka gbahi paliti tuɣi taba hal ka so ti ku lan nya palo nimaani pahi yi zuɣu, ka yi kɔŋko n-kul be tiŋgbani maa ni.

⁹Yawɛ ŋun nyɛ Tɔbbihi Naa ŋɔ poya yɛli ka n wum: “Yiya pam ni ti zani dabari, ka so ti ku be yiya din galisi mini yiya din viɛl’ ni.

¹⁰Nakpahi pia puuni wain tihi wala ni ti yihi wain palila lita anii kɔŋko, ka kawaan’ bira din ni pali lita kɔbiga ni pihinii daatam ni ti palila lita pisaayika.”

¹¹Mbusim be yi zuɣu, yinim’ bɛn yiɣisiri asiba n-gbaai dam nyubu la, yi kul niŋdila lala hal ni yuŋ n-nyu li buɣi.

¹²Yi churi puhibu ni, yi ŋmɛrila goonjɛnim’ mini mɔɣilɔnima, ka piɛbiri yuhi, ka ŋmɛri guŋgombihi din mali chaɣisa, ka nyuri wain, amaa ka bɛ lihi nya Yawɛ tuma bee n-lihi nya o yiko tuma.

¹³Dinzuɣu ka bɛ gbahi n niriba chaŋ ka bɛ bi baŋ. Kum ni ku yi zuɣulaannima, ka kɔnyuri ku yi tarimba mi.

¹⁴Kpiimba biɛhigu shee malila shili guli ba. Di yaala di noli gu ni di vali Jɛrusalɛm zuɣulaannim’ mini di tarimba bɛn galisi ni bɛnkam zaa mali suhupiɛlli be di ni.

¹⁵Bɛ ni ti dihi sokam vi, ka siɣisi karimbaannima.

¹⁶Amaa Yawɛ ŋun nyɛ Tɔbbihi Naa ŋɔ ni nya tibiginsim din tuhi niŋbu ni, ka Naawuni ŋun be kasi ŋɔ wuh’ o kasitali maa wuntitali puuni.

¹⁷Di saha piɛri ni ti ŋubiri mɔri nimaani kaman bɛ mɔri ŋubbu shee, ka piɛbihi mini bubihi ti ŋubiri mɔri dabari maa ni.

¹⁸Mbusim be yi zuɣu, yi zaŋla ʒiri gabisi vɔri tuumbiɛri, ka vɔri alahichi kaman tɔroko din mali gabisi la.

¹⁹Yi yɛliya, “Chɛliya ka o niŋ yomyom n-tum o tuma ka ti nya; kul chɛliya ka Izraɛlnim’ Naawuni ŋun be kasi ŋɔ tum o ni lo shɛm ka ti baŋ li!”

²⁰Mbusim be yi zuɣu, yi zaŋ zaɣ’ biɛɣu boli zaɣ’ viɛlli, ka zaŋ zaɣ’ viɛlli boli zaɣ’ biɛɣu, ka zaŋ zibisim leei neesim, ka zaŋ neesim leei zibisim, ka zaŋ bintɔɣu boli binnyaɣisili, ka zaŋ binnyaɣisili boli bintɔɣu.

²¹Mbusim be yi zuɣu, yi nini tiɣi yi yɛm pam, ka wuhi ni yi nyɛla yɛnnima.

²²Mbusim be yi zuɣu; yi nyɛla wain nyur’ wɔɣira, ka bi zɔri dabiɛm ni yi zaŋ binnyura gari taba.

²³Amaa faɣiri dibu zuɣu yi zaŋdi bɛn mali taali bahira, ka lee mɔŋdi bɛn ka taali yɛlimaŋli.

²⁴Dinzuɣu, buɣim ni diri mɔgbina mini mɔ’ kuma shɛm la, lala ka yi wula yɛn taai buɣim, ka pɔhim ʒe yi puma chaŋ kaman taŋkpaɣ’ la. Dama yi zaɣisi Yawɛ ŋun nyɛ Tɔbbihi Naa ŋɔ ni wuhi ya shɛm, ka ʒiɛm Izraɛlnim’ Naawuni ŋun be kasi ŋɔ yɛligu.

²⁵Dinzuɣu ka Yawɛ suhu yiɣisi bah’ o niriba zuɣu, ka o zaŋ o nuu ŋme n-ku ba, ka zoya sɔhigi, ka bɛ kpi n-do solɔri zuɣu kaman saɣiri la. Dimbɔŋɔ zaa yoli ka Yawɛ suhuyiɣisili maa na kul bi chɛ, amaa ka o na kul kpuɣ’ o nuu gu.

²⁶O ni gah’ o nuu boli zuliya shɛb’ bɛn be katiŋa, ka vulim vuliŋga boli dunia ŋɔ luɣ’ shɛlikam niriba, ka bɛ zɔri yomyom kanna!

²⁷Di bi wumdi bɛ ni so, bɛ so mi bi tuura. Gom bi gbaari ba bee ka bɛ ti gbihi. Bɛ ni so shɛlɔrigu bi wɔɣisi bee bɛ namdili ti chihi.

²⁸Bɛ piɛma diri pam, bɛ tɔbiri gba guri viɛla. Bɛ yuri takarifiɛma ŋmanila pilima, ka bɛ chɛchɛbunsi kalima zɔri gindi yomyom kaman pɔhimʒiɛpiliŋga la.

²⁹Bɛ ŋumdimi kaman gbuɣima la. Bɛ ŋumdimi, ka gbahiri bɛ ni yɛn gbahi biŋkɔb’ shɛba m-mali ba chana ka so ku tooi fa ba bahi.

³⁰Dahin shɛli kanna ka bɛ ni ti ŋum bahi ba na kaman teeku kom ni vuri shɛm la. Ka so yi ti lihi tiŋgbɔŋ maa ni, zibisim mini nandahima n-yɛn beni; ka sagbana zibigi fa neesim.