Read Dagbani Aizaia 52 Bible Online

Aizaia 52 - Dagbani bible

Aizaia 52

¹ Jɛrusalɛm, yiɣisima, yiɣisima, niŋmi yaa! Naawuni tiŋ’ kasi ŋɔ, zaŋm’ a situr’ suma ye. Chɛfirinim’ mini daɣirinim’ ku lan kpe a puuni yaha.

²Jɛrusalɛm din be dabitim ni ŋɔ, yiɣisim’ taŋkpaɣu ni n-dam amaŋa. Ziɔn bipuɣiŋga ŋun be dabitim ni ŋɔ, yihim’ mii din be a nyiŋgol’ ni bahi.

³Yawɛ yɛliya, “Pa liɣiri ka bɛ daa zaŋ dan ya leei daba maa. Dinzuɣu pa liɣiri ka n yɛn zaŋ yo yi zuɣu n-yihi ya dabitim maa ni.”

⁴Dama ti Duuma NAAWUNI lan yɛli, “N niriba daa tuui kulila Ijipti ti be nimaani. Nyama, di nyaaŋa ka Asirianim’ gba daa ti nahim ba yoli.

⁵ Ka pumpɔŋɔ yi bela Babilɔn, ka bɛ gba zaŋ ya leei bɛ daba yoli. Ka bɛn sun ya maa nyuri bara ka diri dari, ka kul maani ma ansarisi sahakam, ka ʒiɛmdi n yuli dabisili kam.

⁶Dahin shɛli kanna, ka yi ni ti baŋ ni mani n-nyɛ Naawuni; mani n-nyɛ ŋun tɔɣisi ya yɛtɔɣa maa.”

⁷ Nyam’ tumo ŋun mali lahiba’ suŋ mini suhudoo yɛtɔɣa n-zɔri duri zoya kanna ŋɔ naba ni viɛli pam shɛm! O moonila tiliginsim molo yɛri Ziɔnnima, “Yi Naawuni nyɛla naa.”

⁸Nyamiya, yi tiŋguliba laɣim yili suhupiɛlli yila! Dama bɛ nini nya Yawɛ ni labisi Ziɔn zali di zaashee shɛm.

⁹Jɛrusalɛm din lu dahim ŋɔ, yilimi suhupiɛlli yila! Dama Yawɛ tilig’ o tiŋa, ka maag’ o niriba suhuri.

¹⁰Yawɛ ni chɛ ka o yiko din be kasi la tum tuma. O ni tilig’ o niriba, ka dunia ŋɔ nim’ zaa nya.

¹¹ Yinim’ bɛn ʒiri Yawɛ jɛmbu duu lahi la, miriya ka yi shihi binshɛŋa din nyɛ daɣiri. Malimiya yimaŋ’ be kasi. Yimiya Babilɔn chaŋ.

¹²Dama dimbɔŋɔ dina yi ti bi yɛn niŋ yomyom yi n-chaŋ bee n-yi n-guui. Yawɛ nti yɛn be yi tooni mali ya chana. Ka Izraɛl Naawuni nyɛ ŋun yɛn be yi nyaaŋa polo n-nyɛ yi gula.

¹³Nyama, n dabili ni tɔŋ. Bɛ ni duh’ o, ka ti o jilima pam.

¹⁴Niriba pam daa nya o ka di gari ba pam. O biɛhigu daa taɣimi, ka o bi ŋmani ninsala.

¹⁵ Amaa o yɛla ni ti niŋ niriba pam alahiziba ka nanim’ ti kɔŋ bɛ noya yaabu o zuɣu. Dama bɛ nini ni ti nya bɛ ni daa bi yɛli ba shɛli yɛla; ka baŋ bɛ ni daa pun bi wum shɛli yɛla.