Read Dagbani Aizaia 54 Bible Online

Aizaia 54 - Dagbani bible

Aizaia 54

¹ Jɛrusalɛm, A daa ŋmanila paɣiŋoo, amaa pumpɔŋɔ, yilimi yila pampam ni suhupiɛlli. Nyini ŋun na ʒi n-wolisi ŋɔ! Yawɛ yɛliya, Pumpɔŋɔ, a ni mali bihi gari paɣ’ so ŋun mali yidana.

²Yɛligim’ a suɣili. Di niŋ zinchili. Kpam’ a kpahi ka di kpɛma, ka voog’ a mihi ka di kpaŋ.

³A ni yɛligi kpa nudirigu mini nuzaa polo, ka a niriba ni su zuliya shɛba, ka yi ti ʒini tin’ shɛŋa din daa nyɛ dabari la ni.

⁴Di zɔri dabiɛm, a ku di vi, di chɛ ka a suhu zɔhira, a ku nya filiŋ. A ni tam a bipalitali saha vi yɛla, ka tam saha shɛli a ni daa nyɛ pakoli ka nya filiŋ shɛl’ la yɛla.

⁵Dama ŋun nam a ni be a kaman paɣ’ yidan’ ni be o shɛm la. O yuli n-nyɛ, “Yawɛ ŋun nyɛ Tɔbbihi Naa.” Ŋuna n-nyɛ a tiligira ŋun nyɛ Izraɛl Naawuni ŋun be kasi la. O yuli n-lan nyɛ, dunia zaa Naawuni.

⁶Yawɛ ni lan bol’ a labisina kaman paɣ’ so bɛ ni zaɣisi ka o mali suhugarigu la. Naawuni yɛliya, “A ŋmanila paɣ’ so ŋun kuli dooyili o paɣisarilim ni ka bɛ ti zaɣis’ o.

⁷N daa zaɣis’ a la saha biɛla puuni, amaa n nambɔzɔbo din galisi pam puuni, n ni lan zaŋ a labisi n sanna.”

⁸Man’ Yawɛ ŋun nyɛ a tiligira la yɛliya, “N suhu n-daa yiɣisi pam saha biɛla puuni, ka n chɛ a bahi. Amaa n yurilim din bi naari la zuɣu, n ni zo a nambɔɣu.”

⁹ Nuhu ʒiɛman’ ni, n ni daa lo alikauli ni n ku chɛ ka kom lan di dunia la, lala ka n lo alikauli ni n ku lan chɛ ka n suhu yiɣisi bah’ a zuɣu, ka mi ku lan darig’ a tibili.

¹⁰Man’ Yawɛ ŋun zɔr’ a nambɔɣu la yɛliya, “Zoya mini kunkuna ni vuui, amaa n yurilim din bi naari la ku vuui ka chɛ a; ka n suhudoo alikauli la gba ku vuug’ a sani.”

¹¹Sanʒiɛɣu ni nahim tin’ shɛli, ka di bi nya sɔŋsim ŋɔ, n ni zaŋ kuɣ’ viɛla me a zali, ka zaŋ safaya kuɣa sɔŋ a tanzaa.

¹² N ni zaŋ rubis me a pihi, ka zaŋ kuɣ’ shɛŋa din nyɛlisiri me a dunoya, ka zaŋ kuɣ’ viɛla m-mal’ a gooni.

¹³ Man’ Yawɛ maŋmaŋ’ ni wuh’ a zuliya maa zaa, ka chɛ ka bɛ nyamma yɛligi pam.

¹⁴Wuntia puuni ka yi ni niŋ yaa. So ku lan nahim ya, ka dabiɛm ku lan mali ya. So ku lan kpɛhi ya dabiɛm, di ni ti niŋ ya katiŋa.

¹⁵So yi liri ya, di pala n yɛda ni ka o niŋ lala. Ka ŋunkam liri ya, o ku di nasara.

¹⁶Nyama, Mani n-nam machɛle, ka ti zuɣiri pɔhim, ka di chɛ ka buɣimsala buɣim nyɛligira, ka machɛli kuriti bidibbini din ni ku di bukaata. Mani n lan nam ŋun bɔhiri biɛri ka o kuri niriba.

¹⁷Amaa bɛ ni mali bidibbin’ shɛlikam jɛndi ya ku tooi niŋ ya shɛli; ka yi ni tooi garigi ŋunkam zaŋ ya taali bɔhigu. Man’ Yawɛ ni zabi n daba zuɣu, ka ti ba nasara.