Read Dagbani Aizaia 57 Bible Online

Aizaia 57 - Dagbani bible

Aizaia 57

¹Wuntizɔriba yi kpi, so baɣa kani bee m-baŋdi din tahi lala na. Amaa bɛ yi kpi, bɛ yila zaɣ’ biɛɣu ni kpe suhudoo ni.

²Wuntizɔriba yi kpi, bɛ nyarila vuhim bɛ kum maa puuni.

³Amaa yinim’ bɛn nyɛ baɣisi mini zinaniŋdiba ni pagɔra bihi ŋɔ, kamiya kpe na.

⁴Yinim’ bɛn nyɛ alahichinim’ mini ʒiŋmariba bihi ŋɔ, ŋuni ka yi lee maani ansarisi? Bee ŋuni ka yi lee mɛrigiri yi noya niŋda?

⁵Yi nyɛla bɛn jɛmdi buɣa, ka zaŋdi paɣiba dooni di timaha gbinni; ka zaŋdi yi bihi maani maligu vinvama mini tampima lɔna ni.

⁶Yi lan pihiri nimaani nyolinsi n-leeri buɣa jɛmdi li; ka boori binyɛra mini zimbuli bahiri di zuɣu. Yi tɛhiya ni dimbɔŋɔnim’ zaa nyɛla din ni chɛ ka n suhu piɛla?

⁷Yi duri zoya din du pam zuɣu nti maani maligu, ka zaŋdi paɣiba dooni nimaani.

⁸Yi zaŋla yi wuna ŋmahima n-zali baɣili yi duri puuni dunoya. Yi zaɣisi ma, ka mali yi gariti ka di yɛlim pam, ka ti yi mamanim’ liɣiri, ka pirigiri yi situra ka mali ba dooni nyari bɛ zaɣim.

⁹Yi ʒiɛri kpam, ka niŋdi tulaale pam niŋdi yimaŋ’ chani ti jɛmdi Molɛk. Buɣa jɛmbu zuɣu, yi timdi tuumba katinsi hal ka timdi ba kpiimba biɛhigu shee.

¹⁰Yi kul nahindi yimaŋa n-chani bɔri buɣa shee ni yi jɛm li, ka bi yɛri ni di ka buchi. Yi tɛhiya ni dina n-tiri ya kpiɔŋ, ka yi bi gbarigira.

¹¹“Bɔ n-lee chɛ ka yi zɔri dabiɛm, ka ŋmari ma ʒiri, ka bi lan tɛhiri n yɛla yi suhuri ni? N ni shini ya ka di yuui, ka ŋmaligi n nini bahi kpaŋ’ zuɣu n-chɛ ka yi bi lan zɔri ma maa.

¹²Yi tɛhiya ni yi ni tumdi tuun’ shɛŋa viɛla, amaa di mi ku sɔŋ ya.

¹³Yi yi ti kuhiri bɔri sɔŋsim, yin’ chɛliya ka yi buɣa maa tiligi ya. Pɔhim ni ʒe ba chaŋ. Hal ninsal’ vuhibu pɔhim gba ni ʒe ba chaŋ. Amaa ŋunkam zaa kana ti kpe n yuli, o ni su tiŋgbani ŋɔ, ka jɛm ma n zoli din be kasi zuɣu.”

¹⁴Bɛ ni ti yɛli, “Malimiya soli ti n niriba ŋɔ ka bɛ labi n sanna. Vuɣimiya tigbirigu kam din be bɛ soli zuɣu.”

¹⁵Mani n-nyɛ Naawuni ŋun galisi ka be kasi, ka be luɣ’ shɛli din mali jilima ka be kasi, ka nyɛ ŋun ni be hal ni saha din ka bahigu. Amaa n nyɛla ŋun lan be ninvuɣ’ shɛb’ bɛn siɣisi bɛmaŋa ka niŋ tuuba sani ni n neei bɛn siɣisi bɛmaŋ’ maa naani niŋbu, ka neei bɛn niŋ tuuba maa mi tahima.

¹⁶N kul ku nyari n niriba maa taali bee n yiɣisiri n suhu bahiri bɛ zuɣu sahakam, dama di yi nyɛ lala n ni ti bɛn’ ninvuɣ’ shɛb nyɛvili maa ni kpi.

¹⁷Bɛ daalahichi mini bɛ diribarilim zuɣu ka n daa chɛ ka n suhu yiɣisi bahi bɛ zuɣu, ka n darigi bɛ tibili ka chɛ ba bahi; amaa ka bɛ niŋ tipawumli n-kul dolila bɛmaŋmaŋ’ suhuyubu soli.

¹⁸N nya bɛ tuma, amaa n ni tib’ ba. N ni wuhi ba soli, ka sɔŋ ba, ka maai bɛn be fabila ni suhuri.

¹⁹ N ni tib’ n niriba maa, ka ti bɛn be yoma mini bɛn be katinsi zaa suhudoo. Man’ Yawɛ n-yɛli lala maa.

²⁰Amaa alahichinim’ ŋmanila teeku kɔgbana din bi doya baalim, ka kul puɣiri lura n-ʒiri daɣiri mini yaɣiri kpɛhiri teeku ni la.

²¹ N Naawuni maa yɛliya, “Alahichinim’ ka suhudoo.”