Read Dagbani Aizaia 60 Bible Online

Aizaia 60 - Dagbani bible

Aizaia 60

¹Jɛrusalɛm, yiɣisima n-chɛ ka a neesim neei; dama a neesim kana. Yawɛ jilima neeg’ a sani.

²Nyama, zibisim ni ti be dunia ni, ka niriba be bumbɔn’ ni. Amaa Yawɛ ni chɛ ka o neesim neei gili ya, ka chɛ ka o jilima siɣi yi zuɣu na.

³Zuliya pam niriba ni ka yi neesim maa ni na, ka nanim’ ka yi biɛkaali neesim ni na.

⁴Lihimiya nya din niŋdi gili ya; sokam zaa laɣimmi ka yi sanna. Yi bidibisi ni yi katiŋ’ na, ka bɛ kpuɣi yi bipuɣinsi buɣ’ na nti tin ya.

⁵Yi ni ti nya dimbɔŋɔ, ka di niŋ ya suhupiɛlli. Bɛ ni ti ʒi teeku ni azichi na ti tin ya, ka ʒi zuliya shɛb’ gba daazichi na ti tin ya.

⁶Bɛ ni ʒi Midian mini Ɛfa laakum’ pola na ti niŋ yi tiŋgbani ŋɔ ni. Ka Shiibanim’ zaa ʒi salima mini tulaale zim na; ka leei bɛn paɣiri Yawɛ.

⁷Bɛ ni ti zaŋ Kɛdar mini Nɛbaiɔt piɛri na nti tin ya. Yi ni ti tooi zaŋ ba mali sara n sara maligu bimbini zuɣu; ka n tibigi n jɛmbu duu din mali jilima maa.

⁸Banima n-lee zɔri yomyom kaman sagbana ŋɔ bee n-zɔri yomyom kaman ŋmani n-yiɣiri chani ni o ti kpe o tiɛɣu ni ŋɔ?

⁹Tiŋgban’ shɛŋa din be katiŋ’ mini Speen ŋarima ʒirila Naawuni niriba kulisirina. Bɛ zaŋla salima mini anzinfa pahi bɛ zuɣu na ni bɛ ti tibigi Yawɛ ŋun nyɛ yi Naawuni, ka nyɛ Izraɛl Naawuni ŋun be kasi ŋɔ yuli, dama o chɛ ka yi nya jilima.

¹⁰Tinzunnim’ ni kana ti me yi goma tin ya, ka bɛ nanim’ jɛm ya. N daa yiɣisila n suhu bahi yi zuɣu n-darigi yi tibili, amaa pumpɔŋɔ n ni zɔn ya nambɔɣu, ka niŋ ya nirilim.

¹¹ Yi tiŋ’ dunoli ti ku yo n-kpari yuŋ ni wuntaŋ’ ni zaa, dama tinzun’ nanim’ ni gari tooni n-zaŋ bɛ niriba ka bɛ ʒi bɛ daazichi na ti tin ya.

¹²Amaa zuliya shɛb’ bee nam shɛli din niriba zaɣisi ya jɛmbu, bɛ ni bahi yoli zaa.

¹³Bɛ ni zaŋ Lɛbanɔn nyɔŋ puuni ti’ viɛla din nyɛ paain mini junipa ni sipirɛs dari n-kana ti mali n jɛmbu duu ka di viɛla, ka ti chɛ ka n naba tambu shee mali jilima.

¹⁴ Ninvuɣ’ shɛb’ bɛn daa nahim a la ni ka a sanna. Bɛ ni kana ti damdi tiŋ’ lu a sizuura. Bɛnkam zaa daa ʒiɛm a la ni kana ti jɛm a. Bɛ bol’ a “Yawɛ tiŋa;” ka lan bol’ a “Ziɔn din nyɛ Izraɛl Naawuni ŋun be kasi la tin’ titali.”

¹⁵Hal bɛ ni daa je a ka zaɣis’ a, ka so bi kpɛr’ a ni la zaa yoli, n ni chɛ ka a galisi ka mali jilima, ka lan chɛ ka a nyɛ luɣ’ shɛli suhupiɛlli ni yɛn be sahakam.

¹⁶Zuliya kam mini nanim’ ni gbib’ a kaman paɣ’ ni gbib’ o bia ŋun mɔɣiri shɛm la. Ka a baŋ ni man’ Yawɛ n-nyɛ ŋun tilig’ a. Ka lan baŋ ni Izraɛl Naawuni ŋun nyɛ kpiɔŋzaalan’ ŋɔ n-fa a bahi maa.

¹⁷N ni zaŋ salima ti a, ka di zani daanya zaani; ka zaŋ anzinfa ti a, ka di zani kuriti zaani; ka zaŋ daanya ti a, ka di zani dari zaani, ka zaŋ kuriti ti a, ka di zani kuɣa zaani. Yi nanim’ ku lan nahim ya. N ni chɛ ka bɛ zaŋ wuntia mini suhudoo gbibi ya.

¹⁸So ku lan wum girigiri yɛla yi tiŋgban’ ni. Ka so mi ku lan saɣim yi tiŋgbani ŋɔ yaha. N ni be kaman gooni la n-taɣi ya ka chɛ zaɣ’ biɛɣu; ka yi paɣi ma n ni tiligi ya zuɣu.

¹⁹ Wuntaŋ’ ku lan nyɛ yi neesim wuntaŋ’ ni. Ka goli gba ku lan nyɛ yi neesim yuŋ. Man’ Yawɛ n-yɛn nyɛ yi neesim sahakam, ka mani ŋun nyɛ yi Naawuni ŋɔ jilima neesim ni nɛn ya.

²⁰Yi wuntaŋ’ mini yi goli ku lan lu, dama Yawɛ n-yɛn nyɛ yi neesim sahakam; ka yi fabila dabisa la zani tariga.

²¹Di saha ka a niriba zaa ti leei bɛn tumdi din tuhi, ka su tiŋgbani maa sahakam. Mani n-nam ba, ka zaŋ ba ʒili nimaani ni di chɛ ka n nya jilima.

²²Bɛ ni ŋun pɔra ni ŋun nyɛ tarima daŋ ni yɛligi n-leei zuliya shɛb’ bɛn mali yaa. Di saha yi ti paai, n ni chɛ ka di niŋ lala yomyom. Mani n-nyɛ Yawɛ!