Read Dagbani Aizaia 61 Bible Online

Aizaia 61 - Dagbani bible

Aizaia 61

¹ Yawɛ ŋun nyɛ ti Duuma ŋɔ zaŋ o shia ti ma. O tim ma mi ni n zaŋ lahiba’ suŋ ti ti ninvuɣ’ shɛb’ bɛn nyari nahiŋgu, ka maai bɛn suhuri saɣim la suhuri; ka yihi bɛn nyɛ daba la dabitim ni; ka yooi bɛn be sarika ni la bahi.

² O lan tim ma mi na ni n ti moli ni o ni yɛn tilig’ o niriba saha shɛl’ la paaya, ka moli ni o ni yɛn bɔhi biɛri saha shɛl’ la paaya; o lan tim ma mi na yaha ni n ti maai bɛn fabindi la suhuri.

³O wuhiya ni n chɛ ka bɛn fabindi Ziɔn ka mali nandahima la mali suhupiɛlli. Ka bɛn mali suhugarigu la yili wumpaɣibo yila. Bɛ ni ŋmanila Yawɛ ni sa oki ti’ shɛŋa. Bɛ zaa ni tum din tuhi, ka Yawɛ nya paɣibu bɛ ni tum shɛm zuɣu.

⁴Bɛ ni lan me du’ shɛŋa din daa lu la zali. Binshɛɣukam din daa saɣim ka di yuui la zaa, bɛ ni lan mal’ li zali di zaashee.

⁵Tinzunnim’ ni guli yi biŋkɔbbaligu tin ya, ka ko yi puri tin ya, ka guli yi tihi puri tin ya.

⁶Bɛ ni ti boli ya Yawɛ maligumaaniba, ka lan boli ya Naawuni tumtumdiba. Yi ni ti di zuliya shɛb’ azichi daanfaani, ka nyu bara di ni nyɛ yi dini maa zuɣu.

⁷Yi vidibo ni yi filiŋ ni ti zani tariga. Yi ni ti be yimaŋmaŋ’ tiŋgbɔŋ ni, ka yi daazichi ti nabi; ka yi ti mali suhupiɛlli sahakam.

⁸Man’ Yawɛ je ŋmɛndintoli tuma mini alahichi, amaa m bɔrila yɛlimaŋli soli. N ʒiɛyimtali puuni, n ni tin ya laara, ka lɔn ya alikauli din ku zani tariga.

⁹Yi bihi yuli ni ti du pam zuliya kam sani. Ka ŋunkam zaa ti nya ba ni baŋ ni bɛ nyɛla Yawɛ ni niŋ alibarika niŋ ninvuɣ’ shɛb’ ni.

¹⁰ N ni mali suhupiɛlli pam Yawɛ sani. N suhu zaa kul tibigirila n Naawuni. Dama o zaŋ tiliginsim binyɛra yɛli ma, ka zaŋ wuntitali binyɛra yɛli ma kaman aŋgo ni yi pili zuɣupil’ gahindili n-dih’ o zuɣu nachiinsi shɛm la bee kaman amiliya ni yi zaŋ salima yɛri n-dih’ omaŋ’ nachiinsi shɛm la.

¹¹Dama tiŋgbani ni chɛri ka bimbira puhiri yiri tiŋgban’ ni na shɛm ni kaman puu ni chɛri ka bɛ ni zaŋ bimbiri shɛŋa biri di ni zoori shɛm la, lala ka Yawɛ ŋun nyɛ ti Duuma ŋɔ ni chɛ ka wuntia tuma yi zahira, ka zuliya kam zaa tibig’ o.