Read Dagbani Aizaia 63 Bible Online

Aizaia 63 - Dagbani bible

Aizaia 63

¹Ŋuni n-lee yi Bɔzira din be Ɛdom tiŋgbɔŋ ni n-ye binyɛr’ ʒee kanna ŋɔ? Ŋuni n-lee ye binyɛr’ viɛlli n-kanna ni yiko ni o kpiɔŋ ŋɔ? Yawɛ ŋun mali yiko ka ni tooi tiligi niriba la n-kanna ni o ti mol’ o nasara dibu la molo.

²Bɔ n-lee chɛ ka o binyɛrigu ti mɔhi kaman ninvuɣ’ so ŋun nɔri wain tiwala binyɛrigu la?

³ Ka Yawɛ garigi yɛli, “N nɔrila zuliya kam niriba kaman wain tiwala la, ka so bi sɔŋ ma. Ka n daa no ba ni suli mini suhuyiɣisili, ka bɛ ʒim varim m binyɛrigu ka di gabisi zaa.

⁴Ka n daa yɛli ni n ni yɛn tiligi n niriba yuun’ shɛli paaya, ka n ni yɛn darigi n niriba dimnim’ tibili saha shɛli gba paai.

⁵ Ka di daa niŋ ma alahiziba n ni daa bi nya ninvuɣ’ so ŋun ni sɔŋ ma maa; amaa ka n suhuyiɣisili maa daa ti ma kpiɔŋ ka n di nasara n toli.

⁶ N suhuyiɣisili maa puuni ka n daa no m-bɔribɔri zuliya kam niriba, ka bɛ ʒim yi n-do tiŋgban’ ni.”

⁷N ni yɛli Yawɛ yurilim maŋli la yɛla. O ni tum tuun’ kar’ shɛŋa ti ti la zuɣu, n ni paɣ’ o. O nambɔzɔbo min’ o yurilim maŋli la zuɣu, o niŋ alibarika pam niŋ Izraɛlnim’ ni.

⁸Yawɛ yɛliya, “ N niriba m-bala, bɛ nyɛla ninvuɣ’ shɛb’ bɛn ku yɔhim ma.” Dinzuɣu ka o daa tiligi ba

⁹bɛ muɣisigu zaa ni. Pa malaika ka o daa tim na, amaa ŋun’ Yawɛ maŋmaŋa n-daa tiligi ba. O nambɔzɔbo min’ o yurilim zuɣu ka o daa tiligi ba. Ŋuna n-daa pun gbib’ ba piligu ni ha.

¹⁰Amaa ka bɛ daa ti yi o nyaaŋa, ka chɛ ka o shia kasi suhu saɣim pam. Dinzuɣu ka o daa leei bɛ dima, ka ŋmaligi tuhi ba o toli.

¹¹Di saha ka bɛ daa teei Yawɛ dabili Musa ʒiɛman’ la yɛla ka bɔhira, “Yawɛ ŋun daa tilig’ o niriba toondaannim’ teeku ni la lee be ya pumpɔŋɔ? Yawɛ ŋun daa zaŋ o shia kasi ti Musa la lee be ya?

¹² Ŋuna n-daa zaŋ o yiko nuu din mali jilima n-gbaai Musa nudirigu chana, ka daa chɛ ka kom din do bɛ tooni pirigi ni o zali yuli din ku kpi ti omaŋa,

¹³ka o daa zaŋ ba siɣi kom din zilim pam ni du duli, ka bɛ naba daa be kaman yuri naba la ka bɛ bi sarigi.”

¹⁴Bɛ ni zaŋdi niɣi chani vinvamli ni shɛm la, lala ka Yawɛ Shia daa ti o niriba vuhim. Lala ka o daa wuh’ o niriba maa soli, ka di ti o yuli jilima.

¹⁵A ni be alizanda ni a biɛhigu shee din be kasi ka mali jilima ŋɔ, lihim’ na nya. A baɣa ni daa yi be ti ni shɛm ni a yiko la lee kpalimla ya? A yurilim min’ a nambɔzɔbo la lan kani zaŋ kana ti sani.

¹⁶Nyini n-nyɛ ti ba. Ti yab’ Ibrahimma ʒi ti, ka Yaakubu gba bi mi ti. Amaa nyin’ Yawɛ n-nyɛ ti ba, ka a yuli nyɛ ti Tiligira kurimbuni ha.

¹⁷Bɔ n-niŋ ka a chɛ ka ti birigi ka chɛ a soli? Bee bɔ n-niŋ ka a chɛ ka ti niŋ tipawumli n-zo a sani? Labimi ti sanna, ninvuɣ’ shɛb’ bɛn nyɛ a daba la mini zuliya shɛb’ bɛn nyɛ a niriba la zuɣu.

¹⁸Ti daa nyɛla ninvuɣ’ shɛb’ bɛn be a biɛhigu shee din be kasi la, amaa ka ti dimnim’ daa kari ti nimaani, ka wurim a jɛmbu shee din be kasi maa.

¹⁹A niŋ ti mi kaman a pala ŋun pun nyɛ ti naa la, ka lan niŋ ti kaman ti pun pala a niriba la.